«Գրանցված է»
ՀՀ արդարադատության
նախարարության կողմից
12 նոյեմբերի 2003 թ.
Պետական գրանցման թիվ 10503349
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԲՆԱՊԱՀՊԱՆՈՒԹՅԱՆ ՆԱԽԱՐԱՐ
9 հոկտեմբերի 2003 թ.
ք. Երևան N 363-Ն
Հ Ր Ա Մ Ա Ն
ԱՏՈՄԱՅԻՆ ԷՆԵՐԳԻԱՅԻ ՕԳՏԱԳՈՐԾՄԱՆ ԲՆԱԳԱՎԱՌՈՒՄ ԱՆՎՏԱՆԳՈՒԹՅԱՆ ՓՈՐՁԱՔՆՆՈՒԹՅԱՆ ՓՈՐՁԱԳԻՏԱԿԱՆ ԵԶՐԱԿԱՑՈՒԹՅԱՆ ՁԵՎԻՆ ԵՎ ԲՈՎԱՆԴԱԿՈՒԹՅԱՆԸ ՆԵՐԿԱՅԱՑՎՈՂ ՊԱՀԱՆՋՆԵՐԸ ՍԱՀՄԱՆԵԼՈՒ ՄԱՍԻՆ
Ի կատարումն Հայաստանի Հանրապետության կառավարության 2001 թվականի հուլիսի 12-ի «Ատոմային էներգիայի օգտագործման բնագավառում անվտանգության փորձաքննության կազմակերպման և անցկացման կարգը հաստատելու մասին» N 640 որոշմամբ հաստատված կարգի 13-րդ կետի
Հրամայում եմ`
Սահմանել ատոմային էներգիայի օգտագործման բնագավառում անվտանգության փորձաքննության փորձագիտական եզրակացության ձևին և բովանդակությանը ներկայացվող պահանջները, համաձայն հավելվածի:
Նախարար Վ. Այվազյան
Հավելված
ՀՀ բնապահպանության նախարարի
2003 թ. հոկտեմբերի 9-ի
թիվ 363-Ն հրամանի
ՓՈՐՁԱԳԻՏԱԿԱՆ ԵԶՐԱԿԱՑՈՒԹՅԱՆ ՁԵՎԻՆ ԵՎ ԲՈՎԱՆԴԱԿՈՒԹՅԱՆԸ ՆԵՐԿԱՅԱՑՎՈՂ ՊԱՀԱՆՋՆԵՐ
I. ԸՆԴՀԱՆՈՒՐ ԴՐՈՒՅԹՆԵՐ
1. Սույն փաստաթղթով սահմանվում են ատոմային էներգիայի օգտագործման բնագավառում անվտանգության փորձաքննության փորձագիտական եզրակացության (այսուհետ՝ եզրակացություն) ձևին և բովանդակությանը ներկայացվող պահանջները:
II. ՓՈՐՁԱԳԻՏԱԿԱՆ ԵԶՐԱԿԱՑՈՒԹՅԱՆ ՁԵՎԻՆ ՆԵՐԿԱՅԱՑՎՈՂ ՊԱՀԱՆՋՆԵՐ
2. Եզրակացությունը պետք է հաստատված լինի փորձաքննություն անցկացնող կազմակերպության ղեկավարի ստորագրությամբ: Եզրակացությունը պետք է պարունակի հղումներ օգտագործված գրականության մասին, ներառյալ հրապարակումներ, գիտատեխնիկական հաշվետվություններ, ատոմային էներգիայի օգտագործման օբյեկտների շահագործման հետ կապված փաստաթղթեր և այլն:
3. Եզրակացությունը պետք է ներկայացվի պատվիրատուին մեկ օրինակով տպագրված Ա4 ֆորմատի սպիտակ թղթի մեկ կողմի վրա, ինչպես նաև էլեկտրոնային տարբերակը` էլեկտրոնային կրիչով: Գրաֆիկական նյութերը պետք է ներկայացվեն ոչ ավել, քան Ա3 ֆորմատի թղթի վրա, կարդալու համար հարմար մասշտաբով:
4. Եզրակացության մեջ կիրառվող հապավումները և հասկացությունները պետք է համապատասխանեն ատոմային էներգիայի օգտագործման բնագավառում օգտագործվող հապավումներին և հասկացություններին:
5. Եթե փորձաքննության ընթացքում կատարվել են հաշվարկներ և վերլուծություններ ստուգելու համար ներկայացված նյութերը, ապա դրանց մասին մանրամասն տեղեկությունները բերվում են եզրակացությանը կից հավելվածներում:
III. ՓՈՐՁԱԳԻՏԱԿԱՆ ԵԶՐԱԿԱՑՈՒԹՅԱՆ ԲՈՎԱՆԴԱԿՈՒԹՅԱՆԸ ՆԵՐԿԱՅԱՑՎՈՂ ՊԱՀԱՆՋՆԵՐ
6. Եզրակացությունը պետք է համապատասխանի սույն փաստաթղթի պահանջներին, ինչպես նաև փորձաքննություն անցկացնելու մասին տեխնիկական առաջադրանքում նշված պայմաններին: Եզրակացությունը պետք է պարունակի հետևյալ բաժինները`
- փորձաքննության առարկան.
- փորձաքննության նպատակը.
- գնահատման չափանիշները.
- փորձաքննության ընթացքում կատարվող գնահատումները.
- եզրակացություններ և առաջարկներ:
7. «Փորձաքննության առարկան» բաժինը պետք է պարունակի փորձաքննության ներկայացված փաստաթղթերի ցանկը, նշելով փաստաթղթերի այն բաժինները և դրանցում արծարծված հարցերը, որոնք ենթակա են փորձաքննության: Եթե փորձաքննության առարկան այլ է, քան փաստաթղթերում պարունակվող տեղեկությունների գնահատումը, ապա տվյալ բաժնում պետք է նշվեն տեխնիկական առաջադրանքով փորձագիտական կազմակերպության առջև դրված խնդիրները:
8. Փորձաքննության նպատակն է գնահատել փորձաքննության առարկայի համապատասխանությունը`
ա) ատոմային էներգիայի օգտագործման բնագավառի Հայաստանի Հանրապետության օրենքների, միջուկային և ճառագայթային անվտանգության չափանիշների, նորմերի ու կանոնների պահանջներին.
բ) ստանդարտների պահանջներին:
9. Եթե փորձաքննության առարկայի վերաբերյալ բացակայում են ազգային նորմեր, կանոններ և ստանդարտներ, ապա անհրաժեշտ է գնահատել փորձաքննության առարկայի համապատասխանությունը`
ա) միջազգային կազմակերպությունների խորհրդատվական փաստաթղթերին.
բ) զարգացած ատոմային էներգետիկա ունեցող երկրներում կիրառվող փորձին, ժամանակակից գիտատեխնիկական նվաճումներին և փորձագետի սեփական կարծիքին և չափանիշներին:
10. «Փորձաքննության նպատակը» բաժնում պետք է թվարկվեն բոլոր փաստաթղթերը և նրանցում բերված պահանջները, որոնք հիմք են ծառայել գնահատման համար:
11. Զարգացած ատոմային էներգետիկա ունեցող երկրների փորձը հիմք ընդունելիս համապատասխան փաստաթղթերից մեջբերումներ պետք է կատարվեն և տրվեն հղումներ:
12. Սեփական չափանիշներ կիրառելիս հարկավոր է դրանք հիմնավորել:
13. «Գնահատման չափանիշները» բաժնում հարկավոր է գնահատել հայտատուի կողմից օգտագործված անվտանգության գնահատման չափանիշների բավարար և հիմնավորված լինելը: Պետք է թվարկել փորձագետի կողմից ընտրված անվտանգության գնահատման չափանիշները և կատարել համապատասխան հղումներ:
14. «Փորձաքննության ընթացքում կատարվող գնահատումները» բաժնում նկարագրվում է փորձաքննության ենթարկվող հարցը և փորձագետի կողմից տրվում է գնահատական: Դիտողությունները ձևակերպվում են հակիրճ, նախօրոք տալով հարցի նկարագրությունը: Յուրաքանչյուր դիտողություն պետք է ձևակերպված լինի հստակ և պարունակի մեկ պահանջ:
15. Եզրակացություններ և առաջարկներ`
Փորձաքննության արդյունքում պետք է կատարվեն եզրակացություններ և տրվեն առաջարկներ: Եզրակացությունները պետք է վերաբերեն փորձաքննության առարկայում հայտնաբերված դրական և բացասական կողմերին, սակայն չպետք է նորից շարադրվեն նախորդ բաժնում բերված դիտողությունները: Եզրակացությունները և առաջարկները չպետք է վերաբերեն ձևակերպումներին, տեքստի ձևավորմանը և ուղղագրությանը:
16. Փորձաքննության ընթացքում պետք է գնահատել փորձաքննության առարկայի վերաբերյալ դրական որոշում կայացնելու նպատակահարմարությունը, նույնիսկ եթե առկա են որոշակի թերություններ և տվյալ բաժնում պետք է տրվի առաջարկ կարգավորող մարմնի կողմից համապատասխան որոշում կայացնելու վերաբերյալ:
17. Փորձաքննության վերջնական եզրակացությունը կարող է լինել`
- դրական.
- բացասական.
- դրական, նշված պայմանների պարտադիր կատարման դեպքում:
18. Եզրակացությունը կարող է պարունակել նաև լրացուցիչ նյութեր ներկայացնելու պահանջ, հիմնավորելով դրա անհրաժեշտությունը: