ՀՀ ԱՇԽԱՏԱՆՔԻ ԵՎ ՍՈՑԻԱԼԱԿԱՆ ՀԱՐՑԵՐԻ ՆԱԽԱՐԱՐԻ ՀՐԱՄԱՆԸ ԸՆՏԱՆԻՔՈՒՄ ԲՌՆՈՒԹՅԱՆ ԵՆԹԱՐԿՎԱԾ ԵՎ ԸՆՏԱՆԻՔՈՒՄ ԲՌՆՈՒԹՅՈՒՆ ԳՈՐԾԱԴՐԱԾ ԱՆՁԱՆՑ ՄԻՋԵՎ ՀԱՇՏԵՑՄԱՆ ԿԱԶՄԱԿԵՐՊՄԱՆ ԵՎ ԻՐԱԿԱՆԱՑՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԱՇԽԱՏԱՆՔԻ ԵՎ ՍՈՑԻԱԼԱԿԱՆ ՀԱՐՑԵՐԻ ՆԱԽԱՐԱՐ

13 նոյեմբերի 2018 թ. N 120-Ն

Հ Ր Ա Մ Ա Ն

ԸՆՏԱՆԻՔՈՒՄ ԲՌՆՈՒԹՅԱՆ ԵՆԹԱՐԿՎԱԾ ԵՎ ԸՆՏԱՆԻՔՈՒՄ ԲՌՆՈՒԹՅՈՒՆ ԳՈՐԾԱԴՐԱԾ ԱՆՁԱՆՑ ՄԻՋԵՎ ՀԱՇՏԵՑՄԱՆ ԿԱԶՄԱԿԵՐՊՄԱՆ ԵՎ ԻՐԱԿԱՆԱՑՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Ղեկավարվելով «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրենքի (այսուհետ՝ օրենք) 10-րդ հոդվածի 1-ին մասով և 14-րդ հոդվածի 1-ին մասի 9-րդ կետով.

Հրամայում եմ`

1. Հաստատել «Ընտանիքում բռնության ենթարկված և ընտանիքում բռնություն գործադրած անձանց միջև հաշտեցման կազմակերպման և իրականացման կարգը»՝ համաձայն հավելվածի:

2. Հանձնարարել օրենքով սահմանված աջակցության կենտրոնների տնօրեններին՝ յուրաքանչյուր կիսամյակ նախարարության աշխատակազմի ընտանիքի, կանանց և երեխաների հիմնահարցերի վարչություն ներկայացնել տեղեկատվություն՝ ընտանիքում բռնության ենթարկված և ընտանիքում բռնություն գործադրած անձանց հաշտեցման գործընթացի վերաբերյալ:

3. Նախարարության աշխատակազմի ընտանիքի, կանանց և երեխաների հիմնահարցերի վարչության պետին` սույն հրամանի 2-րդ կետում նշված տեղեկատվությունը ստանալուց հետո հնգօրյա ժամկետում ամփոփել և ներկայացնել ընտանիքի, կանանց և երեխաների հիմնահարցերի ոլորտը համակարգող նախարարի տեղակալին:

4. Սույն հրամանի կատարման նկատմամբ հսկողությունը վերապահել աշխատանքի և սոցիալական հարցերի նախարարի առաջին տեղակալ Ա. Մանուկյանին:

5. Սույն հրամանն ուժի մեջ է մտնում 2019 թվականի հունվարի 31-ից:

Մ. Թանդիլյան

Հավելված

Աշխատանքի և սոցիալական

հարցերի նախարարի

2018 թվականի նոյեմբերի 13-ի

N 120-Ն հրամանի

ԿԱՐԳ

ԸՆՏԱՆԻՔՈՒՄ ԲՌՆՈՒԹՅԱՆ ԵՆԹԱՐԿՎԱԾ ԵՎ ԸՆՏԱՆԻՔՈՒՄ ԲՌՆՈՒԹՅՈՒՆ ԳՈՐԾԱԴՐԱԾ ԱՆՁԱՆՑ ՄԻՋԵՎ ՀԱՇՏԵՑՄԱՆ ԿԱԶՄԱԿԵՐՊՄԱՆ ԵՎ ԻՐԱԿԱՆԱՑՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով կարգավորվում են ընտանիքում բռնության ենթարկված և ընտանիքում բռնություն գործադրած անձանց միջև հաշտեցման գործընթացի իրականացման հետ կապված հարաբերությունները:

2. Հաշտեցման գործընթացն իրականացվում է՝ կամավորության, հավասարության, գործընթացին որևէ մեկի կամայական միջամտության անթույլատրելիության սկզբունքների հիման վրա:

3. Սույն կարգով սահմանված դրույթները չեն կիրառվում, եթե ընտանիքում բռնության ենթարկված անձն անչափահաս է կամ անգործունակ:

II. ԸՆՏԱՆԻՔՈՒՄ ԲՌՆՈՒԹՅԱՆ ԵՆԹԱՐԿՎԱԾ ԵՎ ԸՆՏԱՆԻՔՈՒՄ ԲՌՆՈՒԹՅՈՒՆ ԳՈՐԾԱԴՐԱԾ ԱՆՁԱՆՑ ՄԻՋԵՎ ՀԱՇՏԵՑՄԱՆ ԳՈՐԾԸՆԹԱՑԸ

4. Ընտանիքում բռնության ենթարկված և ընտանիքում բռնություն գործադրած անձանց միջև հաշտեցումն իրականացվում է բռնություն գործադրած կամ բռնության ենթարկված անձի դիմումով, որը ներկայացվում է օրենքով սահմանված աջակցության կենտրոն (այսուհետ՝ աջակցության կենտրոն):

5. Բռնություն գործադրած կամ բռնության ենթարկված անձի կողմից հաշտեցման վերաբերյալ դիմումը պետք է ներկայացվի անհետաձգելի միջամտության կամ պաշտպանական որոշումների գործողության ընթացքում:

6. Բռնություն գործադրած կամ բռնության ենթարկված անձի կողմից հաշտեցման վերաբերյալ դիմումը ստանալուց հետո աջակցության կենտրոնը ողջամիտ ժամկետում պետք է այդ մասին գրավոր ծանուցի մյուս կողմին: Ծանուցումն ուղարկվում է կողմի փաստացի բնակվելու (գտնվելու) վայրի հասցեով:

7. Հաշտեցմանը մասնակցելու համաձայնության վերաբերյալ մյուս կողմի գրավոր համաձայնությունը ստանալուց հետո աջակցության կենտրոնը մեկօրյա ժամկետում սկսում է հաշտեցման գործընթացը:

8. Հաշտեցման դիմումի առկայության մասին մյուս կողմին պատշաճ ծանուցելու օրվանից տասնօրյա ժամկետում գրավոր համաձայնություն չստանալու դեպքում հաշտեցման վերաբերյալ առաջարկը համարվում է մերժված:

9. Հաշտեցման գործընթացին բռնություն գործադրած և բռնության ենթարկված անձինք պետք է մասնակցեն անձամբ: Ներկայացուցիչների մասնակցությամբ հաշտեցման գործընթացի իրականացումն արգելվում է:

10. Բռնություն գործադրած և բռնության ենթարկված անձանց միջև հաշտեցման վերաբերյալ պայմանները քննարկվում են համատեղ:

11. Հաշտեցման գործընթացի իրականացման համար հատկացված վայրում բռնություն գործադրած և բռնության ենթարկված անձանց միջև համատեղ հանդիպումները կարող են իրականացվել առավելագույնը երեք անգամ:

12. Հաշտեցման գործընթացի առավելագույն տևողությունը չի կարող գերազանցել երեք ամիսը:

13. Կենտրոնի կողմից հաշտեցման գործընթացը դադարեցվում է.

1) սույն կարգի 12-րդ կետով սահմանված ժամկետում համաձայնություն ձեռք չբերելու դեպքում.

2) առկա է հիմնավոր ենթադրություն, որ ընտանիքում բռնության ենթարկված անձը հաշտեցման գործընթացին մասնակցում է հարկադրանքի ազդեցության ներքո:

14. Հաշտեցման պայմանների շուրջ փոխադարձ համաձայնություն ձեռք բերելու դեպքում բռնություն գործադրած և բռնության ենթարկված անձանց միջև կնքվում է գրավոր հաշտության համաձայնություն՝ երկու օրինակից:

15. Հաշտության համաձայնությունն ուժի մեջ է մտնում կողմերի ստորագրման պահից:

16. Հաշտության համաձայնությունը չպետք է պարունակի անձի պատիվը և արժանապատվությունը նվաստացնող կամ նրա վիճակը որևէ կերպ վատթարացնող պայմաններ:

17. Հաշտության համաձայնության մեկ օրինակը ներկայացվում է աջակցության կենտրոն, իսկ երկրորդ օրինակը՝ ոստիկանության իրավասու ծառայողին կամ դատարան՝ համապատասխանաբար անհետաձգելի միջամտության կամ պաշտպանական որոշումները վերացնելու նպատակով:

18. Ընտանիքում բռնության միևնույն դեպքով բռնություն գործադրած կամ բռնության ենթարկված անձանցից յուրաքանչյուրը հաշտեցման վերաբերյալ դիմում կարող է ներկայացնել միայն մեկ անգամ: