ՀՀ ԲԱՐՁՐ ՏԵԽՆՈԼՈԳԻԱԿԱՆ ԱՐԴՅՈՒՆԱԲԵՐՈՒԹՅԱՆ ՆԱԽԱՐԱՐԻ ՀՐԱՄԱՆԸ ԼԻՑԵՆԶԱՎՈՐՄԱՆ ՀԱՆՁՆԱԺՈՂՈՎԻ ԿԱՆՈՆԱԴՐՈՒԹՅՈՒՆԸ ՀԱՍՏԱՏԵԼՈՒ ԵՎ ՀՀ ՏՐԱՆՍՊՈՐՏԻ ԵՎ ԿԱՊԻ ՆԱԽԱՐԱՐԻ 2012 Թ․ ՆՈՅԵՄԲԵՐԻ 26-Ի ԹԻՎ 656-Ն ՀՐԱՄԱՆԸ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԲԱՐՁՐ ՏԵԽՆՈԼՈԳԻԱԿԱՆ ԱՐԴՅՈՒՆԱԲԵՐՈՒԹՅԱՆ ՆԱԽԱՐԱՐ

3 հուլիսի 2020 թ.

ք. Երևան N 04-Ն

Հ Ր Ա Մ Ա Ն

ԼԻՑԵՆԶԱՎՈՐՄԱՆ ՀԱՆՁՆԱԺՈՂՈՎԻ ԿԱՆՈՆԱԴՐՈՒԹՅՈՒՆԸ ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏՐԱՆՍՊՈՐՏԻ ԵՎ ԿԱՊԻ ՆԱԽԱՐԱՐԻ 2012 Թ․ ՆՈՅԵՄԲԵՐԻ 26-Ի ԹԻՎ 656-Ն ՀՐԱՄԱՆԸ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

Ղեկավարվելով «Լիցենզավորման մասին» Հայաստանի Հանրապետության օրենքի 8-րդ հոդվածի 4-րդ մասի և «Նորմատիվ իրավական ակտերի մասին» Հայաստանի Հանրապետության օրենքի 36-րդ հոդվածի պահանջներով՝

ՀՐԱՄԱՅՈՒՄ ԵՄ`

1. Հաստատել Հայաստանի Հանրապետության բարձր տեխնոլոգիական արդյունաբերության նախարարության լիցենզավորման հանձնաժողովի կանոնադրությունը՝ համաձայն հավելվածի:

2. Ուժը կորցրած ճանաչել Հայաստանի Հանրապետության տրանսպորտի և կապի նախարարի 2012 թվականի նոյեմբերի 26-ի «Լիցենզավորման հանձնաժողովի կանոնադրությունը հաստատելու և Հայաստանի Հանրապետության տրանսպորտի և կապի նախարարի մի շարք հրամաններ ուժը կորցրած ճանաչելու մասին» թիվ 656-Ն հրամանը:

Նախարար Հ. Արշակյան

Հավելված

ՀՀ բարձր տեխնոլոգիական

արդյունաբերության նախարարի

3 հուլիսի 2020 թվականի

թիվ 04-Ն հրամանի

ԿԱՆՈՆԱԴՐՈՒԹՅՈՒՆ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԲԱՐՁՐ ՏԵԽՆՈԼՈԳԻԱԿԱՆ ԱՐԴՅՈՒՆԱԲԵՐՈՒԹՅԱՆ ՆԱԽԱՐԱՐՈՒԹՅԱՆ ԼԻՑԵՆԶԱՎՈՐՄԱՆ ՀԱՆՁՆԱԺՈՂՈՎԻ

1. ԸՆԴՀԱՆՈՒՐ ԴՐՈՒՅԹՆԵՐ

1. Հայաստանի Հանրապետության բարձր տեխնոլոգիական արդյունաբերության նախարարության (այսուհետ՝ Նախարարություն) լիցենզավորման հանձնաժողովը (այսուհետ՝ Հանձնաժողով) ստեղծվել է Հայաստանի Հանրապետության բարձր տեխնոլոգիական արդյունաբերության նախարարի հրամանով:

2. Հանձնաժողովն իր գործունեության ընթացքում ղեկավարվում է Հայաստանի Հանրապետության օրենսդրությամբ և սույն կանոնադրությամբ:

2. ՀԱՆՁՆԱԺՈՂՈՎԻ ԽՆԴԻՐՆԵՐՆ ՈՒ ԳՈՐԾԱՌՈՒՅԹՆԵՐԸ

3. Հանձնաժողովի հիմնական խնդիրն է նպաստել նախարարության ոլորտում գործունեության լիցենզավորման գործընթացի իրականացմանը:

4. Հանձնաժողովն իր առջև դրված հիմնական խնդրին համապատասխան ուսումնասիրում և լիցենզավորող մարմնի ղեկավարին է ներկայացնում Նախարարության ոլորտում լիցենզիաների տրամադրման, լիցենզիաների գործողության կասեցման կամ դադարեցման վերաբերյալ եզրակացություններ:

3. ՀԱՆՁՆԱԺՈՂՈՎԻ ԳՈՐԾՈՒՆԵՈՒԹՅԱՆ ԿԱԶՄԱԿԵՐՊՈՒՄԸ

5. Հանձնաժողովը հարցերը քննարկելու նպատակով նիստերը անցկացնում է ըստ անհրաժեշտության:

6. Հանձնաժողովի նիստերն իրավազոր են, եթե դրանց մասնակցում են հանձնաժողովի անդամների կեսից ավելին:

7. Հանձնաժողովի որոշումներն ընդունվում են նիստին մասնակցող անդամների ձայների պարզ մեծամասնությամբ՝ փակ գաղտնի քվեարկությամբ: Ձայների հավասարության դեպքում որոշումը համարվում է ընդունված հօգուտ հայտատուի կամ լիցենզավորված անձի (այսուհետ՝ Հրավիրված անձ):

8. Հարցերի քննարկման մասին հրավիրված անձին պատշաճ ձևով հայտնվում է քննարկումից ոչ ուշ, քան երկու օր առաջ՝ տեղեկացնելով նրան քննարկման վայրի (հասցեի), ամսաթվի և ժամի մասին:

9. Հանձնաժողովի նիստի նախագահողը նիստի ժամանակ հրապարակում է քննարկվող հարցերը, ներկայացնում է հրավիրված անձանց, հարցերի քննարկմանը մասնակցող անձանց տեղեկացնում է իրենց իրավունքների և պարտականությունների մասին, հրապարակում է հայտերի, ինչպես նաև քննարկվող այլ փաստաթղթերի բովանդակությունը:

10. Հարցերի քննարկմանը հրավիրված անձանց չմասնակցելը հիմք չի հանդիսանում հարցերը չքննարկելու կամ այն մերժելու համար, եթե հրավիրված անձը չի ներկայացրել իր հարցի քննարկումը այլ ժամկետներում անցկացնելու գրավոր դիմում: Հրավիրված անձի հարցի քննարկումը այլ ժամկետներում անցկացնելու դիմումը կարող է բավարարվել, եթե քննարկումը հետաձգելիս չի խախտվում օրենքով հայտի քննարկման համար նախատեսված ժամկետները:

11. Հանձնաժողովի նիստերում հարցերի քննարկումները կատարվում են դռնբաց: Հրավիրված անձի կամ հանձնաժողովի անդամի պահանջով քննարկումը կարող է կատարվել դռնփակ, եթե հարցի քննարկման ժամանակ բացահայտվելու են գաղտնիք պարունակող տեղեկություններ:

12. Հանձնաժողովի որոշումը կայացվում է հարցի քննության ավարտից հետո՝ դռնփակ: Հանձնաժողովի կողմից որոշման կայացման ժամանակ տվյալ սենյակում կարող են գտնվել միայն հանձնաժողովի անդամները:

13. Հանձնաժողովում հարցերի քննարկման ժամանակ կազմվում է արձանագրություն, որտեղ նշվում է՝

1) Հանձնաժողովի նիստի անցկացման ամսաթիվը և վայրը

2) Հանձնաժողովի կազմը

3) Քննարկվող հարցի բովանդակությունը

4) Տեղեկություններ քննարկմանը մասնակից անձանց մասին

5) Հարցի քննարկմանը մասնակցող անձանց բացատրությունները, նրանց միջնորդությունները և դրանց քննարկման արդյունքները

6) Հարցի քննարկման ընթացքում հետազոտված փաստաթղթերը և այլ ապացույցները

7) Հանձնաժողովի եզրակացության բովանդակությունը

14. Հանձնաժողովի եզրակացությունը այն կայացնելու օրը հանձնվում է լիցենզավորող մարմնի ղեկավարին:

15. Հանձնաժողովի նիստերի արձանագրությունները ստորագրում են նիստին մասնակցող բոլոր անդամները և քարտուղարը:

16. Հանձնաժողովի նախագահը՝

1) Հրավիրում է հանձնաժողովի նիստեր և նախագահում դրանք

2) Կազմակերպում է հանձնաժողովի աշխատանքները

3) Ստորագրում է հանձնաժողովի նիստերի արձանագրությունները և դրանց գործունեության հետ առնչվող մյուս փաստաթղթերն ու գրագրությունները

4) Իրականացնում է Հայաստանի Հանրապետության օրենսդրությամբ և սույն կանոնադրությամբ իրեն վերապահված լիազորություններ

17. Հանձնաժողովի նախագահի տեղակալը հանձնաժողովի նախագահի բացակայության դեպքում ստանձնում է նրա պարտականությունները:

18. Հանձնաժողովի քարտուղարը՝

1) Նախապատրաստում է հանձնաժողովի նիստերը

2) Տեղեկացնում է հանձնաժողովի անդամներին հանձնաժողովի հերթական նիստի անցկացման վայրի, ժամանակի և քննարկվող հարցի մասին՝ նիստի օրվանից առնվազն երկու օր առաջ

3) Ստորագրում է հանձնաժողովի արձանագրությունները

4) Առաջարկություններ է նախապատրաստում հանձնաժողովի աշխատանքային ծրագրերի կազմման և կատարման վերաբերյալ

5) Հանձնաժողովի քննարկմանն է ներկայացնում վերջինիս գործունեությանը վերաբերող նյութերն ու ընթացիկ տեղեկությունները, նախապատրաստում առաջարկություններ դրանց վերաբերյալ

6) Կազմում է հանձնաժողովի եզրակացությունները

19. Հանձնաժողովի նիստից հետո քննարկման ներկայացված նյութերը պահվում են հանձնաժողովի քարտուղարի աշխատասենյակում, դրա համար առանձնացված պահարաններում, բացառությամբ գաղտնիք պարունակող փաստաթղթերի փաթեթի, որոնք պահվում են Ռազմարդյունաբերության կոմիտեում:

20. Հանձնաժողովի քարտուղարի բացակայության դեպքում հանձնաժողովի անդամներից մեկը, հանձնաժողովի նախագահի հանձնարարությամբ, ստանձնում է հանձնաժողովի քարտուղարի պարտականությունները:

21. Հանձնաժողովի անդամները՝

1) Մասնակցում են հանձնաժողովի նիստերին, հանձնաժողովի աշխատանքային պլանների մշակման և դրանց իրականացման հետ կապված աշխատանքներին

2) Հանձնաժողովի նիստերին չմասնակցելու դեպքում նախապես տեղեկացնում են հանձնաժողովի նախագահին կամ քարտուղարին:

4. ՀԱՆՁՆԱԺՈՂՈՎԻ ԳՈՐԾՈՒՆԵՈՒԹՅԱՆ ԴԱԴԱՐՈՒՄԸ

22. Հանձնաժողովի գործունեությունը դադարում է Հայաստանի Հանրապետության օրենսդրությամբ սահմանված կարգով:

23. Հանձնաժողովի գործունեության դադարումից հետո հանձնաժողովի գործունեությանն առնչվող փաստաթղթերը և այլ նյութերը ենթակա են պահպանման Հայաստանի Հանրապետության օրենսդրությամբ սահմանված կարգով:

Պաշտոնական հրապարակման օրը՝ 7 հուլիսի 2020 թվական: