ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱԶԳԱՅԻՆ ԺՈՂՈՎԻ
Ո Ր Ո Շ ՈՒ Մ Ը
ԵՎՐՈՊԱԿԱՆ ԿԱՌՈՒՅՑՆԵՐԻՆ ԻՆՏԵԳՐՄԱՆ ՀԱՐՑԵՐՈՎ ԱԶԳԱՅԻՆ ԺՈՂՈՎԻ ԺԱՄԱՆԱԿԱՎՈՐ ՀԱՆՁՆԱԺՈՂՈՎ ՍՏԵՂԾԵԼՈՒ ՄԱՍԻՆ
Ղեկավարվելով Հայաստանի Հանրապետության Սահմանադրության 73-րդ և «Ազգային ժողովի կանոնակարգ» Հայաստանի Հանրապետության օրենքի 22-րդ և 52-րդ հոդվածներով`
Հայաստանի Հանրապետության Ազգային ժողովը որոշում է.
1. Եվրոպական կառույցներին (Եվրոպայի խորհուրդ, Եվրոպական միություն) Հայաստանի Հանրապետության ինտեգրման գործընթացը, անդամակցության արդյունքում ստանձնած պարտավորությունների կատարման ընթացքը և եվրոպական չափանիշներին ազգային օրենսդրության ներդաշնակեցման խնդիրներն ուսումնասիրելու, այդ հարցերին առնչվող օրենսդրական նախաձեռնությունները քննարկելու և Ազգային ժողով եզրակացություն ներկայացնելու նպատակով ստեղծել Ազգային ժողովի ժամանակավոր հանձնաժողով (այսուհետ` Հանձնաժողով):
2. Հանձնաժողովի խնդիրներն են`
- Ազգային ժողովի որոշումների, օրենքների նախագծերի և այլ առաջարկությունների նախնական քննարկում և դրանց վերաբերյալ եզրակացության ներկայացում Ազգային ժողով.
- իրադարձությունների և փաստերի վերաբերյալ եզրակացությունների և տեղեկանքների ներկայացում Ազգային ժողով:
3. Հանձնաժողովն իրավասու է հարցումներով դիմել համապատասխան մարմիններ (կազմակերպություններ), որոնք հնարավորինս սեղմ ժամկետում պետք է տրամադրեն անհրաժեշտ տեղեկատվություն:
4. Հանձնաժողովն իր առջև դրված խնդիրներն իրականացնելիս իրավասու է ներգրավել համապատասխան մասնագետների, փորձագետների:
5. Հանձնաժողովն ստեղծել հետևյալ կազմով. ՀՀԿ խմբակցությունից երկու պատգամավոր, մեկական պատգամավոր մյուս խմբակցություններից, պատգամավորական խմբերից և դրանց կազմում չընդգրկված պատգամավորներից:
6. Պատգամավորները Հանձնաժողովի կազմում ընդգրկվում են համապատասխան խմբակցության, պատգամավորական խմբի ղեկավարի ներկայացմամբ:
7. Հանձնաժողովի կազմում ընդգրկելու համար խմբակցության կամ պատգամավորական խմբի կազմում չընդգրկված պատգամավորների թեկնածուին առաջադրում են պատգամավորներին Ազգային ժողովի նիստում: Ընտրված է համարվում այն պատգամավորը, որն էլեկտրոնային համակարգի միջոցով կազմակերպված քվեարկությամբ ստանում է առավել շատ ձայներ:
8. Հանձնաժողովն իր կազմից ընտրում է նախագահ և տեղակալ:
9. Հանձնաժողովի նիստն իրավազոր է, եթե դրան ներկա է անդամների կեսից ավելին: Հանձնաժողովի որոշումներն ընդունվում են նիստին ներկա անդամների ձայների մեծամասնությամբ:
10. Ազգային ժողովի աշխատակազմն ապահովում է հանձնաժողովի իրավաբանական կազմակերպչական, փաստաթղթային, վերլուծական, տեղեկատվական, ֆինանսատնտեսական և նյութատեխնիկական գործունեությունը:
11. Հանձնաժողովն իր գործունեության արդյունքների մասին Ազգային ժողովին զեկուցում է մինչև 2004 թվականի հոկտեմբերի 1-ը: Մինչ այդ Հանձնաժողովն իր նախաձեռնությամբ Ազգային ժողովի նիստում կարող է հանդես գալ հաղորդումներով:
Հայաստանի Հանրապետության
Ազգային ժողովի նախագահ Ա. Բաղդասարյան
9 սեպտեմբերի 2003 թվականի,
քաղ. Երևան
Ն-012-3