ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎ
ԿՈԼԵԳԻԱ
Կ Ա Ր Գ Ա Դ Ր ՈՒ Թ Յ ՈՒ Ն
9 փետրվարի 2016 թվականի թիվ 14 քաղ. Մոսկվա
ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎԻ ԵՎ ԵՎՐԱՍԻԱԿԱՆ ՏՆՏԵՍԱԿԱՆ ՄԻՈՒԹՅԱՆ ԳՈՐԾԱՐԱՐ ԽՈՐՀՐԴԻ ՄԻՋԵՎ ՓՈԽԳՈՐԾԱԿՑՈՒԹՅԱՆ ՄԱՍԻՆ ՀՈՒՇԱԳՐԻ ՆԱԽԱԳԾԻ ՄԱՍԻՆ
1. Հավանություն տալ Եվրասիական տնտեսական հանձնաժողովի և Եվրասիական տնտեսական միության գործարար խորհրդի միջև փոխգործակցության մասին հուշագրի նախագծին (կցվում է):
Հանձնարարել Եվրասիական տնտեսական հանձնաժողովի կոլեգիայի նախագահին ստորագրել նշված հուշագիրը` թույլատրելով սկզբունքային նշանակություն չունեցող փոփոխություններ կատարել հուշագիրը ստորագրելու վերաբերյալ բանակցությունների ընթացքում կից ներկայացվող նախագծում։
2. Սույն Կարգադրությունն ուժի մեջ է մտնում դրա ընդունման օրվանից։
Եվրասիական տնտեսական
հանձնաժողովի կոլեգիայի
նախագահ` Տ. Սարգսյան
Նախագիծ
ՀՈՒՇԱԳԻՐ
Եվրասիական տնտեսական հանձնաժողովի ԵՎ Եվրասիական տնտեսական միության գործարար խորհրդի միջԵՎ փոխգործակցության մասին
Եվրասիական տնտեսական հանձնաժողովը (այսուհետ` Հանձնաժողով) և Եվրասիական տնտեսական միության գործարար խորհուրդը (այսուհետ` Գործարար խորհուրդ), այսուհետ` Կողմեր,
ղեկավարվելով «Եվրասիական տնտեսական միության մասին» 2014 թվականի մայիսի 29-ի պայմանագրով և «Եվրասիական տնտեսական միության գործարար խորհրդի ստեղծման մասին» 2015 թվականի մայիսի 21-ի համաձայնագրով,
հաստատելով Եվրասիական տնտեսական միության արդյունավետ գործունեության և զարգացման ապահովման համար Եվրասիական տնտեսական միության անդամ պետությունների գործարար համայնքների շահերը հաշվի առնելու կարևորությունը,
ընդունելով Եվրասիական տնտեսական միության անդամ պետությունների գործարար համայնքների` Եվրասիական տնտեսական միության շրջանակներում ձեռնարկատիրական գործունեության իրականացմանն առնչվող հարցերի վերաբերյալ համախմբված դիրքորոշում ձևավորելու և դրա մասին Հանձնաժողովին և Եվրասիական տնտեսական միության անդամ պետությունների կառավարություններին տեղյակ պահելու նպատակահարմարությունը,
հիմնվելով հրապարակայնության, թափանցիկության և Կողմերի շահերի փոխադարձ հարգանքի սկզբունքների վրա,
կնքեցին սույն Հուշագիրը հետևյալի մասին.
1. Սույն Հուշագրի իրականացման շրջանակներում Կողմերն իրենց իրավասության սահմաններում, Եվրասիական տնտեսական միության իրավունքի մաս կազմող միջազգային պայմանագրերին և ակտերին, ինչպես նաև Եվրասիական տնտեսական միության անդամ պետությունների օրենսդրությանը համապատասխան, փոխգործակցություն կիրականացնեն համակարգային և ռազմավարական հարցերի մասով (ներառյալ` տեղեկատվական-վերլուծական և կազմակերպչական աշխատանքի կատարումը)` նպատակ ունենալով սահմանել Եվրասիական տնտեսական միության շրջանակներում ձեռնարկատիրական գործունեության զարգացման ուղղությունները և հեռանկարները:
2. Սույն Հուշագրի իրականացման մասով փոխգործակցությունը կիրականացվի Կողմերի ներկայացուցիչներից ձևավորվող Խորհրդատվական խորհրդի նիստերի շրջանակներում;
Խորհրդատվական խորհուրդը գլխավորում է Հանձնաժողովի կոլեգիայի նախագահը:
Խորհրդատվական խորհրդի աշխատանքի և ձևավորման կարգը սահմանվում է Խորհրդատվական խորհրդի մասին հիմնադրույթով, որը հաստատվում է Հանձնաժողովի կոլեգիայի կողմից` Գործարար խորհրդի նախագահության հետ համաձայնեցնելուց հետո, իսկ Խորհրդատվական խորհրդի աշխատանքի կանոնակարգը հաստատվում է Խորհրդատվական խորհրդի նախագահի կողմից:
Խորհրդատվական խորհրդի նիստերն անցկացվում են տարին երկու անգամից ոչ պակաս` Կողմերի պայմանավորվածությամբ։
3. Եվրասիական տնտեսական միության անդամ պետությունների գործարար համայնքների գործարար կապերի զարգացման, փոխգործակցության ամրապնդման նպատակներով Գործարար խորհուրդը, փոխգործակցելով Հանձնաժողովի հետ, Գործարար խորհրդի նախագահության որոշմամբ կազմակերպում է գործարար համայնքների ներկայացուցիչների ֆորումների անցկացում:
Նշված ֆորումների անցկացման պայմանները և կարգը նախապես որոշվում են Կողմերի կողմից` յուրաքանչյուր կոնկրետ դեպքում առանձին:
4. Սույն Հուշագրի իրականացման շրջանակներում ենթակա չեն փոխանցման այն տեղեկությունները, որոնց հասանելիությունը սահմանափակված է Եվրասիական տնտեսական միության իրավունքի մաս կազմող միջազգային պայմանագրերին և ակտերին, ինչպես նաև Եվրասիական տնտեսական միության անդամ պետությունների օրենսդրությանը համապատասխան։
5. Սույն Հուշագրի իրականացման և կիրառման հետ կապված հարցերը կլուծվեն Կողմերի միջև խորհրդակցությունների միջոցով:
6. Սույն Հուշագիրը միջազգային պայմանագիր չէ, չի առաջացնում միջազգային իրավունքով կարգավորվող իրավունքներ ու պարտավորություններ և Կողմերի վրա որևէ ֆինանսական պարտավորություն չի դնում։
7. Սույն Հուշագրում Կողմերի փոխադարձ համաձայնությամբ կարող են կատարվել փոփոխություններ` Կողմերի կողմից համապատասխան արձանագրության ստորագրման միջոցով, որը կհանդիսանա սույն Հուշագրի անբաժանելի մասը:
8. Կողմերից յուրաքանչյուրն իրավունք ունի դադարեցնելու սույն Հուշագրի կիրառումը` մյուս Կողմին համապատասխան գրավոր ծանուցում ուղարկելու միջոցով։ Սույն Հուշագրի կիրառումը դադարեցվում է մյուս Կողմի` այդպիսի ծանուցում ստանալու օրվանից։
9. Սույն Հուշագիրը կիրառվում է դրա ստորագրման օրվանից։
10. Սույն Հուշագրի կիրառման օրվանից սկսած` դադարում է «Եվրասիական տնտեսական միության և Բելառուսա-ղազախա-ռուսական գործարար երկխոսության միջև փոխգործակցության մասին» 2012 թվականի հունիսի 15-ի հուշագրի գործողությունը:
Ստորագրված է __________ քաղաքում 20____ թվականի _______-ի «____» -ին, վեց օրինակից` ռուսերենով, մեկ օրինակ` Եվրասիական տնտեսական հանձնաժողովի համար, ևհինգ օրինակ` Գործարար խորհրդի համար (յուրաքանչյուր մասնակցին` մեկական օրինակ):
Եվրասիական տնտեսական
հանձնաժողովի կողմից Եվրասիական տնտեսական
միության գործարար
խորհրդի կողմից