ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
21 դեկտեմբերի 1992 թվականի N 632
քաղ. Երևան
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՏՈՒԲԵՐԿՈՒԼՈԶ ՀԻՎԱՆԴՈՒԹՅԱՆ ԴԵՄ ՊԱՅՔԱՐԻ ՄԻՋՈՑԱՌՈՒՄՆԵՐԻ ՄԱՍԻՆ
Հաշվի առնելով հանրապետությունում վերջին տարիներին նկատվող տուբերկուլոզ հիվանդության աճը և այդ ոլորտում աշխատողների սոցիալ-տնտեսական ծանր վիճակը, Հայաստանի Հանրապետության կառավարությունը որոշում է`
1. Հայաստանի Հանրապետության առողջապահության նախարարությանը` երեքամսյա ժամկետում մշակել և Հայաստանի Հանրապետության կառավարություն ներկայացնել հակատուբերկուլոզային միջոցառումների ազգային ծրագիր:
2. Տուբերկուլոզային (հակատուբերկուլոզային) բուժկանխարգելիչ հիմնարկների, առողջարանների, կաբինետների և այլ ստորաբաժանումների աշխատողների ամենամյա արձակուրդը սահմանել 30 աշխատանքային օր, իսկ աշխատաժամանակի տևողությունը` օրական 5 ժամ:
3. Տուբերկուլոզային (հակատուբերկուլոզային) բուժկանխարգելիչ հիմնարկների, առողջարանների, կաբինետների և այլ ստորաբաժանումների բուժաշխատողների աշխատավարձը բարձրացնել 50 տոկոսով, իսկ սպասարկող անձնակազմի աշխատավարձը` 40 տոկոսով:
Նշված աշխատավարձի չափի բարձրացումը տարածել նաև պոլիկլինիկաների ֆլյուորոգրաֆիկ կաբինետների բուժաշխատողների վրա:
4. Հայաստանի Հանրապետության ֆինանսների նախարարությանը` ՀՀ առողջապահության նախարարությանը հատկացնել լրացուցիչ միջոցներ` Աբովյան քաղաքում գտնվող հանրապետական հակատուբերկուլոզային դիսպանսերի այլ բնակավայրերում բնակվող աշխատողների ուղեվարձի փոխհատուցման համար:
5. Հայաստանի Հանրապետության փախստականների հարցերի պետական վարչությանը` ձեռք առնել անհրաժեշտ միջոցներ ՀՀ առողջապահության նախարարության Դիլիջանի հակատուբերկուլոզային առողջարանը մինչև 1993 թվականի ապրիլի 1-ը փախստականներից ազատելու համար:
6. Հայաստանի Հանրապետության առողջապահության նախարարությանը` մինչև 1993 թվականի մայիսի 30-ը Դիլիջանի հակատուբերկուլոզային առողջարանում կատարել անհրաժեշտ վերանորոգման աշխատանքներ:
7. Հայաստանի Հանրապետության շինարարության նախարարությանը` ձեռնարկել միջոցներ ավարտելու Աբովյան քաղաքում գտնվող հանրապետական հակատուբերկուլոզային դիսպանսերի վերանորոգման աշխատանքները:
Հայաստանի Հանրապետության վարչապետ Խ. Հարությունյան
ՀԱՅԱՍՏԱՆի հանրապետության կԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐՉԻ ՊԱՇՏՈՆԱԿԱՏԱՐ Հ. ՔՈԹԱՆՅԱՆ