ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ
Ո Ր Ո Շ ՈՒ Մ
2 փետրվարի 2017 թվականի N 79-Ն
ԱԶԳԱՅԻՆ ԴԵՂԱՄԱՏՅԱՆԸ ՀՐԱՊԱՐԱԿԵԼՈՒ ԿԱՐԳԸ ՍԱՀՄԱՆԵԼՈՒ ՄԱՍԻՆ
Համաձայն «Դեղերի մասին» Հայաստանի Հանրապետության օրենքի 27-րդ հոդվածի 7-րդ մասի պահանջների` Հայաստանի Հանրապետության կառավարությունը որոշում է.
1. Սահմանել ազգային դեղամատյանը հրապարակելու կարգը` համաձայն հավելվածի:
2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:
Հայաստանի Հանրապետության
վարչապետ Կ. Կարապետյան
2017 թ. փետրվարի 3
Երևան
Հավելված
ՀՀ կառավարության 2017 թվականի
փետրվարի 2-ի N 79-Ն որոշման
Կ Ա Ր Գ
ԱԶԳԱՅԻՆ ԴԵՂԱՄԱՏՅԱՆԸ ՀՐԱՊԱՐԱԿԵԼՈՒ
1. Ազգային դեղամատյանը «Դեղերի մասին» Հայաստանի Հանրապետության օրենքով նախատեսված հիմնական դեղերի մասին տեղեկություններ (անատոմիական-բուժական-քիմիական ծածկագիր, դեղի ակտիվ և օժանդակ նյութերի բաղադրակազմ, կիրառման վերաբերյալ ցուցումներ, հակացուցումներ, նախազգուշացումներ, դեղաչափման տվյալներ, այդ թվում` տարբեր տարիքային խմբերում և հատուկ խմբերի պացիենտների շրջանում կողմնակի ազդեցությունները, դեղի փոխազդեցություններն այլ դեղերի և սննդի հետ, կիրառման կարգը հղիության և կրծքով սնուցման ժամանակաշրջանում, ինչպես նաև՝ երեխաների ու ծերերի շրջանում, դեղի պահման և ոչնչացման պայմանները) ընդգրկող տեղեկատուն է, որը հրապարակվում է առողջապահության բնագավառի պետական կառավարման լիազոր մարմնի կողմից` յուրաքանչյուր երկու տարին մեկ անգամ` հրապարակման տարվա հունիս ամսին:
2. Ազգային դեղամատյանի հրապարակումը` էլեկտրոնային եղանակով (պատկերամուտի տարբերակով) Հայաստանի Հանրապետության առողջապահության նախարարության պաշտոնական ինտերնետային կայքում (www.moh.am) տեղադրումն է գիրք-տեղեկատուի տեսքով` դրա համար նախատեսված հատուկ դարանում:
3. Առողջապահության նախարարությունն ապահովում է նաև ազգային դեղամատյանում ընդգրկված դեղերի վերաբերյալ մշտապես առցանց թարմացվող համացանցային հիմնապաշարի վարումը՝ հնարավորություն տալով ստանալու տեղեկատվություն յուրաքանչյուր համընդհանուր անվանմանը համապատասխան գրանցված դեղի մասին:
4. Ազգային դեղամատյանի հրապարակումից հետո երկու աշխատանքային օրվա ընթացքում Հայաստանի Հանրապետության առողջապահության նախարարությունը պաշտոնական մամլո հաղորդագրություն է տարածում ազգային դեղամատյանի հրապարակման վերաբերյալ` նշելով տվյալներ Հայաստանի Հանրապետության առողջապահության նախարարության պաշտոնական ինտերնետային կայքում դրա տեղադրման մասին:
Հայաստանի Հանրապետության
կառավարության աշխատակազմի
ղեկավար-նախարար Դ. Հարությունյան