Հոդված 48. Գնումների բողոքարկման խորհրդի կազմը
Հոդված 48. Գնումների բողոքարկման խորհրդի կազմը
1. Խորհուրդը կազմված է մինչև երեք անդամից:
2. Խորհրդի անդամներին նշանակում և սույն օրենքով նախատեսված դեպքերում ազատում է Հայաստանի Հանրապետության Նախագահը` Հայաստանի Հանրապետության վարչապետի ներկայացմամբ:
3. Խորհրդի անդամները նշանակվում են հինգ տարի ժամկետով: Խորհրդի առաջին կազմի անդամների նշանակման ժամկետներն են`
1) մեկ անդամի համար՝ երեք տարի.
2) մեկ անդամի համար` չորս տարի.
3) մեկ անդամի համար` հինգ տարի:
4. Խորհրդի անդամ կարող է նշանակվել Հայաստանի Հանրապետության այն քաղաքացին, որն ունի տնտեսագիտություն (էկոնոմիկա) և կառավարում (մենեջմենտ) կամ իրավագիտություն մասնագիտությունների գծով բարձրագույն կրթություն, պետական կառավարման ոլորտի առնվազն հինգ տարվա աշխատանքային ստաժ կամ առնվազն յոթ տարվա մասնագիտական աշխատանքային ստաժ և տիրապետում է հայերենին: Խորհրդի անդամի լիազորությունների իրականացման առավելագույն տարիքը 65-ն է:
5. Խորհրդի անդամ չի կարող նշանակվել այն անձը, որը`
1) Հայաստանի Հանրապետության օրենքով սահմանված կարգով զրկվել է պետական պաշտոններ զբաղեցնելու իրավունքից.
2) դատարանի կողմից ճանաչվել է անգործունակ կամ սահմանափակ գործունակ.
3) դատապարտված է հանցագործության համար, բացառությամբ եթե դատվածությունը հանված կամ մարված է:
6. Խորհրդի անդամն իր լիազորությունների իրականացման ընթացքում չի կարող զբաղեցնել այլ պաշտոն կամ կատարել վճարովի այլ աշխատանք, բացի գիտական, մանկավարժական և ստեղծագործական աշխատանքից:
7. Խորհրդի անդամն ազատվում է`
1) սույն հոդվածի 5-րդ մասով սահմանված հանգամանքներից որևէ մեկի ի հայտ գալու դեպքում.
2) անձնական դիմումի հիման վրա.
3) երեք ամիս անընդմեջ անաշխատունակության պատճառով իր լիազորությունները կատարելու անհնարինության դեպքում` չհաշված հղիության և ծննդաբերության արձակուրդը.
4) Հայաստանի Հանրապետության քաղաքացիությունը դադարեցնելու դեպքում.
5) դատարանի կողմից անհայտ բացակայող կամ մահացած ճանաչվելու դեպքում:
8. Խորհրդի անդամի լիազորությունները համարվում են դադարած` նրա մահվան, լիազորությունների իրականացման ժամկետը կամ առավելագույն տարիքը լրանալու դեպքում:
9. Խորհրդի անդամին վաղաժամկետ ազատելու դեպքում նշանակում կատարվում է այդ անդամի լիազորությունների իրականացման չլրացած ժամկետով: Եթե չլրացած ժամկետը պակաս է մեկ տարուց, ապա խորհրդի նոր անդամի լիազորությունների ժամկետը սահմանվում է հինգ տարի:
10. Խորհրդի անդամը Հայաստանի Հանրապետության հետ չի գտնվում աշխատանքային հարաբերությունների մեջ: Խորհրդի յուրաքանչյուր անդամ տարվա ընթացքում ունի 24 աշխատանքային օր տևողությամբ հանգստի իրավունք, որի ընթացքում վարձատրության պահպանմամբ ազատվում է իր լիազորությունների կատարումից: