ՀՀ ՆԱԽԱԳԱՀԻ ՀՐԱՄԱՆԱԳԻՐԸ ՀՀ ՆԵՐՔԻՆ ԳՈՐԾԵՐԻ ՆԱԽԱՐԱՐՈՒԹՅԱՆ ՀԱՄԱԿԱՐԳՈՒՄ ՆԵՐՔԻՆ ԶՈՐՔԵՐ ՍՏԵՂԾԵԼՈՒ ՄԱՍԻՆ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ

Հ Ր Ա Մ Ա Ն Ա Գ Ի Ր Ը

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԵՐՔԻՆ ԳՈՐԾԵՐԻ ՆԱԽԱՐԱՐՈՒԹՅԱՆ ՀԱՄԱԿԱՐԳՈՒՄ ՆԵՐՔԻՆ ԶՈՐՔԵՐ ՍՏԵՂԾԵԼՈՒ ՄԱՍԻՆ

Հայաստանի Հանրապետության տարածքում հասարակական կարգի, հատուկ նշանակության օբյեկտների պահպանման, բեռնափոխադրումների և հաղորդակցության ճանապարհների անվտանգության ապահովման, ինչպես նաև աղետների դեպքում փրկարար աշխատանքներ կատարելու նպատակով, որոշում եմ.

1. Հայաստանի Հանրապետության ներքին գործերի նախարարության համակարգում ստեղծել ներքին զորքեր:

2. Հայաստանի Հանրապետության ներքին գործերի նախարարության ներքին զորքերի անձնակազմում ծառայությունը հավասարեցնել Հայաստանի Հանրապետության զինված ուժերում ծառայությանը:

Հայաստանի Հանրապետության ներքին գործերի նախարարության ներքին զորքերը համալրել ժամկետային զինվորական ծառայության զորակոչված զորակոչիկներով:

3. Հայաստանի Հանրապետության ներքին գործերի նախարարության ներքին զորքերը ղեկավարելու նպատակով ստեղծել հատուկ կառուցվածք` իր նյութատեխնիկական և ռազմական մատակարարման համակարգով:

4. Սահմանել, որ Հայաստանի Հանրապետության ներքին գործերի նախարարության ներքին զորքերն իրենց գործունեությունն իրականացնում են հանրապետության բյուջեի միջոցների հաշվին:

5. Հայաստանի Հանրապետության կառավարությանը` ընդունել սույն հրամանագրի կիրարկումն ապահովող համապատասխան ակտեր և մինչև Հայաստանի Հանրապետության ներքին գործերի նախարարության ներքին զորքերի մասին համապատասխան օրենսդրական ակտերի ընդունումը հաստատել դրանց ժամանակավոր կանոնադրությունը:

6. Հայաստանի Հանրապետության զինվորական կոմիսարին` միջոցառումներ իրականացնել Հայաստանի Հանրապետության ներքին գործերի նախարարության ներկայացրած և Հայաստանի Հանրապետության պաշտպանության նախարարության հետ համաձայնեցված հայտերով գարնանային և աշնանային զորակոչերի ժամանակ ներքին զորքերը զորակոչիկներով համալրելու նպատակով:

7. Սույն հրամանագիրը ուժի մեջ է մտնում ստորագրման օրվանից:

Հայաստանի Հանրապետության Նախագահ Լ. Տեր-Պետրոսյան

Երևան

21 հունիսի 1992 թ.

ՆՀ-115