Հ Ա Մ Ա Ձ Ա Յ Ն Ա Գ Ի Ր
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՊԻ ՆԱԽԱՐԱՐՈՒԹՅԱՆ ԵՎ ՌՈՒՍԱՍՏԱՆԻ ԴԱՇՆՈՒԹՅԱՆ ԿԱՊԻ ՆԱԽԱՐԱՐՈՒԹՅԱՆ ՄԻՋԵՎ ԷԼԵԿՏՐԱԿԱՆ ԵՎ ՓՈՍՏԱՅԻՆ ԿԱՊԻ ԱՍՊԱՐԵԶՈՒՄ ՀԱՄԱԳՈՐԾԱԿՑՈՒԹՅԱՆ ՄԱՍԻՆ
Հայաստանի Հանրապետության կապի նախարարությունը և Ռուսաստանի Դաշնության կապի նախարարությունը, այսուհետ` Կողմեր,
համաձայն Հայաստանի Հանրապետության կառավարության և Ռուսաստանի Դաշնության կառավարության միջև` Կապի հարցերով համագործակցելու մասին 1993 թվականի հուլիսի 1-ի Համաձայնագրի,
համարելով, որ կապի ասպարեզում փոխներգործությունը և համագործակցությունը պետք է զարգանան բարյացակամության և փոխօգնության հիման վրա,
հենվելով բարիդրացիական ավանդույթների վրա և ձգտելով դրանց հետագա զարգացմանը,
կամենալով հաստատել իրավական, տնտեսական և տեխնոլոգիական սերտ կապեր, Կողմերի միջև կապի միջոցների անխափան գործունեության ապահովման համար,
պայմանավորվեցին ներքոհիշյալի մասին.
ՀՈԴՎԱԾ 1
Կողմերը, գործելով սեփական լիազորությունների և հնարավորությունների ծավալում, համաձայն Հայաստանի Հանրապետության և Ռուսաստանի Դաշնության օրենքների պահանջների, կշարունակեն և կընդլայնեն համագործակցությունը փոստային կապի հեռուստահաղորդակցության, ռադիոյի և հեռուստատեսության, արբանյակային համակարգերի, մամուլի տարածման ասպարեզում:
ՀՈԴՎԱԾ 2
Կողմերը իրենց հարաբերությունները կկառուցեն Համաշխարհային փոստային միության ակտերի դրույթներին և Էլեկտրակապի միջազգային միության երաշխավորություններին խստիվ համապատասխան, որոնք կանոնակարգում են հարաբերությունները պետությունների և դրանց կապի վարչությունների, այդ միությունների անդամների միջև, ինչպես նաև` երկկողմ համաձայնագրերով և պայմանագրերով:
ՀՈԴՎԱԾ 3
Կողմերը, փոստային և էլեկտրական կապի, ինչպես նաև կապի ծառայությունների համար փոխադարձ հաշվարկների կարգի մեջ բոլոր փոփոխությունների մասին պետք է միմյանց հայտնեն փոփոխությունների ենթադրվող օրվանից 3 ամիս առաջ:
Կողմերը երաշխավորում են բոլոր տեսակների փոստային առաքումների և հատուկ կապի, էլեկտրակապի ցանցերով հաղորդումների, ռադիո և հեռուստատեսային ծրագրերի ազատ տարանցումն իրենց տարածքներով:
Էլեկտրակապի ցանցերով հաղորդագրությունների տարանցման բաց թողնելու կարգը որոշվում է հետագայում` առանձին համաձայնագրով:
ՀՈԴՎԱԾ 4
Կողմերը միմյանց դեմ չեն կիրառի խտրական միջոցներ, որոնք կխոչընդոտեն կամ կբարդացնեն Կողմերի կապի վարչությունների գործունեությունը երրորդ երկրներում և միջազգային կազմակերպություններում:
ՀՈԴՎԱԾ 5
Կողմերը միմյանց աջակցություն կցուցաբերեն` մյուս Կողմի ռադիո և հեռուստատեսային ծրագրերի և պարբերական մամուլի բաժանորդագրմամբ տարածմանը և մանրածախ առևտրի կազմակերպմանը իր պետության տարածքում, Կողմերի կառավարությունների կամ նրանց համապատասխան գերատեսչությունների միջև և պայմանագրերով սահմանված ծավալներով:
ՀՈԴՎԱԾ 6
Կողմերը կաջակցեն Հայաստանի Հանրապետության և Ռուսաստանի Դաշնության կապի ձեռնարկությունների վարչություններին` կնքելու փոխհամագործակցությունների, փոխծառայությունների և փոխհաշվարկների մասին փոխադարձ ուղիղ պայմանագրեր:
ՀՈԴՎԱԾ 7
Կողմերի կապի ծառայություններ տրամադրող բոլոր մասնակից ձեռնարկությունները սպառողի առաջ կրում են հավասար պատասխանատվություն` ժամանակին և որակյալ սպասարկման համար: Միջազգային էլեկտրակապի անորակ աշխատանքի համար բողոքների քննարկման կարգը որոշվում է առանձին փաստաթղթով:
ՀՈԴՎԱԾ 8
Կողմերը պայմանավորվեցին կապի ձեռնարկությունների հեռախոսավարների, հեռագրիչների, տեխանձնակազմի, փոստի աշխատողների միջև ծառայողական տեղեկության, ինչպես նաև ծառայողական փաստաթղթերի փոխանակման համար օգտագործել ռուսաց լեզուն: Կողմերի երկրների միջև ուղարկվող փոստային առաքումների և հեռագրերի հասցեները լրացվում են ռուսերենով:
ՀՈԴՎԱԾ 9
Կողմերը միջպետական հաղորդագրությունների և տեղեկությունների հաղորդման տեխնոլոգիական գործընթացներում կապի ձեռնարկություններում օգտագործում են մեկ ընդհանուր հաշվարկահաշվետվային ժամանակ` «Մոսկովյան»:
ՀՈԴՎԱԾ 10
Կողմերը ցուցաբերում են փոխադարձ աջակցություն միջազգային հեռախոսահեռագրական և փոստային փոխանակումների մշակման, ինչպես նաև հատուկ դրություններում ֆելդյեգերական և հատուկ կապի կազմակերպման հարցերում:
ՀՈԴՎԱԾ 11
Կողմերը փոխադարձ աջակցություն են ցուցաբերում տարերային աղետների և արտակարգ իրավիճակների դեպքում առաջացած էլեկտրական և փոստային կապի միջոցների վնասվածքների վերականգնման գործում:
ՀՈԴՎԱԾ 12
Կողմերը որոշեցին, որ կապի ասպարեզում հարաբերություններից ծագած վեճերը ենթադասվում են միջնորդ դատարաններին, եթե դա նախատեսվում է Կողմերի պետությունների միջև համաձայնագրերով: Կողմերի երկրների միջև համաձայնագրերում այդ հարցի լուծման բացակայության դեպքում Կողմերի կապի ձեռնարկությունները վեճերի ենթադասությունը որոշում են ինքնուրույն` կնքվող պայմանագրերով:
ՀՈԴՎԱԾ 13
Կողմերի համաձայնությամբ սույն Համաձայնագիրը կարող է փոփոխվել կամ լրացվել:
ՀՈԴՎԱԾ 14
Սույն Համաձայնագիրն ուժի մեջ է մտնում այն ստորագրելու օրվանից և գործում է մինչև 1994 թվականի դեկտեմբերի 31-ը:
Հետագայում, եթե Կողմերից ոչ մեկը մինչև Համաձայնագրի գործողության ավարտման տարվանից հետո գալիք տարվա հունվարի 1-ը տեղյակ չպահի մյուս Կողմին սույն Համաձայնագրի փոփոխությունների, լրացումների և լուծման մասին, դրա գործողությունն ինքնաբերաբար կերկարաձգվի` ամեն անգամ` երեքամյա ժամկետով:
Կնքված է Մոսկվա քաղաքում 1993 թվականի հուլիսի 1-ին, երկու բնօրինակով, յուրաքանչյուրը` հայերեն և ռուսերեն, ընդ որում երկու տեքստերն էլ ունեն հավասար ուժ:
Համաձայնագիրն ուժի մեջ է մտել 1993 թվականի հուլիսի 1-ից: