ՀԵՌՈՒՍՏԱՏԵՍՈՒԹՅԱՆ ԵՎ ՌԱԴԻՈՅԻ ՀԱՆՁՆԱԺՈՂՈՎ
Ո Ր Ո Շ ՈՒ Մ
8 սեպտեմբերի 2020 թվականի
ք. Երևան թիվ 95-Ն
ՄԱՍՆԱՎՈՐ ՄՈՒԼՏԻՊԼԵՔՍ ՕՊԵՐԱՏՈՐԻ ԳՈՐԾՈՒՆԵՈՒԹՅԱՆ ԼԻՑԵՆԶԱՎՈՐՄԱՆ ՄՐՑՈՒՅԹԻ ԱՆՑԿԱՑՄԱՆ ԿԱՐԳԸ ԵՎ ԼԻՑԵՆԶԻԱՅԻ ՁԵՎԸ ՀԱՍՏԱՏԵԼՈՒ ՄԱՍԻՆ
Ղեկավարվելով «Տեսալսողական մեդիայի մասին» օրենքի 32-րդ հոդվածի 1-ին մասի 6-րդ և 7-րդ կետերի, 7-րդ մասի, 52-րդ հոդվածի 7-րդ մասի և «Լիցենզավորման մասին» օրենքի 10-րդ հոդվածի 7-րդ մասի դրույթներով` Հեռուստատեսության և ռադիոյի հանձնաժողովը որոշում է.
1. Հաստատել`
1) մասնավոր մուլտիպլեքս օպերատորի գործունեության լիցենզավորման մրցույթի անցկացման կարգը` համաձայն N 1 հավելվածի.
2) մասնավոր մուլտիպլեքս օպերատորի գործունեության լիցենզիայի ձևը` համաձայն N 2 հավելվածի:
2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
Հեռուստատեսության և ռադիոյի
հանձնաժողովի նախագահ Տ. Հակոբյան
2020 թ. սեպտեմբերի 8
ք. Երևան
Հավելված N 1
Հաստատված է
Հեռուստատեսության և ռադիոյի
հանձնաժողովի 2020 թվականի
սեպտեմբերի 8-ի թիվ 95-Ն որոշմամբ
ԿԱՐԳ
ՄԱՍՆԱՎՈՐ ՄՈՒԼՏԻՊԼԵՔՍ ՕՊԵՐԱՏՈՐԻ ԳՈՐԾՈՒՆԵՈՒԹՅԱՆ ԼԻՑԵՆԶԱՎՈՐՄԱՆ ՄՐՑՈՒՅԹԻ ԱՆՑԿԱՑՄԱՆ
1. ԸՆԴՀԱՆՈՒՐ ԴՐՈՒՅԹՆԵՐ
1. Սույն կարգով սահմանվում է մասնավոր մուլտիպլեքս օպերատորի գործունեության լիցենզավորման մրցույթի (այսուհետ` մրցույթ) կազմակերպման և անցկացման ընթացակարգը:
2. Մրցույթն անցկացնում է Հեռուստատեսության և ռադիոյի հանձնաժողովը (այսուհետ` Հանձնաժողով)` Հայաստանի Հանրապետության օրենսդրության և սույն կարգի համաձայն:
3. Հանձնաժողովը իր կառավարմանը հանձնված ազատ հաճախականությունների առկայության դեպքում հայտարարում է մրցույթ:
4. Մրցույթը չկայանալու կամ մրցույթում հաղթող չլինելու դեպքում այն հայտարարելուց 10 օր հետո Հանձնաժողովը հայտարարում է նոր մրցույթ:
5. Մրցույթին կարող են մասնակցել միայն Հայաստանի Հանրապետությունում գրանցված իրավաբանական կամ ֆիզիկական անձինք, որոնց հիմնադրման (ստեղծման) ժամանակ կամ դրանից հետո իրավաբանական անձի օտարերկրյա կապիտալի մասնակցության բաժինը չպետք է հավասար կամ ավելի լինի մուլտիպլեքս օպերատորի որոշումների ընդունման համար անհրաժեշտ բաժնեմասերի 50 տոկոսից, եթե այլ բան նախատեսված չէ միջազգային պայմանագրով:
6. Մասնավոր մուլտիպլեքսի սփռման տարածքը չպետք է լինի ավելի փոքր, քան մեկ մարզի կամ Երևան քաղաքի տարածքը:
7. Մրցույթն անցկացվում է հրապարակային կարգով:
2. ՄՐՑՈՒՅԹԻ ՄԱՍԻՆ ՏԵՂԵԿԱՏՎՈՒԹՅԱՆ ՀՐԱՊԱՐԱԿՈՒՄԸ
8. Մրցույթը հայտարարվում է Հանձնաժողովի որոշմամբ:
9. Մրցույթի մասին տեղեկատվությունը Հանձնաժողովը հրապարակում է Հայաստանի Հանրապետության հրապարակային ծանուցումների www.azdarar.am պաշտոնական ինտերնետային կայքում և իր՝ www.tvradio.am պաշտոնական ինտերնետային կայքում:
10. Մրցույթի մասին տեղեկատվությունը պետք է ներառի՝
1) լիցենզավորման ենթակա գործունեության տեսակը,
2) սփռման տարածքը,
3) մրցույթին մասնակցելու համար ներկայացվող փաստաթղթերի ցանկը,
4) հայտերի ընդունման ժամանակահատվածը և վայրը,
5) լրացուցիչ տեղեկություններ ստանալու աղբյուրը՝ հեռախոսահամարը, էլեկտրոնային փոստի հասցեն,
6) հայտի ձևը:
3. ՀԱՅՏԵՐԻ ԸՆԴՈՒՆՈՒՄԸ ԵՎ ԴՐԱՆՑ ՆԵՐԿԱՅԱՑՎՈՂ ՊԱՀԱՆՋՆԵՐԸ
11. Մրցույթին մասնակցելու համար ներկայացվում է մուլտիպլեքս օպերատորի գործունեության լիցենզավորման մրցույթին մասնակցելու հայտ (այսուհետ՝ Հայտ)՝ համաձայն Ձև N 1-ի և անհրաժեշտ փաստաթղթեր:
12. Հայտին կցվում են՝
1) մուլտիպլեքս ցանցի ստեղծման նախագիծը, ներառյալ` ցանցի գործարկման ժամանակացույցը.
2) տվյալներ օգտագործվելիք տեխնիկական միջոցների և սարքավորումների մասին.
3) ֆինանսական աղբյուրները հիմնավորող փաստաթղթեր.
4) hայտատուի հիմնադիր փաստաթղթերի պատճենները:
13. Հայտը և կից փաստաթղթերը պետք է համապատասխանեն Հայաստանի Հանրապետության օրենքներին, այլ իրավական ակտերին և սույն կարգով սահմանված պահանջներին:
14. Հայտատուն, օրենքով սահմանված կարգով, պատասխանատվություն է կրում Հանձնաժողով ներկայացրած տեղեկատվության հավաստիության համար:
15. Հայտը և կից փաստաթղթերը Հանձնաժողով են ներկայացվում մրցույթ հայտարարելուց հետո՝ վեց ամսվա ընթացքում՝ առձեռն կամ փոստով:
16. Հայտին կից փաստաթղթերը ներկայացվում են երկու նույնական փաթեթով՝ յուրաքանչյուրը թելակարված, համարակալված, վերջին թերթի հետնամասում, կարի վրա փակցված պիտակով՝ «Բաղկացած է ... թերթից» գրառմամբ («...» նշվում է թերթերի քանակը), ստորագրված և կնքված (կնիքի առկայության դեպքում), ընդ որում փաթեթներում ներառված մուլտիպլեքս ցանցի ստեղծման նախագիծը և ցանցի գործարկման ժամանակացույցը պետք է ներկայացվեն առանձին թելակարված: Փաթեթները ներկայացվում են փակ ծրարով` ստորագրված և կնքված (կնիքի առկայության դեպքում):
4. ՀԱՅՏԵՐԻ ՀՐԱՊԱՐԱԿՈՒՄԸ ԵՎ ՓՈՐՁԱԳԵՏՆԵՐԻ ԸՆՏՐՈՒԹՅՈՒՆԸ
17. Հանձնաժողովը Հայտերի ընդունման ժամկետի ավարտից հետո եռօրյա ժամկետում իր պաշտոնական ինտերնետային կայքում հրապարակում է մրցույթի մասնակիցների ցանկը:
18. Մրցույթի մասնակիցների հայտերը և կից փաստաթղթերը հրապարակվում են Հանձնաժողովի դռնբաց նիստում` ըստ հայտերի գրանցման հերթականության, հայտերի ընդունման ժամկետի ավարտից հետո՝ 10-օրյա ժամկետում:
19. Հանձնաժողովը մասնակցին է տրամադրում Հայտը և կից փաստաթղթերը՝ փակ ծրարով: Հայտի բովանդակությունը ներկայացնելու համար մասնակցին տրվում է 30 րոպե:
20. Նիստում անցկացվում է նաև փորձագետների ընտրություն` ցանցի ստեղծման նախագծի և ժամանակացույցի տեխնիկական փորձաքննություն իրականացնելու համար:
21. Մուլտիպլեքս ցանցի ստեղծման նախագծի և ժամանակացույցի տեխնիկական փորձաքննությունը պետք է իրականացվի առավելագույնը երկու ամսվա ընթացքում: Եթե երկու ամսվա ընթացքում փորձագիտական խումբը չի տալիս տեխնիկական եզրակացություն, ապա համարվում է, որ այն համապատասխանում է անհրաժեշտ պահանջներին:
5. ՀԱՅՏԵՐԻ ՔՆՆԱՐԿՈՒՄԸ ԵՎ ՈՐՈՇՄԱՆ ԸՆԴՈՒՆՈՒՄԸ
22. Տեխնիկական փորձաքննության եզրակացությունը ստանալուց հետո` առավելագույնը մեկ ամսվա ընթացքում, Հանձնաժողովը հրավիրում է նիստ և բաց քվեարկության արդյունքում` հիմք ընդունելով փորձագիտական եզրակացությունը, որոշում է ընդունում լիցենզիա տրամադրելու կամ Հայտը մերժելու մասին:
23. Քվեարկությունն իրականացվում է ըստ մասնակիցների հայտերի գրանցման հերթականության՝ հաշվի առնելով հետևյալ չափանիշները`
1) մուլտիպլեքս ցանցի ստեղծման նախագծով ներկայացված հեռարձակման ցանցի առաջարկվող սփռման տարածքի չափը,
2) մասնակցի կողմից առաջարկվող ծառայությունների որակը,
3) հայտատուի տեխնիկական հնարավորությունները,
4) հայտատուի ֆինանսական հնարավորությունները:
24. Մինչև քվեարկությունը Հանձնաժողովի անդամները հայտերի և կից փաստաթղթերի քննարկում չեն իրականացնում և չեն հրապարակում իրենց դիրքորոշումները դրանց վերաբերյալ, սակայն կարող են հանդես գալ հայտարարությամբ, միջնորդությամբ:
25. Լիցենզիա տրամադրելու կամ Հայտը մերժելու մասին որոշումն ընդունվում է անդամների ընդհանուր թվի ձայների մեծամասնությամբ:
26. Հայտը մերժվում է, եթե ստացվել է տեխնիկական փորձաքննության բացասական եզրակացություն կամ ներկայացված Հայտը չի բավարարում սույն կարգի 23-րդ կետում ներկայացված չափանիշներին:
6. ՄՐՑՈՒՅԹԻ ԱՐԴՅՈՒՆՔՆԵՐԻ ՀՐԱՊԱՐԱԿՈՒՄԸ ԵՎ ԲՈՂՈՔԱՐԿՈՒՄԸ
27. Հանձնաժողովի որոշումը մրցույթի մասնակիցներին ուղարկվում է որոշումն ընդունելուց հետո` եռօրյա ժամկետում:
28. Մրցույթի մասին ամբողջական տեղեկատվությունը Հանձնաժողովը հրապարակում է իր պաշտոնական ինտերնետային կայքում՝ որոշումն ընդունելու օրվանից հետո՝ 20-օրյա ժամկետում:
29. Մրցույթի արդյունքները կարող են բողոքարկվել դատական կարգով:
7. ՄՐՑՈՒՅԹԸ ՉԿԱՅԱՑԱԾ ՀԱՅՏԱՐԱՐԵԼԸ
30. Հանձնաժողովը մրցույթը հայտարարում է չկայացած, եթե`
1) սահմանված ժամկետում ոչ մի Հայտ չի ներկայացվել, կամ ներկայացված հայտերից ոչ մեկը չի համապատասխանում Հայաստանի Հանրապետության օրենսդրության պահանջներին.
2) մրցույթի միակ մասնակցի կամ բոլոր մասնակիցների մուլտիպլեքս ցանցի ստեղծման նախագծի և ժամանակացույցի տեխնիկական փորձաքննության արդյունքում տրվել է բացասական եզրակացություն.
3) մրցույթի միակ մասնակցի կամ բոլոր մասնակիցների մուլտիպլեքս ցանցի ստեղծման նախագծով ներկայացված հեռարձակման ցանցի առաջարկվող սփռման տարածքի չափը չի համապատասխանում «Տեսալսողական մեդիայի մասին» օրենքով սահմանված պահանջին:
Ձև N 1
Մասնավոր մուլտիպլեքս օպերատորի
գործունեության լիցենզավորման
մրցույթի անցկացման կարգի
Հեռուստատեսության և ռադիոյի
հանձնաժողովի նախագահ
____________________ին
(անուն, ազգանուն)
Հ Ա Յ Տ
Մասնավոր մուլտիպլեքս օպերատորի գործունեության
լիցենզավորման մրցույթին մասնակցելու
Հայտատուի անվանումը ______________________________________________________________________
Գտնվելու/հաշվառման վայրը __________________________________________________________________
Հեռախոսահամարը, էլ. փոստի հասցեն _________________________________________________________
Սփռման տարածքը_______________________________________________________________________
Կից փաստաթղթեր՝ ________ թերթ:
Հայտատու _______________________________
(անուն, ազգանուն) _______________
(ստորագրություն)
__ _________ ______
(օրը, ամիսը, տարեթիվը) Կ.Տ. (կնիքի առկայության դեպքում)
Հավելված N 2
Հաստատված է
Հեռուստատեսության և ռադիոյի
հանձնաժողովի 2020 թվականի
սեպտեմբերի 8-ի թիվ 95-Ն որոշմամբ
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ՀԵՌՈՒՍՏԱՏԵՍՈՒԹՅԱՆ ԵՎ ՌԱԴԻՈՅԻ ՀԱՆՁՆԱԺՈՂՈՎ
ԼԻՑԵՆԶԻԱ __________________
(լիցենզիայի սերիան և համարը)
ք. ___________ ___ _______________ _______
(լիցենզիան տալու օրը, ամիսը, տարեթիվը)
տրվում է
գործունեության տեսակը
սփռման տարածքը
լիցենզիայի գործողության ժամկետը ___________________________________________________________
(իրավաբանական անձի անվանումը կամ ֆիզիկական անձի անունը, ազգանունը)
___________________________________________________________
(իրավաբանական անձի գտնվելու կամ ֆիզիկական անձի հաշվառման վայրը)
___________________________________________________________
___________________________________________________________
___________________________________________________________
ՀԵՌՈՒՍՏԱՏԵՍՈՒԹՅԱՆ ԵՎ ՌԱԴԻՈՅԻ ՀԱՆՁՆԱԺՈՂՈՎԻ ՆԱԽԱԳԱՀ _______________
(ստորագրություն) Կ.Տ. ___________________ (անուն, ազգանուն)
Պաշտոնական հրապարակման օրը՝ 11 սեպտեմբերի 2020 թվական: