Հոդված 3. Նոտարը

Հոդված 3. Նոտարը

1. Նոտարը պաշտոնատար անձ է, որը Հայաստանի Հանրապետության անունից Հայաստանի Հանրապետության Սահմանադրությանը և օրենքներին համապատասխան իրականացնում է սույն օրենքով նախատեսված նոտարական գործողություններ և այլ գործունեություն:

Նոտարի կարգավիճակի առանձնահատկությունները սահմանվում են միայն սույն օրենքով:

2. Նոտարը նոտարական գործունեությունն իրականացնում է համապատասխան նոտարական գործողություններ կատարելու, փաստաթղթեր ձևակերպելու, իրավաբանական խորհրդատվություններ մատուցելու, պարզաբանումներ տալու կամ սույն օրենքով նախատեսված նոտարական այլ գործունեություն կատարելու միջոցով:

3. Նոտարի ստորագրությամբ ու կնիքով վավերացված կամ հաստատված փաստաթուղթն ունի օրենքով նախատեսված հանրային հեղինակություն և լիարժեք ապացուցողական ուժ:

4. Նոտարական գործողությունն իրականացվում է անաչառորեն՝ բոլորի համար հավասար պայմաններով:

5. «Նոտար» բառը կամ դրա ածանցյալներն իրենց կամ իրենց գրասենյակների անվանման մեջ կարող են օգտագործել միայն սույն օրենքով սահմանված կարգով նշանակված նոտարները: