ԵՎՐԱՍԻԱԿԱՆ ՏՆՏԵՍԱԿԱՆ ԲԱՐՁՐԱԳՈՒՅՆ ԽՈՐՀՐԴԻ ՈՐՈՇՈՒՄԸ ԵՎՐԱՍԻԱԿԱՆ ՏՆՏԵՍԱԿԱՆ ԲԱՐՁՐԱԳՈՒՅՆ ԽՈՐՀՐԴԻ ՈՐՈՇ ՈՐՈՇՈՒՄՆԵՐՈՒՄ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

ԵՎՐԱՍԻԱԿԱՆ ՏՆՏԵՍԱԿԱՆ ԲԱՐՁՐԱԳՈՒՅՆ ԽՈՐՀՈՒՐԴ

Ո Ր Ո Շ ՈՒ Մ

11 դեկտեմբերի 2020 թվականի թիվ 20 քաղ. Մինսկ

ԵՎՐԱՍԻԱԿԱՆ ՏՆՏԵՍԱԿԱՆ ԲԱՐՁՐԱԳՈՒՅՆ ԽՈՐՀՐԴԻ ՈՐՈՇ ՈՐՈՇՈՒՄՆԵՐՈՒՄ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

«Ծառայությունների առևտրի, հիմնադրման, գործունեության և ներդրումների իրականացման մասին» արձանագրության («Եվրասիական տնտեսական միության մասին» 2014 թվականի մայիսի 29-ի պայմանագրի թիվ 16 հավելված) 40-րդ կետին համապատասխան և հաշվի առնելով Եվրասիական տնտեսական հանձնաժողովի տեղեկատվությունը՝ Եվրասիական տնտեսական բարձրագույն խորհուրդը որոշեց.

1. Եվրասիական տնտեսական բարձրագույն խորհրդի որոշումներում կատարել փոփոխություններ՝ համաձայն հավելվածի:

2. Եվրասիական տնտեսական հանձնաժողովին՝ Եվրասիական տնտեսական միության անդամ պետությունների հետ համատեղ մինչև 2024 թվականի հունվարի 1-ն ապահովել Եվրասիական տնտեսական միության իրավունքում ներդաշնակեցված պահանջների սահմանումը՝ որևէ անդամ պետության հաշվետվությունների կազմման և հաշվապահական հաշվառման ոլորտում ծառայությունների այն մատակարարների համար, որոնք գործունեությունն իրականացնում են այլ անդամ պետության տարածքում:

Եվրասիական տնտեսական բարձրագույն խորհրդի անդամներ՝

Հայաստանի Հանրապետությունից` Բելառուսի Հանրապետությունից՝ Ղազախստանի Հանրապետությունից՝ Ղրղզստանի Հանրապետությունից՝ Ռուսաստանի Դաշնությունից`

ՀԱՎԵԼՎԱԾ

Եվրասիական տնտեսական

բարձրագույն խորհրդի

2020 թվականի դեկտեմբերի 11-ի

թիվ 20 որոշման

ՓՈՓՈԽՈՒԹՅՈՒՆՆԵՐ

Եվրասիական տնտեսական բարձրագույն խորհրդի որոշումներում կատարվող

1. Եվրասիական տնտեսական բարձրագույն խորհրդի 2014 թվականի դեկտեմբերի 23-ի թիվ 110 որոշմամբ հաստատված՝ ծառայությունների այն ոլորտների (ենթաոլորտների) ցանկը, որոնցում Եվրասիական տնտեսական միության շրջանակներում գործում է ծառայությունների միասնական շուկան՝ լրացնել հետևյալ բովանդակությամբ 55-րդ կետով՝

«55. Ծառայություններ՝ հաշվետվություններ կազմելու և հաշվապահական հաշվառման ոլորտում (ՀԱԴ-ից՝ 82213, 82219 և 82220).14, հետևյալի մասով՝

1) հաճախորդի կողմից ներկայացված տեղեկատվության, եկամուտների ամփոփագրերի, հաշվեկշռային ամփոփագրերի, հաշվեկշռային ամփոփագրերի և հաշիվների վերլուծության հիման վրա ֆինանսական հաշվետվությունների կազմում (կազմվող հաշվետվությունների արժանահավատությունն այդ դեպքում չի երաշխավորվում) (բացառությամբ ձեռնարկատիրական գործունեության հարկերի մասով հայտարարագրեր կազմելու ծառայությունների).

2) ֆինանսական հաշվետվությունների ստուգում, գնահատում և նախապատրաստում15.

3) հաշվապահական գրքերում առևտրային գործառնությունների դասակարգում և գրանցում՝ դրամական արտահայտությամբ կամ չափման այլ միավորով.

4) ֆինանսական հաշվետվությունների նախապատրաստման հետ միասին տրամադրվող՝ ձեռնարկատիրական գործունեության հարկերի մասով հարկային հայտարարագրեր կազմելու (լրացնելու) ծառայություններ:».

լրացնել հետևյալ բովանդակությամբ 14-րդ և 15-րդ ծանոթագրություններով՝

«.14 Գործում է 2025 թվականի հունվարի 1-ից՝ Եվրասիական տնտեսական միության իրավունքում՝ Եվրասիական տնտեսական միության որևէ անդամ պետության հաշվետվությունների կազմման և հաշվապահական հաշվառման ոլորտում ծառայությունների այն մատակարարների համար, որոնք գործունեությունն իրականացնում են Եվրասիական տնտեսական միության այլ անդամ պետության տարածքում, ներդաշնակեցված պահանջներ սահմանելուց հետո՝ բացառությամբ բանկերին, ոչ բանկային ֆինանսավարկային կազմակերպություններին տրամադրվող ծառայությունների:

.15 Չի վերաբերում աուդիտի ծառայություններին:»:

2. Եվրասիական տնտեսական բարձրագույն խորհրդի 2016 թվականի դեկտեմբերի 26-ի թիվ 22 որոշմամբ հաստատված՝ հաշվետվությունների կազմման և հաշվապահական հաշվառման ոլորտում ծառայությունների միասնական շուկայի ձևավորման մասով ազատականացման պլանի 9-րդ կետում երկրորդ վանդակում «2021 թվական» բառերը փոխարինել «2025 թվական» բառերով:

Պաշտոնական հրապարակման օրը՝ 22 հունիսի 2022 թվական: