ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
1 ապրիլի 1993 թ. N 141
Քաղ. Երևան
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԺԱՄԱՆԱԿԱՎՈՐԱՊԵՍ ԲՆԱԿՎՈՂ ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ՄԱՐՏԱԿԵՐՏԻ ՇՐՋԱՆԻ ՔԱՂԱՔԱՑԻՆԵՐԻՆ ԻՐԵՆՑ ՄՇՏԱԿԱՆ ԲՆԱԿՈՒԹՅԱՆ ՎԱՅՐԵՐԸ ՎԵՐԱԴԱՐՁՆԵԼՈՒ ԵՎ ՍՈՑԻԱԼ-ԿԵՆՑԱՂԱՅԻՆ ՀՐԱՏԱՊ ՀԱՐՑԵՐԻ ԼՈՒԾՄԱՆ ՄԻՋՈՑԱՌՈՒՄՆԵՐԻ ՄԱՍԻՆ
Հայաստանի Հանրապետության կառավարությունը նշում է, որ Լեռնային Ղարաբաղի Հանրապետության Մարտակերտի շրջանից Հայաստանի Հանրապետություն բռնագաղթած քաղաքացիների գերակշռող մասը ցանկություն է հայտնել վերադառնալու իրենց մշտական բնակության վայրերը: Ընդառաջելով նրանց ցանկությանը և ելնելով մշտական բնակության վայրերում Հայաստանի Հանրապետությունից վերադարձողների համար սոցիալ-տնտեսական բավարար պայմաններ ստեղծելու անհրաժեշտությունից, Հայաստանի Հանրապետության կառավարությունը որոշում է.
1. Հայաստանի Հանրապետության փախստականների հարցերի պետական վարչությանը և հատուկ ծրագրերի պետական վարչությանը` կազմակերպել Լեռնային Ղարաբաղի Հանրապետության Մարտակերտի շրջանից Հայաստանի Հանրապետությունում ժամանակավորապես բնակվող քաղաքացիների վերադարձը իրենց մշտական բնակության վայրերը:
2. Հայաստանի Հանրապետության տրանսպորտի և հաղորդակցության նախարարությանը` Հայաստանի Հանրապետության փախստականների հարցերի պետական վարչության հայտերով անհրաժեշտ թվով ավտոբուսներ հատկացնել Լեռնային Ղարաբաղի Հանրապետության Մարտակերտի շրջանից բռնագաղթածներին իրենց մշտական բնակության վայրերը տեղափոխելու համար:
3. Հայաստանի Հանրապետության ֆինանսների նախարարությանը` Հայաստանի Հանրապետության փախստականների հարցերի պետական վարչությանը հատկացնել անհրաժեշտ միջոցներ` Լեռնային Ղարաբաղի Հանրապետության Մարտակերտի շրջանից բռնագաղթածներին իրենց մշտական բնակության վայրերը տեղափոխման հետ կապված տրանսպորտային ծախսերի վճարման համար:
4. Հայաստանի Հանրապետության նյութական ռեսուրսների նախարարությանը և «Հայագրոսպասարկում» հանրապետական արտադրական միավորմանը` մեկամսյա ժամկետում Լեռնային Ղարաբաղի Հանրապետության պետական պաշտպանության կոմիտեին հատկացնել անհրաժեշտ կենցաղային և տնտեսական իրեր, համաձայն N 1 հավելվածի*), Մարտակերտի շրջանից բռնագաղթածների սոցիալ-կենցաղային կարիքները հոգալու համար:
5. Հայաստանի Հանրապետության գյուղատնտեսության նախարարությանը՝ 10-օրյա ժամկետում Լեռնային Ղարաբաղի Հանրապետության գյուղատնտեսության նախարարության հայտերով կենտրոնացված կարգով հատկացնել նրան գարնան գյուղատնտեսական աշխատանքների հաջող կազմակերպման համար անհրաժեշտ նյութատեխնիկական միջոցներ, որից՝ Լեռնային Ղարաբաղի Հանրապետության Մարտակերտի շրջանից բռնագաղթածներին՝ համաձայն N 2 հավելվածի:
6. Հայաստանի Հանրապետության նյութական ռեսուրսների նախարարությանը` Հայաստանի Հանրապետության հատուկ ծրագրերի պետական վարչության հետ համատեղ ապահովել Լեռնային Ղարաբաղի Հանրապետության Մարտակերտի շրջանից բռնագաղթածներին հատկացված կենցաղային և տնտեսական իրերի փոխադրումը:
7. Հայաստանի Հանրապետության ներքին գործերի նախարարությանը և արդարադատության նախարարությանը` անհրաժեշտ աջակցություն և նյութական օգնություն ցույց տալ Լեռնային Ղարաբաղի Հանրապետության ներքին գործերի նախարարությանը և Լեռնային Ղարաբաղի Հանրապետության Նախարարների խորհրդի արդարադատության վարչությանը` ժամանակավորապես տեղահանված բնակչության անձնագրերն ու մյուս փաստաթղթերը վերականգնելու աշխատանքներում:
8. Պատգամավորների շրջանային (քաղաքային) խորհուրդների գործադիր կոմիտեներին` ապահովել Լեռնային Ղարաբաղի Հանրապետության Մարտակերտի շրջանի ազատագրված բնակավայրերի վերականգնմանն ուղղված անհրաժեշտ օգնությունը, համաձայն N 3 հավելվածի ամրակցումների:
9. Հայաստանի Հանրապետության փախստականների հարցերի պետական վարչությանը և հատուկ ծրագրերի պետական վարչությանը` մեկամսյա ժամկետում սույն որոշման կատարման ընթացքի վերաբերյալ անհրաժեշտ տեղեկատվություն ներկայացնել Հայաստանի Հանրապետության կառավարություն:
________
*) Հավելվածները չեն բերվում:
Հայաստանի Հանրապետության
վարչապետ Հ. ԲԱԳՐԱՏյան
Հայաստանի Հանրապետության
ԿԱՌԱՎԱՐՈՒԹՅԱՆ ԳՈՐԾԵՐԻ
ԿԱՌԱՎԱՐԻՉ Ա. ԽԱՉԱՏՐՅԱՆ