«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
30 հունիսի 2004 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
3 հունիսի 2004 թվականի N 910-Ն
ՀՈՂԵՐԻ ՆՊԱՏԱԿԱՅԻՆ ՆՇԱՆԱԿՈՒԹՅԱՆ ՓՈՓՈԽՈՒԹՅԱՆ ԵՎ ԱՆՏԱՌԻ ՎԵՐԱԿԱՆԳՆՄԱՆ ՄԱՍԻՆ
Հայաստանի Հանրապետության հողային օրենսգրքի 7-րդ հոդվածի 2-րդ կետին համապատասխան` Հայաստանի Հանրապետության կառավարությունը որոշում է.
1. Երևանի Նորք-Մարաշ թաղային համայնքի վարչական սահմաններում գտնվող` անտառային նպատակային նշանակության հողերից առանձնացնել 46,5 հեկտար մակերեսով հողամասեր և ընդգրկել բնակավայրերի նպատակային նշանակության դասակարգման մեջ:
2. Հայաստանի Հանրապետության գյուղատնտեսության նախարարին` մեկամսյա ժամկետում ներկայացնել Երևան քաղաքի հեռուստակենտրոնի շրջակա տարածքում անտառազուրկ 56,7 հեկտար մակերեսով հողամասում անտառի վերականգնման ծրագիր:
3. Սույն որոշման 1-ին ու 2-րդ կետերում նշված հողերում հողօգտագործման և գույքային իրավունքներով ծանրաբեռնվածությունների հաշվառման ու գույքագրման նպատակով ստեղծել միջգերատեսչական հանձնաժողով և հաստատել դրա կազմը` համաձայն հավելվածի:
4. Միջգերատեսչական հանձնաժողովին` երկամսյա ժամկետում` հաշվառման ու գույքագրման արդյունքները և դրանց հիման վրա արված առաջարկությունները ներկայացնել Հայաստանի Հանրապետության տարածքային կառավարման և ենթակառուցվածքների գործունեությունը համակարգող նախարարին:
5. Հայաստանի Հանրապետության գյուղատնտեսության նախարարին` երկամսյա ժամկետում` Հայաստանի Հանրապետության բնապահպանության նախարարի, Հայաստանի Հանրապետության կառավարությանն առընթեր անշարժ գույքի կադաստրի պետական կոմիտեի նախագահի և Երևանի քաղաքապետի հետ համատեղ ուսումնասիրել Երևան քաղաքի վարչական սահմաններում գտնվող` անտառային նպատակային նշանակության հողերում հողօգտագործման, գույքային իրավունքներով ծանրաբեռնվածությունների փաստացի իրավիճակը և, ըստ անհրաժեշտության, սահմանված կարգով Հայաստանի Հանրապետության կառավարություն ներկայացնել առաջարկություններ դրանց հետագա կարգավիճակի և հողամասերի նպատակային նշանակության փոփոխության վերաբերյալ:
6. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
Հայաստանի Հանրապետության
վարչապետ Ա. Մարգարյան
2004 թ. հունիսի 30
Երևան
Հավելված
ՀՀ կառավարության 2004 թվականի
հունիսի 3-ի N 910-Ն որոշման
Կ Ա Զ Մ
ՆՈՐՔ-ՄԱՐԱՇ ԹԱՂԱՅԻՆ ՀԱՄԱՅՆՔԻ ՎԱՐՉԱԿԱՆ ՍԱՀՄԱՆՆԵՐՈՒՄ ԳՏՆՎՈՂ` ԱՆՏԱՌԱՅԻՆ ՆՊԱՏԱԿԱՅԻՆ ՆՇԱՆԱԿՈՒԹՅԱՆ ՀՈՂԵՐԻՑ ԲՆԱԿԱՎԱՅՐԵՐԻ ՆՊԱՏԱԿԱՅԻՆ ՆՇԱՆԱԿՈՒԹՅԱՆ ԴԱՍԱԿԱՐԳՄԱՆ ՄԵՋ ԸՆԴԳՐԿՎՈՂ ՀՈՂԵՐԻ ՀԱՇՎԱՌՄԱՆ ԵՎ ԳՈՒՅՔԱԳՐՄԱՆ ՄԻՋԳԵՐԱՏԵՍՉԱԿԱՆ ՀԱՆՁՆԱԺՈՂՈՎԻ
Վ. Տերտերյան - ՀՀ տարածքային կառավարման և ենթակառուցվածքների գործունեությունը համակարգող նախարարի տեղակալ (հանձնաժողովի նախագահ)
Ս. Ավետիսյան
-
ՀՀ գյուղատնտեսության նախարարի առաջին տեղակալ
Ս. Պապյան
-
ՀՀ բնապահպանության նախարարի առաջին տեղակալ
Կ. Արեյան
-
Երևանի քաղաքապետի տեղակալ
Ա. Մուսայան
-
ՀՀ կառավարությանն առընթեր անշարժ գույքի կադաստրի պետական կոմիտեի նախագահի տեղակալ
Ս. Մկրտչյան
-
Նորք-Մարաշ թաղային համայնքի ղեկավարի տեղակալ (համաձայնությամբ)
Հայաստանի Հանրապետության
կառավարության աշխատակազմի
ղեկավար-նախարար Մ. Թոփուզյան