ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐ
12 մարտի 2020 թ.
քաղ. Երևան N 105-Ն
Հ Ր Ա Մ Ա Ն
ՍՆԱՆԿՈՒԹՅԱՆ ԳՈՐԾՈՎ ԿԱՌԱՎԱՐՉԻ ԿՈՂՄԻՑ ՄԱՍՆԱԳԻՏԱՑՎԱԾ ԿԱԶՄԱԿԵՐՊՈՒԹՅՈՒՆՆԵՐԻ ԿԱՄ ՄԱՍՆԱԳԵՏՆԵՐԻ ԵՎ ԱՅԼ ԱՇԽԱՏԱԿԻՑՆԵՐԻ ՊԱՐՏԱԴԻՐ ՆԵՐԳՐԱՎՄԱՆ ԴԵՊՔԵՐԸ ՍԱՀՄԱՆԵԼՈՒ ՄԱՍԻՆ
Ղեկավարվելով «Սնանկության մասին» օրենքի 29-րդ հոդվածի 1-ին մասի «դ» կետով.
ՀՐԱՄԱՅՈՒՄ ԵՄ՝
1. Սահմանել սնանկության գործով կառավարչի կողմից մասնագիտացված կազմակերպությունների կամ մասնագետների և այլ աշխատակիցների պարտադիր ներգրավման դեպքերը` համաձայն հավելվածի:
2. Սույն հրամանն ուժի մեջ է մտնում 2020 թվականի ապրիլի 15-ից:
Ռ. Բադասյան
Հավելված
արդարադատության նախարարի
2020 թվականի մարտի 12-ի
N 105-Ն հրամանի
ՍՆԱՆԿՈՒԹՅԱՆ ԳՈՐԾՈՎ ԿԱՌԱՎԱՐՉԻ ԿՈՂՄԻՑ ՄԱՍՆԱԳԻՏԱՑՎԱԾ ԿԱԶՄԱԿԵՐՊՈՒԹՅՈՒՆՆԵՐԻ ԿԱՄ ՄԱՍՆԱԳԵՏՆԵՐԻ ԵՎ ԱՅԼ ԱՇԽԱՏԱԿԻՑՆԵՐԻ ՊԱՐՏԱԴԻՐ ՆԵՐԳՐԱՎՄԱՆ ԴԵՊՔԵՐԸ
1. Սույն հավելվածի 2-րդ կետով սահմանված չափանիշներին համապատասխանող պարտապանի սնանկության գործին մասնագիտացված կազմակերպությունների կամ մասնագետների և այլ աշխատակիցների (այսուհետ միասին՝ մասնագետ) պարտադիր ներգրավման հարցը քննարկվում է պարտատերերի ժողովի կողմից:
2. Պարտատերերը ժողովի որոշմամբ կառավարիչը պարտավոր է ներգրավել մասնագետ, եթե պարտապանը համապատասխանում է հետևյալ չափանիշներից որևէ մեկին.
1) հանրային ծառայությունների ոլորտում կարգավորվող գործունեություն իրականացնող անձ է.
2) Հայաստանի Հանրապետության օրենքով սահմանված կարգով գրանցված պետական և համայնքային ոչ առևտրային կազմակերպություն է.
3) սնանկ ճանաչվելուն նախորդող երեք օրացուցային տարիներից որևէ հաշվետու տարվա վերջի դրությամբ ցուցաբերել է հետևյալ ցուցանիշներից առնվազն երկուսը.
ա. ֆինանսական վիճակի մասին հաշվետվության (հաշվեկշռի) ընդհանուր գումարը գերազանցել է 10 միլիարդ Հայաստանի Հանրապետության դրամը.
բ. գործունեությունից հասույթը գերազանցել է 20 միլիարդ Հայաստանի Հանրապետության դրամը.
գ. Հայաստանի Հանրապետության վիճակագրական կոմիտեի սահմանած կարգով հաշվարկված՝ աշխատողների միջին տարեկան թիվը գերազանցել է 250-ը:
3. Մասնագետ ներգրավելու հարցի քննարկման ժամանակ կառավարիչը պարտատերերի ժողովին ներկայացնում է նաև առաջարկվող մասնագետների տվյալները, նրանց գործունեության ոլորտները, նրանց կողմից իրականացվելիք գործառույթները և դրանց իրականացման հնարավոր արժեքը (գնային առաջարկը)՝ համապատասխան հիմնավորումներով: