«Վավերացնում եմ»
Հայաստանի Հանրապետության
Նախագահ Ռ. Քոչարյան
5 մայիսի 2006 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
27 ապրիլի 2006 թվականի N 552-Ա
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԱՇՏՊԱՆՈՒԹՅԱՆ ՆԱԽԱՐԱՐՈՒԹՅԱՆԸ ԳՈՒՅՔ ՀԱՆՁՆԵԼՈՒ ՄԱՍԻՆ
«Բաժնետիրական ընկերությունների մասին» Հայաստանի Հանրապետության օրենքի 68-րդ հոդվածի 7-րդ կետին համապատասխան` Հայաստանի Հանրապետության կառավարությունը որոշում է.
1. Երևանի քաղաքապետարանի «Սուրբ Գրիգոր Լուսավորիչ» բժշկական կենտրոն» փակ բաժնետիրական ընկերության գույքի կազմից սահմանված կարգով առանձնացնել Երևանի Մոլդովական փողոցի N 41 հասցեում գտնվող` 4260.0 քառ. մետր մակերեսով, 50367.8 հազ. դրամ հաշվեկշռային արժեքով 2 մասնաշենքը և հանձնել Հայաստանի Հանրապետության պաշտպանության նախարարության տնօրինությանը` բաժնետոմսերի հետգնման և մարման ճանապարհով` համապատասխան չափով նվազեցնելով ընկերության կանոնադրական կապիտալը:
2. Երևանի քաղաքապետին և Հայաստանի Հանրապետության պաշտպանության նախարարին` մեկամսյա ժամկետում սահմանված կարգով ապահովել սույն որոշման 1-ին կետում նշված մասնաշենքերի հանձնման-ընդունման աշխատանքների կատարումը և գույքային իրավունքների պետական գրանցումը:
3. Սահմանել, որ`
ա) սույն որոշման 1-ին կետում նշված մասնաշենքերի գույքային իրավունքների պետական գրանցումն իրականացվելու է Հայաստանի Հանրապետության պաշտպանության նախարարության միջոցների հաշվին.
բ) մասնաշենքերի առանձնացման արդյունքում առաջացող ավելացված արժեքի հարկի գումարի վճարումն իրականացվելու է «Հայաստանի Հանրապետության 2006 թվականի պետական բյուջեի մասին» Հայաստանի Հանրապետության օրենքի 9-րդ հոդվածի 12-րդ մասով սահմանված կարգով:
Հայաստանի Հանրապետության
վարչապետ Ա. Մարգարյան
2006 թ. մայիսի 4
Երևան