ՀՀ ԿԱՌԱՎԱՐՈՒԹՅԱՆՆ ԱՌԸՆԹԵՐ ՀԱՐԿԱՅԻՆ ՊԵՏԱԿԱՆ ԾԱՌԱՅՈՒԹՅԱՆ ՊԵՏԻ ՀՐԱՄԱՆԸ ՀԱՐԿԱՅԻՆ ՄԱՐՄՆԻ ԳԱՆԳԱՏԱՐԿՄԱՆ ՀԱՆՁՆԱԺՈՂՈՎԻ ԱՆԴԱՄՆԵՐԻ ԹԵԿՆԱԾՈՒՆԵՐԻ ԱՌԱՋԱՐԿՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

«Գրանցված է»

ՀՀ արդարադատության

նախարարության կողմից

16 հունիսի 2008 թ.

Պետական գրանցման թիվ 12408189

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԱՌԱՎԱՐՈՒԹՅԱՆՆ ԱՌԸՆԹԵՐ ՀԱՐԿԱՅԻՆ ՊԵՏԱԿԱՆ ԾԱՌԱՅՈՒԹՅԱՆ ՊԵՏ

6 հունիսի 2008 թ.

ք. Երևան N 06-Ն

Հ Ր Ա Մ Ա Ն

ՀԱՐԿԱՅԻՆ ՄԱՐՄՆԻ ԳԱՆԳԱՏԱՐԿՄԱՆ ՀԱՆՁՆԱԺՈՂՈՎԻ ԱՆԴԱՄՆԵՐԻ ԹԵԿՆԱԾՈՒՆԵՐԻ ԱՌԱՋԱՐԿՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

Հիմք ընդունելով Հայաստանի Հանրապետության կառավարության 2002թ. նոյեմբերի 21-ի «Հայաստանի Հանրապետության կառավարությանն առընթեր հարկային պետական ծառայության կանոնադրությունը և աշխատակազմի կառուցվածքը հաստատելու մասին» թիվ 1926-Ն որոշմամբ հաստատված կանոնադրության 29-րդ կետի «գ» ենթակետը`

ՀՐԱՄԱՅՈՒՄ ԵՄ`

Սահմանել հարկային մարմնի գանգատարկման հանձնաժողովի անդամների թեկնածուների առաջարկման կարգը` համաձայն հավելվածի:

Վ. Բարսեղյան

Հավելված

ՀՀ կառավարությանն առընթեր

հարկային պետական ծառայության պետի

2008 թ. հունիսի 6-ի N 06-Ն հրամանի

Կ Ա Ր Գ

ՀԱՐԿԱՅԻՆ ՄԱՐՄՆԻ ԳԱՆԳԱՏԱՐԿՄԱՆ ՀԱՆՁՆԱԺՈՂՈՎԻ ԱՆԴԱՄՆԵՐԻ ԹԵԿՆԱԾՈՒՆԵՐԻ ԱՌԱՋԱՐԿՄԱՆ

1. Սույն կարգով կանոնակարգվում է հարկային մարմնի գանգատարկման հանձնաժողովի (այսուհետ` Գանգատարկման հանձնաժողով) անդամների թեկնածուների առաջարկման կարգը:

2. Գանգատարկման հանձնաժողովի անհատական կազմը հաստատում է հարկային մարմնի ղեկավարը` հարկային ծառայության վերադաս հարկային մարմնի համապատասխան կառուցվածքային ստորաբաժանումների ղեկավարների կողմից առաջարկված թեկնածուներից` պահպանելով հետևյալ համամասնությունները`

1) 4 իրավաբան անդամ` առաջարկված իրավաբանական վարչության պետի կողմից,

2) 1 անդամ` առաջարկված հարկային վարչարարության ռազմավարության և պլանավորման վարչության պետի կողմից,

3) 1 անդամ` առաջարկված հարկային վարչարարության կատարելագործման վարչության պետի կողմից,

4) 1 անդամ` առաջարկված oպերատիվ-հետախուզության վարչության պետի կողմից,

5) 1 անդամ` առաջարկված Հարկային տեսչությունների աշխատանքների համակարգման վարչության պետի կողմից:

Գանգատարկման հանձնաժողովի նախագահը նշանակվում է հարկային մարմնի ղեկավարի կողմից` հարկային մարմնի ղեկավարի տեղակալների թվից:

Գանգատարկման հանձնաժողովն ունի քարտուղար, որը չի հանդիսանում Գանգատարկման հանձնաժողովի անդամ:

(2-րդ կետը փոփ. 22.07.08 N 09-Ն)

3. Սույն կարգի 2-րդ կետի «ա»-ից «դ» ենթակետերով սահմանված կարգով առաջարկվող անձինք`

1) պետք է ունենան հարկային ծառայության առնվազն երեք տարվա անընդմեջ աշխատանքային ստաժ կամ իրենց մասնագիտական ոլորտում գիտական աստիճան և մեկ տարվա մասնագիտական աշխատանքի ստաժ,

2) նշանակման ժամկետին նախորդող երկու տարվա ընթացքում չպետք է ենթարկված լինեն կարգապահական պատասխանատվության:

4. Սույն կարգի 2-րդ կետում նշված վերադաս հարկային մարմնի համապատասխան ստորաբաժանումների ղեկավարները հարկային մարմնի ղեկավարին ներկայացնում են առաջարկություն Գանգատարկման հանձնաժողովի անդամի թեկնածուի վերաբերյալ` համապատասխան անդամի համար նախատեսված ժամկետը լրանալուց մեկ շաբաթ առաջ:

Գանգատարկման հանձնաժողովի անդամը, բացառությամբ Գանգատարկման հանձնաժողովի նախագահի, նշանակվում է 2 տարի ժամկետով:

Առաջին անգամ Գանգատարկման հանձնաժողովի անդամները նշանակվում են հետևյալ համամասնությամբ`

1) իրավաբանական վարչության պետի կողմից առաջարկված 2 իրավաբան անդամ` 2 տարի ժամկետով,

2) հարկային վարչարարության ռազմավարության և պլանավորման վարչության պետի կողմից առաջարկված 1 անդամ` 2 տարի ժամկետով,

3) Հարկային տեսչությունների աշխատանքների համակարգման վարչության պետի կողմից առաջարկված 1 անդամ` 2 տարի ժամկետով,

4) իրավաբանական վարչության պետի կողմից առաջարկված 2 իրավաբան անդամ` 1 տարի ժամկետով,

5) հարկ վճարողների սպասարկման, տվյալների մշակման և հարկման ընթացակարգերի վարչության պետի կողմից առաջարկված 1 անդամ` 1 տարի ժամկետով,

6) oպերատիվ-հետախուզության վարչության պետի կողմից առաջարկված 1 անդամ` 1 տարի ժամկետով:

(4-րդ կետը փոփ. 22.07.08 N 09-Ն)

5. Սույն կարգի 4-րդ կետում նշված առաջարկություններին կցվում են Գանգատարկման հանձնաժողովի անդամի թեկնածուի ծառայողական բնութագիրը, որը պետք է ներառի թեկնածուի կողմից հարկային oրենսդրության ու հարկային ծառայության մարմնի կառուցվածքային ստորաբաժանումների գործառույթների իմացության գնահատականը:

6. Նախքան սույն կարգի 4-րդ կետով նախատեսված ժամկետը լրանալը` հարկային մարնի ղեկավարը Գանգատարկման հանձնաժողովի նոր անդամ է նշանակում գործող անդամի հարկային ծառայության պաշտոնից ազատվելու կամ այլ ստորաբաժանում տեղափոխվելու, ինչպես նաև կարգապահական պատասխանատվության ենթարկվելու դեպքերում: Ծառայողական անհրաժեշտությունից ելնելով, համապատասխան ստորաբաժանման ղեկավարի հիմնավորմամբ, հարկային ծառայության Գանգատարկման հանձնաժողովի անդամը հարկային մարմնի ղեկավարի կողմից կարող է փոխարինվել նույն ստորաբաժանման վերոնշյալ կարգով սահմանված պահանջների բավարարող մեկ այլ հարկային ծառայողով:

7. Սույն կարգի 6-րդ կետով սահմանված դեպքերում Գանգատարկման հանձնաժողովի նոր անդամի թեկնածությունն առաջարկվում է սույն կարգով` նախկին անդամի պաշտոնավարման չլրացած ժամկետով: