ՀՀ ԿԱՌԱՎԱՐՈՒԹՅԱՆ ՈՐՈՇՈՒՄԸ ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅԱՆ ՍՏԵՂԾՄԱՆԸ ՄԱՍՆԱԿՑԵԼՈՒ ՄԱՍԻՆ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

11 մարտի 2010 թվականի N 320-Ն

ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅԱՆ ՍՏԵՂԾՄԱՆԸ ՄԱՍՆԱԿՑԵԼՈՒ ՄԱՍԻՆ

Ղեկավարվելով «Բաժնետիրական ընկերությունների մասին» Հայաստանի Հանրապետության օրենքի 10-րդ հոդվածի 4-րդ և 12-րդ հոդվածի 5-րդ մասերով` Հայաստանի Հանրապետության կառավարությունը որոշում է.

1. «ՎԻԼԼԱՇԻՆ» սահմանափակ պատասխանատվությամբ ընկերության հետ համատեղ հիմնադրել փակ բաժնետիրական ընկերություն:

2. Սահմանել, որ`

1) փակ բաժնետիրական ընկերության գործունեության առարկան է`

ա. արտադրական և այլ կեղտաջրերի մաքրման տեղային (լոկալ) կայանների ներմուծումը, արտադրությունը, տեղադրումը, սպասարկումը,

բ. արտադրական և այլ կեղտաջրերի մաքրման տեղային (լոկալ) համակարգերի նախագծումը, շինարարությունը,

գ. ջրօգտագործողների համար սահմանային թույլատրելի արտահոսքերի (ՍԹԱ) նախագծերի մշակումը,

դ. օրենքով չարգելված այլ գործունեություն.

2) փակ բաժնետիրական ընկերության կանոնադրական կապիտալը կազմում է 100000 դրամ, որը բաժանված է 10 հասարակ (սովորական) բաժնետոմսի.

3) փակ բաժնետիրական ընկերությունում Հայաստանի Հանրապետությանը պատկանող բաժնետոմսերը կազմում են ընկերության ընդհանուր բաժնետոմսերի 40 տոկոսը:

3. Լիազորել Հայաստանի Հանրապետության բնապահպանության նախարարին Հայաստանի Հանրապետության կառավարության անունից հանդես գալ փակ բաժնետիրական ընկերությունում:

4. Հայաստանի Հանրապետության բնապահպանության նախարարին` իրականացնել հիմնադիր պայմանագրի, այլ փաստաթղթերի, կանոնադրության հաստատման, ինչպես նաև օրենքով նախատեսված այլ գործողություններ:

5. Նորաստեղծ փակ բաժնետիրական ընկերության բաժնետոմսերի կառավարման լիազորությունները վերապահել Հայաստանի Հանրապետության բնապահպանության նախարարությանը:

6. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության

վարչապետ Տ. Սարգսյան

2010 թ. ապրիլի 7

Երևան