ՀՀ ՈՍՏԻԿԱՆՈՒԹՅԱՆ ՊԵՏԻ ՀՐԱՄԱՆԸ ՀՀ ՈՍՏԻԿԱՆՈՒԹՅԱՆ ԾԱՌԱՅՈՂՆԵՐԻՆ, ԻՆՉՊԵՍ ՆԱԵՎ ՆՐԱՆՑ ԸՆՏԱՆԻՔԻ ԱՆԴԱՄՆԵՐԻՆ ԱՐՁԱԿՈՒՐԴԻ ՎԱՅՐ ՄԵԿՆԵԼԻՍ ԵՎ ԱՐՁԱԿՈՒՐԴԻՑ ՎԵՐԱԴԱՌՆԱԼԻՍ ՏՐԱՆՍՊՈՐՏԱՅԻՆ ԾԱԽՍԵՐԻ ՓՈԽՀԱՏՈՒՑՄԱՆ ՎՃԱՐՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

«ԳՐԱՆՑՎԱԾ Է»

ՀՀ ԱՐԴԱՐԱԴԱՏՈՒԹՅԱՆ

ՆԱԽԱՐԱՐՈՒԹՅԱՆ ԿՈՂՄԻՑ

12 հուլիսի 2005 թ.

ՊԵՏԱԿԱՆ ԳՐԱՆՑՄԱՆ ԹԻՎ 11205254

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՈՍՏԻԿԱՆՈՒԹՅԱՆ ՊԵՏ

28 հունիսի 2005 թ.

ք. Երևան N 6-Ն

Հ Ր Ա Մ Ա Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՈՍՏԻԿԱՆՈՒԹՅԱՆ ԾԱՌԱՅՈՂՆԵՐԻՆ, ԻՆՉՊԵՍ ՆԱԵՎ ՆՐԱՆՑ ԸՆՏԱՆԻՔԻ ԱՆԴԱՄՆԵՐԻՆ ԱՐՁԱԿՈՒՐԴԻ ՎԱՅՐ ՄԵԿՆԵԼԻՍ ԵՎ ԱՐՁԱԿՈՒՐԴԻՑ ՎԵՐԱԴԱՌՆԱԼԻՍ ՏՐԱՆՍՊՈՐՏԱՅԻՆ ԾԱԽՍԵՐԻ ՓՈԽՀԱՏՈՒՑՄԱՆ ՎՃԱՐՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Ի կատարումն Հայաստանի Հանրապետության կառավարության 2004 թվականի մայիսի 6-ի «Հայաստանի Հանրապետության տարածքում արձակուրդի անցկացման վայր մեկնելիս և արձակուրդից վերադառնալիս զինծառայողների, ինչպես նաև նրանց ընտանիքի անդամների` տրանսպորտից օգտվելու կարգը հաստատելու մասին» թիվ 886-Ն որոշմամբ հաստատված կարգի 4-րդ կետի`

ՀՐԱՄԱՅՈՒՄ ԵՄ`

1. Հաստատել` «Հայաստանի Հանրապետության ոստիկանության ծառայողներին, ինչպես նաև նրանց ուղեկցող ընտանիքի անդամներին արձակուրդի վայր մեկնելիս և արձակուրդից վերադառնալիս տրանսպորտային ծախսերի փոխհատուցման վճարման կարգը»` համաձայն հավելվածի:

2. Սույն հրամանն ուժի մեջ է մտնում պաշտոնական հրապարակման օրվան հաջորդող տասներորդ օրը:

Ոստիկանության

գեներալ-լեյտենանտ` Հ. Հարությունյան

Հավելված

ՀՀ ոստիկանության պետի

2005 թ. հունիսի 28-ի

թիվ 6-Ն հրամանով

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՈՍՏԻԿԱՆՈՒԹՅԱՆ ԾԱՌԱՅՈՂՆԵՐԻՆ, ԻՆՉՊԵՍ ՆԱԵՎ ՆՐԱՆՑ ՈՒՂԵԿՑՈՂ ԸՆՏԱՆԻՔԻ ԱՆԴԱՄՆԵՐԻՆ ԱՐՁԱԿՈՒՐԴԻ ՎԱՅՐ ՄԵԿՆԵԼԻՍ ԵՎ ԱՐՁԱԿՈՒՐԴԻՑ ՎԵՐԱԴԱՌՆԱԼԻՍ ՏՐԱՆՍՊՈՐՏԱՅԻՆ ԾԱԽՍԵՐԻ ՓՈԽՀԱՏՈՒՑՄԱՆ ՎՃԱՐՄԱՆ

1. Սույն կարգով սահմանվում է Հայաստանի Հանրապետության ոստիկանությունում ծառայողների, ինչպես նաև նրանց ուղեկցող ընտանիքի անդամների արձակուրդի վայր մեկնելու և վերադառնալու հետ կապված տրանսպորտային ծախսերի փոխհատուցման կարգը և պայմանները:

2. Ոստիկանության ծառայողների և նրանց ընտանիքների անդամների տրանսպորտային սպասարկման ծախսերը ֆինանսավորվում են Հայաստանի Հանրապետության պետական բյուջեից` ոստիկանությանն այդ նպատակով հատկացված միջոցների հաշվին, իսկ պայմանագրային հիմունքներով ծառայություններ իրականացնող ստորաբաժանումները` սեփական միջոցների հաշվին:

3. ՀՀ ոստիկանության ծառայողներին արձակուրդի վայր մեկնելիս և վերադառնալիս, Հայաստանի Հանրապետության տարածքում տարեկան մեկ անգամ (լրացուցիչ արձակուրդի դեպքում նաև մեկից ավելի) տրվում է տրանսպորտից օգտվելու ծախսերի փոխհատուցում, ՀՀ կառավարության 2004 թ. մայիսի 6-ի թիվ 886-Ն որոշմամբ հաստատված կարգի 3-րդ կետով սահմանված չափերով:

4. Ոստիկանության ծառայողին փոխհատուցումը տրվում է կանխավճարով կամ վերջնահաշվարկի ձևով, համաձայն ՀՀ կառավարության 2003 թ. հոկտեմբերի 8-ի թիվ 1408-Ն որոշմամբ սահմանված դրամարկղային գործառնությունների իրականացման կարգի:

5. Ոստիկանության ծառայողի կողմից մեկից ավելի արձակուրդի անցկացման վայր ընտրելու դեպքում փոխհատուցումը վճարվում է մեկ վայրի համար ծառայողի ցանկությամբ:

6. Ոստիկանության ծառայողի արձակուրդի մեկնման զեկուցագրում և արձակուրդի վկայականում նշվում է արձակուրդի անցկացման վայրը, ուղեկցող ընտանիքի անդամների թիվը և նրանց ծննդյան տարեթվերը:

7. Արձակուրդի վայր ժամանելուց ոստիկանության ծառայողի արձակուրդի վկայականում, համապատասխան ստորաբաժանումում կատարվում է ժամանման և մեկնման նշումներ:

8. Արձակուրդից վերադառնալիս ոստիկանության ծառայողը եռօրյա ժամկետում ֆինանսական ծառայությանը վճարման է ներկայացնում արձակուրդի վկայականը արձակուրդի վայրի նշումներով, ստորաբաժանման պետի «վճարել» մակագրության առկայությամբ:

Եթե արձակուրդից վերադառնալուց հետո ոստիկանության ծառայողը չի ներկայացնում արձակուրդի վկայականը, ապա փոխհատուցման վճարը պահվում է ոստիկանության ծառայողի վարձատրությունից: