040.0216.31.03.98
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀԻ ՊԱՇՏՈՆԱԿԱՏԱՐ Ռ. ՔՈՉԱՐՅԱՆ
31 մարտի 1998 Թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
31 մարտի 1998 թվականի N 216
քաղ. Երևան
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ՍՏՈՐԵՐԿՐՅԱ ՋՐԵՐԻ ՀԱՆՔԱՎԱՅՐԵՐԻ ԵՎ ՋՐԱՏԱՐ ՀՈՐԻԶՈՆՆԵՐԻ ՇԱՀԱԳՈՐԾՄԱՆ, ՊԵՏԱԿԱՆ ՀԱՇՎԱՌՄԱՆ, ՊԱՀՊԱՆՄԱՆ ԵՎ ՀԱՏՈՒԿ ՋՐՕԳՏԱԳՈՐԾՄԱՆ ԹՈՒՅԼՏՎՈՒԹՅՈՒՆ ՏԱԼՈՒ ԿԱՐԳԻ ՄԱՍԻՆ
Հայաստանի Հանրապետության տարածքում ստորերկրյա ջրերի հանքավայրերի և ջրատար հորիզոնների շահագործման, պետական հաշվառման, պահպանման և հատուկ ջրօգտագործման թույլտվություն տալու հարցերը կանոնակարգելու նպատակով Հայաստանի Հանրապետության կառավարությունը որոշում է.
1. Հաստատել Հայաստանի Հանրապետության տարածքում ստորերկրյա ջրերի հանքավայրերի և ջրատար հորիզոնների շահագործման, պետական հաշվառման, պահպանման և հատուկ ջրօգտագործման թույլտվություն տալու կարգը (կցվում է):
2. Սահմանել, որ Հայաստանի Հանրապետության բնապահպանության նախարարությունը`
ա) վերահսկում և պետական կառավարում է իրականացնում Հայաստանի Հանրապետության տարածքում ստորերկրյա ջրերի հանքավայրերի և ջրատար հորիզոնների շահագործման, պետական հաշվառման, ռացիոնալ օգտագործման, դրանք սպառումից և աղտոտումից պահպանման բնագավառում.
բ) իրականացնում է Հայաստանի Հանրապետության տարածքում ստորերկրյա ջրերի հանքավայրերի շահագործվող պաշարների պետական հաշվառումը, ինչպես նաև դրանց ռացիոնալ օգտագործման, շահագործման ռեժիմի և որակի վերահսկումը.
գ) ստորերկրյա ջրերի պետական հաշվառման նյութերի հիման վրա, սահմանված կարգով ապահովում է կառույցների և այլ օբյեկտների նախագծման, շինարարության և շահագործման համար անհրաժեշտ հիդրոերկրաբանական կանխագուշակումների մասին ստորերկրյա ջրերի դիտանցի (մոնիտորինգ) համառոտ տվյալների տրամադրումը ջրօգտագործողներին.
դ) պարբերաբար ապահովում է ջրերի աղտոտման աստիճանի և տեխնածին գործընթացների ազդեցության տակ դրանց հնարավոր փոփոխման վերաբերյալ տեղեկատվության տրամադրումը ջրօգտագործողներին:
3. Ուժը կորցրած ճանաչել Հայաստանի Հանրապետության կառավարության 1993 թվականի հունվարի 25-ի «Հանրապետությունում ստորերկրյա ջրերի օգտագործումը բարելավելու միջոցառումների մասին» N 17 որոշումը:
Հայաստանի Հանրապետության
վարչապետ Ռ. Քոչարյան
ՀԱՍՏԱՏՎԱԾ Է
ՀՀ ԿԱՌԱՎԱՐՈՒԹՅԱՆ 1998 ԹՎԱԿԱՆԻ
ՄԱՐՏԻ 31-Ի N 216 ՈՐՈՇՄԱՄԲ
Կ Ա Ր Գ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ՍՏՈՐԵՐԿՐՅԱ ՋՐԵՐԻ ՀԱՆՔԱՎԱՅՐԵՐԻ ԵՎ ՋՐԱՏԱՐ ՀՈՐԻԶՈՆՆԵՐԻ ՇԱՀԱԳՈՐԾՄԱՆ, ՊԵՏԱԿԱՆ ՀԱՇՎԱՌՄԱՆ, ՊԱՀՊԱՆՄԱՆ ԵՎ ՀԱՏՈՒԿ ՋՐՕԳՏԱԳՈՐԾՄԱՆ ԹՈՒՅԼՏՎՈՒԹՅՈՒՆ ՏԱԼՈՒ
I. ԸՆԴՀԱՆՈՒՐ ԴՐՈՒՅԹՆԵՐ
1. Սույն կարգով սահմանվում է Հայաստանի Հանրապետության տարածքում ստորերկրյա ջրերի հանքավայրերի շահագործման տրամադրման, պահպանման, ինչպես նաև պետական հաշվառման և ռացիոնալ օգտագործման նկատմամբ վերահսկողության կարգը:
2. Ստորերկրյա ջրերի օգտագործումը վճարովի է և իրականացվում է սույն կարգին համապատասխան:
II. ՍՏՈՐԵՐԿՐՅԱ ՋՐԵՐԻ ՕԳՏԱԳՈՐԾՈՒՄԸ
3. Ստորերկրյա ջրերի հաստատված պաշարներով հանքավայրերը թույլատրվում են շահագործման Հայաստանի Հանրապետության հատկապես լիազորված պետական մարմնի կողմից տրված արտոնագիր ունեցող ջրօգտագործողի և Հայաստանի Հանրապետության բնապահպանության նախարարության միջև Հայաստանի Հանրապետության կառավարության 1994 թվականի օգոստոսի 15-ի «Օգտակար հանածոների արդյունահանման նպատակով ընդերքից օգտվելու կարգի մասին» N 374 որոշմամբ հաստատված կարգով կնքված պայմանագրերի հիման վրա:
4. Ջրամատակարարումը թույլատրվում է սահմանված կարգով չհաստատված, ինչպես նաև հաստատված (եթե դա չի ազդում ստորերկրյա ջրերի հանքավայրի շահագործման ռեժիմի վրա) պաշարներով ստորերկրյա ջրերի հանքավայրերում միայն հատուկ ջրօգտագործման թույլտվության հիման վրա, ջրօգտագործման պայմանների համաձայնեցման դեպքում`
ա) պետական հիգիենիկ և հակահամաճարակային ծառայության մարմինների հետ բոլոր դեպքերում.
բ) պետական անասնաբուժական ծառայության մարմինների հետ` ստորերկրյա ջրերն անասնաբուծության, ձկնաբուծության ու կենդանական ծագում ունեցող սննդամթերք և հումք մթերող ու վերամշակող ձեռնարկությունների կարիքների համար օգտագործելու դեպքերում.
գ) Հայաստանի Հանրապետության առողջապահության նախարարության հետ` ստորերկրյա ջրերը բուժիչ և առողջարարական նպատակներով օգտագործելու դեպքերում.
դ) Հայլեռտեխհսկողության հետ` ստորերկրյա ջրերը լեռնաարդյունաբերական ձեռնարկությունների կողմից օգտագործվելու դեպքում (լեռնահատկացման սահմաններում).
ե) Հայաստանի Հանրապետության քաղաքաշինության նախարարության հետ` բնակավայրերում ջրհաններ կառուցելու դեպքում.
զ) Հայաստանի Հանրապետության գյուղատնտեսության նախարարության հետ` ստորերկրյա ջրերը գյուղատնտեսական արտադրության ոլորտում օգտագործելու դեպքում:
5. Հատուկ պաշտպանական նշանակություն ունեցող օբյեկտների, զինվորական միավորումների ջրօգտագործման պայմանների և թույլտվության ձևակերպումն իրականացվում է համապատասխան նախարարությունների և գերատեսչությունների համաձայնությամբ:
6. Առաջնային ջրօգտագործողները, որոնց անջատ ջրօգտագործման թույլտվություն է տրված, իրավունք ունեն թույլատրելու երկրորդային ջրօգտագործում` համաձայնեցնելով Հայաստանի Հանրապետության բնապահպանության նախարարության հետ:
7. Ստորերկրյա քաղցրահամ ջրերն օգտագործման են տրամադրվում բնակչության խմելու և կենցաղային կարիքները բավարարելու նպատակով: Այն տարածաշրջաններում, որտեղ առկա են բավարար քանակությամբ ստորերկրյա ջրերի պաշարներ, իսկ մակերևութային ջրեր չկան, ժամանակավորապես թույլատրվում է ստորերկրյա ջրերի օգտագործումը` տեխնիկական և այլ նպատակներով:
III. ՋՐՀԱՆԻ ԿԱՌՈՒՑՈՒՄԸ ԵՎ ՇԱՀԱԳՈՐԾՈՒՄԸ
8. Ստորերկրյա ջրերի ջրհանները (հորատանցքերը) կառուցում և շահագործում են Հայաստանի Հանրապետության բնապահպանության նախարարության համակարգի մասնագիտացված ձեռնարկությունները կամ սահմանված կարգով լիցենզիա ստացած այլ ձեռնարկություններ` Հայաստանի Հանրապետության բնապահպանության նախարարության համաձայնությամբ:
9. Ստորերկրյա ջրերի շահագործական հորատանցքերը հորատվում են սույն կարգի 4-րդ կետում նշված ջրօգտագործման պայմանների կատարումից հետո` ջրհանի նախագծի առկայության դեպքում: Շահագործական հորատանցքերի վերականգնման և նորոգման աշխատանքների նախագծերը համաձայնեցվում, իսկ կատարման ընթացքը վերահսկվում է Հայաստանի Հանրապետության բնապահպանության նախարարության կողմից:
10. Կենտրոնացված ջրամատակարարման համար ջրհան կառույցները տեղադրվում են հաստատված պաշարներով հանքավայրերի` այդ նպատակով հատուկ առանձնացված տեղամասերում: Ոչ կենտրոնացված ջրամատակարարման համար ջրհան կառույցները (հորատանցքերը, կապտաժները) տեղադրվում են հատուկ ջրօգտագործման թույլտվությամբ:
IV. ՍՏՈՐԵՐԿՐՅԱ ՋՐԵՐԻ ՊԵՏԱԿԱՆ ՀԱՇՎԱՌՈՒՄԸ
11. Ստորերկրյա ջրերի հանքավայրերի պաշարների պետական հաշվառումը պետք է ապահովի ընթացիկ և հեռանկարային ծրագրավորման, ջրապահպանման միջոցառումների անցկացման, ստորերկրյա ջրերի օգտագործման համալիր գծապատկերի կազմման, ինչպես նաև ստորերկրյա ջրերի ռացիոնալ օգտագործման և պահպանման նկատմամբ վերահսկողության իրականացման համար անհրաժեշտ ելակետային տվյալների ստացումը:
12. Հանքավայրից արտամղվող ջրի քանակը սահմանված կարգով հաշվառում է ընդերքօգտագործողը: Հաշվառման նյութերը, բացի տարեկան 2-տա ձևից, վիճակագրական հաշվետվությունից, ներկայացվում են ընդերքտրամադրող նախարարություն` ըստ անհրաժեշտության, վերջինիս պահանջով:
V. ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ՍՏՈՐԵՐԿՐՅԱ ՋՐԵՐԻ ՀԱՆՔԱՎԱՅՐԵՐԻ ՌԱՑԻՈՆԱԼ ՕԳՏԱԳՈՐԾՄԱՆ ՆԿԱՏՄԱՄԲ ՎԵՐԱՀՍԿՈՂՈՒԹՅՈՒՆԸ
13. Ստորերկրյա ջրերի որակի, վիճակի, աղտոտման և սպառման մասին պարբերաբար տեղեկատվություն ստանալու, այդ գործընթացների կանխագուշակումների և բոլոր ջրօգտագործողների կողմից ստորերկրյա ջրերի պահպանման կարգն ապահովելու, կանխարգելող միջոցառումներ մշակելու համար Հայաստանի Հանրապետության բնապահպանության նախարարությունն իրականացնում է վերահսկողություն`
ա) խոշոր արդյունաբերական և գյուղատնտեսական օբյեկտների շրջաններում, կոյուղի և մաքրման կայաններ չունեցող տեղամասերում տեղադրված ջրհան կառույցներում ստորերկրյա ջրերի որակի և վիճակի նկատմամբ.
բ) բոլոր ջրօգտագործողների կողմից ջրհաններում կատարվող անհրաժեշտ դիտարկումների և չափումների, ինչպես նաև օգտակար հանածոների պաշարների պետական հանձնաժողովի հանձնարարականների կատարման նկատմամբ.
գ) ստորերկրյա ջրերի ջրհանների շինարարությամբ զբաղվող կազմակերպությունների կողմից կատարվող հորատման և փորձնական հիդրոերկրաբանական աշխատանքների որակի, ինչպես նաև ջրի առանձին հորատանցքերի հորատման և նորոգման վիճակի նկատմամբ.
դ) ստորերկրյա ջրերի հետախուզված և շահագործվող հանքավայրերի տվյալների համապատասխանության նկատմամբ:
14. Վերահսկողության և պահպանման հիմնական օբյեկտներ են շահագործվող ջրատար հորիզոնների խմելու, տնտեսական ու հանքային ջրերի ջրամատակարարման ջրհանները: