Հոդված 47. Գնումների բողոքարկման խորհուրդը

Հոդված 47. Գնումների բողոքարկման խորհուրդը

1. Պատվիրատուի և գնահատող հանձնաժողովի գործողությունների (անգործության) և որոշումների դեմ բերված բողոքների քննումն իրականացնում է գնումների բողոքարկման խորհուրդը (այսուհետ` խորհուրդ):

2. Խորհուրդը անշահախնդիր և անկախ քննություն իրականացնող մարմին է, որը շահագրգռված չէ կոնկրետ գնումների գործընթացի արդյունքներով և իր պարտականությունների ու իրավունքների կատարման ժամանակ պաշտպանված է արտաքին ազդեցություններից: Խորհրդի անդամները բողոքներն ուսումնասիրում են պատշաճ մանրամասնությամբ և անաչառորեն: Խորհրդի անդամները սույն օրենքով նախատեսված լիազորություններն իրականացնելիս անկախ են գնման գործընթացի մասնակիցներից, այդ թվում` պատվիրատուներից, ինչպես նաև պետական և տեղական ինքնակառավարման մարմիններից ու պաշտոնյաներից և պարտավոր են բացառապես ղեկավարվել օրենքով և կիրառել այն:

3. Սույն օրենքով նախատեսված լիազորությունների իրականացման համար խորհրդի անդամն ստանում է վարձատրություն պետական բյուջեի միջոցների հաշվին` լիազորված մարմնի միջոցով:

4. Խորհրդի անդամի վարձատրության չափի հաշվարկն իրականացվում է «Պետական պաշտոններ զբաղեցնող անձանց վարձատրության մասին» Հայաստանի Հանրապետության օրենքով սահմանված կարգով: Ընդ որում, խորհրդի անդամների ամսական վարձատրության հաշվարկման համար հիմք է ընդունվում սույն մասով նախատեսված օրենքով սահմանված` Հայաստանի Հանրապետության օրենքներով ստեղծված մշտապես գործող խորհրդի անդամի աշխատավարձի հաշվարկման գործակիցը:

5. Սույն օրենքով խորհրդին վերապահված լիազորությունների կատարման համար անհրաժեշտ աշխատանքային պայմաններն ապահովում է լիազորված մարմինը:

6. Խորհուրդը յուրաքանչյուր տարի` մինչև ապրիլի 1-ը, տեղեկագրում հրապարակում է հաշվետվություն նախորդ տարվա գործունության մասին: Հաշվետվությունը ներառում է սույն օրենքով վերապահված լիազորությունների առնչությամբ նախորդ տարվա ընթացքում իրականացրած գործունեության վերաբերյալ տեղեկություններ, վիճակագրական տվյալներ և համեմատական վերլուծություններ: