ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
30 հունվարի 1995 թվականի N 45
քաղ. Երևան
ՀԱՅԱՍՏԱՆՈՒՄ` ՖԱՇԻԶՄԻ ԴԵՄ ՏԱՐԱԾ ՀԱՂԹԱՆԱԿԻ 50-ԱՄՅԱԿԻ ՏՈՆԱԿԱՏԱՐՈՒԹՅԱՆ ՄԻՋՈՑԱՌՈՒՄՆԵՐԻ ԾՐԱԳԻՐԸ ՀԱՍՏԱՏԵԼՈՒ ՄԱՍԻՆ
Ի կատարումն Հայաստանի Հանրապետության նախագահի 1994 թվականի նոյեմբերի 5-ի «Ֆաշիզմի դեմ տարած հաղթանակի 50-ամյակի տոնակատարության մասին» հրամանագրի, Հայաստանի Հանրապետության կառավարությունը որոշում է`
1. Ֆաշիզմի դեմ տարած հաղթանակի 50-ամյակի տոնակատարության հետ կապված միջոցառումների կազմակերպման և կոորդինացման նպատակով ստեղծել կառավարական հանձնաժողով և հաստատել նրա անհատական կազմը, համաձայն հավելվածի:
2. Կառավարական հանձնաժողովին`
ա) ապահովել ԱՊՀ անդամ պետությունների ղեկավարների 1993 թվականի սեպտեմբերի 24-ի «1941-1945 թթ. Հայրենական մեծ պատերազմում հաղթանակի 50-ամյակի տոնակատարության նախապատրաստման մասին» որոշմամբ նախատեսված` Ֆաշիզմի դեմ տարած հաղթանակի 50-ամյակի տոնակատարության միջոցառումների իրականացումը.
բ) մեկամսյա ժամկետում Հայաստանի Հանրապետության կառավարություն ներկայացնել առաջարկություն 1995 թվականի մայիսին Մոսկվայում կայանալիք` հաղթանակի 50-ամյակին նվիրված հանդիսավոր հանդիպմանը մասնակցելու համար Հայաստանի Հանրապետության պատվիրակության անհատական կազմի վերաբերյալ.
գ) կազմակերպել հաղթանակի 50-ամյակի առթիվ թողարկված հուշամեդալների հանդիսավոր հանձնումը պատերազմի վետերաններին:
3. Հայաստանի Հանրապետության բարձրագույն կրթության և գիտության նախարարությանը, լուսավորության նախարարությանը, Հայաստանի Հանրապետության հեռուստատեսության և ռադիոհաղորդումների պետական վարչությանը, Հայաստանի Հանրապետության գիտությունների ազգային ակադեմիային` մշակել և իրականացնել հաղթանակի ապահովման գործում հայ ժողովրդի ներդրած ավանդին նվիրված համապատասխան ծրագրեր:
4. Հայաստանի Հանրապետության պաշտպանության նախարարությանը` հաստատել և, Հայաստանի Հանրապետության կառավարության հետ համաձայնեցնելով, 10-օրյա ժամկետում Ռուսաստանի Դաշնության պաշտպանության նախարարություն ուղարկել 1995 թվականի մայիսին Մոսկվայում կայանալիք հանդիսավոր զորահանդեսի` Հայաստանի Հանրապետության պատերազմի վետերանների մասնակիցների ցուցակը:
5. Հայաստանի Հանրապետության ֆինանսների նախարարությանն ու Հայաստանի Հանրապետության կառավարությանն առընթեր ֆիզիկական կուլտուրայի, սպորտի և երիտասարդության հարցերի վարչությանը` 10-օրյա ժամկետում քննության առնել ԱՊՀ անդամ պետությունների շրջանակներում անցկացվող` ֆաշիզմի դեմ տարած հաղթանակի 50-ամյակին նվիրված սպարտակիադային Հայաստանի Հանրապետության հավաքականի մասնակցության հետ կապված հարցերը և առաջարկություն ներկայացնել Հայաստանի Հանրապետության կառավարություն:
6. Պատգամավորների քաղաքային և շրջանային խորհուրդների գործադիր կոմիտեներին` 1995 թվականի մայիսի 9-ի նախօրերին անցկացնել հաղթանակի 50-ամյակին նվիրված հանդիսավոր նիստեր, իսկ մայիսի 9-ին կազմակերպել պատերազմում զոհվածների հուշարձաններին պսակադրության արարողություն:
7. Պատգամավորների Երևանի քաղխորհրդի գործկոմին` մինչև 1995 թվականի մայիսի 1-ը բարեկարգել «Հաղթանակի» զբոսայգում «Անհայտ զինվորի» հուշարձանը:
Հայաստանի Հանրապետության վարչապետ Հ. ԲԱԳՐԱՏյան
Հայաստանի Հանրապետության ԿԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐԻՉ Ս. ՄԱՆԱՍԱՐՅԱՆ
ՀԱՎԵԼՎԱԾ
ՀՀ կառավարության 1995 թ.
հունվարի 30-ի N 45 որոշման
Կ Ա Զ Մ
ՖԱՇԻԶՄԻ ԴԵՄ ՏԱՐԱԾ ՀԱՂԹԱՆԱԿԻ 50-ԱՄՅԱԿԻ ՏՈՆԱԿԱՏԱՐՈՒԹՅԱՆ ՄԻՋՈՑԱՌՈՒՄՆԵՐԻ ԿԱԶՄԱԿԵՐՊՄԱՆ ԵՎ ԿՈՈՐԴԻՆԱՑՄԱՆ ԿԱՌԱՎԱՐԱԿԱՆ ՀԱՆՁՆԱԺՈՂՈՎԻ
Վ. Չիտեչյան - ՀՀ փոխվարչապետ (նախագահ)
Ա. Ղազարյան - ՀՀ պետնախարար (նախագահի տեղակալ)
Վ. Սարգսյան - ՀՀ պետնախարար (նախագահի տեղակալ)
Վ. Խաչատրյան - պատգամավորների Երևանի քաղխորհրդի գործկոմի նախագահ
Ա. Բաբլոյան - ՀՀ առողջապահության նախարար
Լ. Բարխուդարյան - ՀՀ ֆինանսների նախարար
Ա. Եսայան - ՀՀ աշխատանքի և սոցիալական ապահովության նախարար
Ս. Սարգսյան - ՀՀ պաշտպանության նախարար
Վ. Սիրադեղյան - ՀՀ ներքին գործերի նախարար
Ֆ. Սարգսյան - ՀՀ գիտությունների ազգային ակադեմիայի պրեզիդենտ
Ա. Ավետիսյան - ՀՀ կառավարությանն առընթեր ֆիզիկական կուլտուրայի, սպորտի և երիտասարդության հարցերի վարչության պետ
Ա. Ղազարյան - ՀՀ պատերազմի, աշխատանքի և զինված ուժերի վետերանների միության խորհրդի նախագահ
Ա. Հարությունյան - ՀՀ պաշտպանության նախարարության կազմազորահավաքային գլխավոր վարչության պետ
Պ. Բոշնաղյան - ՀՀ պատերազմի վետերանների կոմիտեի նախագահ
Մ. Հովհաննիսյան - պատերազմի և աշխատանքի համահայկական «Ավագանի» միության նախագահ
Հ. Հովհաննիսյան - ՀՀ պատերազմի վետերանների կոմիտեի նախագահի տեղակալ (հանձնաժողովի քարտուղար)
Հայաստանի Հանրապետության ԿԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐԻՉ Ս. ՄԱՆԱՍԱՐՅԱՆ