ՀՀ ԿԱՌԱՎԱՐՈՒԹՅԱՆՆ ԱՌԸՆԹԵՐ ՄԻԳՐԱՑԻԱՅԻ ԵՎ ՓԱԽՍՏԱԿԱՆՆԵՐԻ ՎԱՐՉՈՒԹՅԱՆ ՀՐԱՄԱՆԸ ՀՀ-ՈՒՄ ՔԱՂԱՔԱԿԱՆ ԱՊԱՍՏԱՆԻ ԻՐԱՎՈՒՆՔԻ ՎԿԱՅԱԿԱՆՆԵՐԻ ՀԱՇՎԱՌՈՒՄԸ, ԻՆՉՊԵՍ ՆԱԵՎ ՏՐՎԱԾ, ԱՆՎԱՎԵՐ ՃԱՆԱՉՎԱԾ, ՓՈԽԱՆԱԿՎԱԾ ԵՎ ՎԵՐԱԴԱՐՁՎԱԾ ՎԿԱՅԱԿԱՆՆԵՐԻ ԳՐԱՆՑԱՄԱՏՅԱՆՆԵՐԻ ՎԱՐՈՒՄՆ ԻՐԱԿԱՆԱՑՆԵԼՈՒ ԿԱՐԳԸ ՀԱՍՏԱՏԵԼՈՒ ՄԱՍԻՆ

«Գրանցված է»

ՀՀ արդարադատության

նախարարության կողմից

19 մայիսի 2003 թ.

Պետական գրանցման թիվ 32803172

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԱՌԱՎԱՐՈՒԹՅԱՆՆ ԱՌԸՆԹԵՐ ՄԻԳՐԱՑԻԱՅԻ ԵՎ ՓԱԽՍՏԱԿԱՆՆԵՐԻ ՎԱՐՉՈՒԹՅՈՒՆ

8 մայիսի 2003 թ.

ք. Երևան N Հր. 26-Ն

Հ Ր Ա Մ Ա Ն

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՔԱՂԱՔԱԿԱՆ ԱՊԱՍՏԱՆԻ ԻՐԱՎՈՒՆՔԻ ՎԿԱՅԱԿԱՆՆԵՐԻ ՀԱՇՎԱՌՈՒՄԸ, ԻՆՉՊԵՍ ՆԱԵՎ ՏՐՎԱԾ, ԱՆՎԱՎԵՐ ՃԱՆԱՉՎԱԾ, ՓՈԽԱՆԱԿՎԱԾ ԵՎ ՎԵՐԱԴԱՐՁՎԱԾ ՎԿԱՅԱԿԱՆՆԵՐԻ ԳՐԱՆՑԱՄԱՏՅԱՆՆԵՐԻ ՎԱՐՈՒՄՆ ԻՐԱԿԱՆԱՑՆԵԼՈՒ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության կառավարության 2003 թվականի մարտի 20-ի N 282-Ն որոշմամբ հաստատված՝ Հայաստանի Հանրապետությունում քաղաքական ապաստանի իրավունքի վկայական տալու կարգի 14-րդ կետի համաձայն

Հրամայում եմ՝

1. Հաստատել Հայաստանի Հանրապետությունում քաղաքական ապաստանի իրավունքի վկայականների հաշվառումը, ինչպես նաև տրված, անվավեր ճանաչված, փոխանակված և վերադարձված վկայականների գրանցամատյանների վարումն իրականացնելու կարգը` համաձայն հավելվածի:

2. Իրավաբանական և արտաքին կապերի վարչությանը` սահմանված կարգով փաստաթուղթը ներկայացնել պետական գրանցման` Հայաստանի Հանրապետության արդարադատության նախարարություն:

Վարչության պետ` Գ. Եգանյան

Հավելված

ՀՀ կառավարությանն առընթեր միգրացիայի և փախստականների վարչության պետի

2003 թ. մայիսի 8-ի N Հր. 26-Ն հրամանի

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՔԱՂԱՔԱԿԱՆ ԱՊԱՍՏԱՆԻ ԻՐԱՎՈՒՆՔԻ ՎԿԱՅԱԿԱՆՆԵՐԻ ՀԱՇՎԱՌՈՒՄԸ, ԻՆՉՊԵՍ ՆԱԵՎ ՏՐՎԱԾ, ԱՆՎԱՎԵՐ ՃԱՆԱՉՎԱԾ, ՓՈԽԱՆԱԿՎԱԾ ԵՎ ՎԵՐԱԴԱՐՁՎԱԾ ՎԿԱՅԱԿԱՆՆԵՐԻ ԳՐԱՆՑԱՄԱՏՅԱՆՆԵՐԻ ՎԱՐՈՒՄՆ ԻՐԱԿԱՆԱՑՆԵԼՈՒ ԿԱՐԳԸ ՀԱՍՏԱՏԵԼՈՒ ՄԱՍԻՆ

1. Սույն կարգը հաստատվել է Հայաստանի Հանրապետության կառավարության 2003 թվականի մարտի 20-ի N 282-Ն որոշմամբ հաստատված՝ Հայաստանի Հանրապետությունում քաղաքական ապաստանի իրավունքի վկայական տալու կարգի 14-րդ կետի համաձայն և սահմանում է Հայաստանի Հանրապետությունում քաղաքական ապաստանի իրավունքի վկայականների (այսուհետ` վկայական) հաշվառումը, ինչպես նաև տրված, անվավեր ճանաչված, փոխանակված և վերադարձված վկայականների գրանցամատյանների վարումն իրականացնելու կարգը:

2. Վկայականների հաշվառումը, ինչպես նաև տրված, անվավեր ճանաչված, փոխանակված և վերադարձված վկայականների գրանցամատյանների վարումն իրականացվում է Հայաստանի Հանրապետության կառավարությանն առընթեր միգրացիայի և փախստականների վարչության (այսուհետ` Վարչություն) աշխատակազմի իրավաբանական և արտաքին կապերի վարչության կողմից:

3. Գրանցամատյանների վարումն իրականացնելու համար Վարչության աշխատակազմի իրավաբանական և արտաքին կապերի վարչությունում պահվում են վկայականների հաշվառման, ինչպես նաև տրված, անվավեր ճանաչված, փոխանակված և վերադարձված վկայականների գրանցամատյաններ:

4. Գրանցամատյանների շապիկի վրա կատարվում է հետևյալ գրառումը. «Հայաստանի Հանրապետությունում քաղաքական ապաստանի իրավունքի վկայականների հաշվառման, ինչպես նաև տրված, անվավեր ճանաչված, փոխանակված և վերադարձված վկայականների գրանցամատյան»:

5. Գրանցամատյանում առանձնացվում են 12 սյունակներ, որտեղ նշվում են`

1. անուն, ազգանուն, հայրանուն.

2. ծննդավայր.

3. ծնվել է.

4. սեռ.

5. ազգություն.

6. քաղաքացիություն.

7. վկայականի տրման օր, ամիս, տարեթիվ.

8. ՀՀ-ում բնակության կամ հաշվառման վայր.

9. վկայականի սերիա և համար.

10. վկայականի տիրոջ ստորագրություն.

11. փոխանակված վկայականի համար և սերիա, տրման օր, ամիս, տարեթիվ և այն ստացողի ստորագրություն: Այս սյունակում կատարվում է նշում վկայականի փոխանակման հիմքերի վերաբերյալ.

12. վկայականը վերադարձնելու օր, ամիս, տարեթիվ: Այս սյունակում կատարվում է նշում վկայականի վերադարձման հիմքերի մասին:

6. Գրանցամատյանի էջերը համարակալվում են ըստ հերթականության: Գրանցամատյանը կարվում է և կնքվում Վարչության կլոր կնիքով:

7. Գրանցամատյանը ծառայողական օգտագործման փաստաթուղթ է: Գրանցամատյանների վարումն իրականացվում է միայն Վարչության աշխատակազմի իրավաբանական և արտաքին կապերի վարչության քաղաքացիական ծառայողների կողմից: Արգելվում է Վարչության աշխատակազմի կառուցվածքային այլ ստորաբաժանումների քաղաքացիական ծառայողների կամ այլ անձանց կողմից գրանցամատյանին ծանոթանալը, դրանից գրառումներ, նշումներ, պատճենահանումներ, քաղվածքներ կատարելը կամ գրանցամատյանից այլ տեղեկություններ ձեռք բերելը:

8. Գրանցամատյանում առկա տվյալները Վարչության աշխատակազմի իրավաբանական և արտաքին կապերի վարչության կողմից Վարչության այլ աշխատակիցներին կամ այլ անձանց կարող են տրամադրվել միայն Վարչության պետի, նրա տեղակալների կամ Վարչության աշխատակազմի ղեկավարի հանձնարարությամբ:

9. Գրանցամատյանը պահվում է չհրկիզվող պահարանում:

10. Լրացված գրանցամատյանները արխիվացվում են Հայաստանի Հանրապետության օրենսդրությամբ սահմանված կարգով: