ԱՌԵՎՏՐԱՏՆՏԵՍԱԿԱՆ
Հ Ա Մ Ա Ձ Ա Յ Ն Ա Գ Ի Ր
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ՉԻՆԱՍՏԱՆԻ ԺՈՂՈՎՐԴԱԿԱՆ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ
Հայաստանի Հանրապետության կառավարությունը և Չինաստանի Ժողովրդական Հանրապետության կառավարությունը, այսուհետ` Պայմանավորվող կողմեր, երկու երկրների միջև բարեկամության և համագործակցության ամրապնդման, ու հավասարության և փոխշահավետության հիման վրա առևտրատնտեսական երկկողմ հարաբերությունների զարգացման նպատակով պայմանավորվեցին ներքոհիշյալի վերաբերյալ.
ՀՈԴՎԱԾ 1
Պայմանավորվող կողմերը անհրաժեշտ բոլոր միջոցներ կձեռնարկեն երկու երկրների միջև երկարաժամկետ և կայուն առևտրատնտեսական հարաբերությունների զարգացմանը աջակցելու համար և այդ նպատակների համար կստեղծեն բարենպաստ պայմաններ:
ՀՈԴՎԱԾ 2
Պայմանավորվող կողմերը միմյանց համար առավել նպաստավոր պայմաններ են ստեղծում երկու երկրների ներմուծվող ու արտահանվող ապրանքների մաքսային հարկման, այլ հարկերի, մաքսային կարգավորման կանոնների, ինչպես նաև, մաքսային արարողությունների իրագործման նկատմամբ:
Տվյալ դրույթը չի վերաբերում.
1. Այն արտոնություններին, որոնք Պայմանավորվող կողմերից մեկը տրամադրել է կամ պետք է տրամադրի հարևան երկրներին` սահմանամերձ առևտրի զարգացման համար բարենպաստ պայմաններ ստեղծելու նպատակով:
2. Այն արտոնություններին, որոնք Պայմանավորվող կողմերից մեկը տրամադրել է կամ պետք է տրամադրի մաքսային միությունների և ազատ առևտրի գոտիների անդամ պետություններին:
ՀՈԴՎԱԾ 3
Պայմանավորվող կողմերը սույն Համաձայնագրի դրույթների և յուրաքանչյուր երկրում գործող օրենսդրության հիման վրա կխթանեն ու կպաշտպանեն Պայմանավորվող կողմերից մեկի ներդրողների կապիտալ ներդրումները մյուս Կողմի տարածքում:
ՀՈԴՎԱԾ 4
Պայմանավորվող կողմերը յուրաքանչյուր երկրում գործող օրենսդրության շրջանակներում կնպաստեն երկու երկրների ընկերակցությունների, ձեռնարկությունների և կազմակերպությունների միջև տնտեսական համագործակցության տարբեր ձևերի զարգացմանը և դրա համար կստեղծեն բարենպաստ պայմաններ:
ՀՈԴՎԱԾ 5
Երկու երկրների արտաքին տնտեսական ու առևտրական գործունեությամբ զբաղվող ընկերակցությունները, ձեռնարկությունները և կազմակերպությունները առևտրային բանակցություններ կվարեն և պայմանագրեր կստորագրեն` հաշվի առնելով ստեղծված միջազգային առևտրական պրակտիկան:
ՀՈԴՎԱԾ 6
Կողմերը ապրանքների գները կհամաձայնեցնեն և կսահմանեն` ելնելով համաշխարհային շուկայում համապատասխան ապրանքների ընթացիկ գներից:
Ապրանքների դիմաց վճարումները պետք է իրականացվեն յուրաքանչյուր երկրում արժութային կարգավորման բնագավառում գործող օրենսդրությանը համապատասխան, երկու Կողմերի միջև համաձայնեցված ազատ փոխարկելի արժույթով հնարավոր է պայմանավորվածություն փոխհաշվարկների այլ ձևերի վերաբերյալ:
ՀՈԴՎԱԾ 7
Սույն Համաձայնագիրն ուժի մեջ մտնելու պահից երկու ամսվա ընթացքում Հայաստանի Հանրապետության լիազորված բանկը և Չինաստանի բանկը պետք է սահմանեն սույն Համաձայնագրին համապատասխան իրականացվող առևտրատնտեսական բնույթի գործառնությունների գծով հաշվարկների ու վճարումների տեխնիկական կարգը:
ՀՈԴՎԱԾ 8
Երկու երկրների միջև առևտրատնտեսական կապերի զարգացման նպատակով Պայմանավորվող կողմերը միմյանց աջակցություն ցույց կտան առևտրական տոնավաճառների, ցուցահանդեսների և տեխնիկատնտեսական հարցերին նվիրված տոնավաճառների կազմակերպման գործում, ինչպես նաև առևտրական պատվիրակությունների և խմբերի փոխանակման ժամանակ:
ՀՈԴՎԱԾ 9
Պայմանավորվող կողմերից յուրաքանչյուրը, իր երկրի օրենսդրությանը համապատասխան, թույլ է տալիս իր տարածքում բացելու մյուս Կողմի ընկերակցությունների, ձեռնարկությունների և կազմակերպությունների մշտական ներկայացուցչություններ, որոնք զբաղվում են առևտրատնտեսական գործունեությամբ, և ստեղծում է բոլոր անհրաժեշտ պայմանները նշված ներկայացուցչությունների նորմալ աշխատանքի համար:
ՀՈԴՎԱԾ 10
Պայմանավորվող կողմերը ցանկացած Կողմի առաջարկությամբ կարող են առևտրատնտեսական հարցերի շուրջ բանակցություններ վարել, հաջորդաբար Հայաստանի Հանրապետությունում և Չինաստանի Ժողովրդական Հանրապետությունում:
ՀՈԴՎԱԾ 11
Պայմանավորվող կողմերը, փոխադարձ համաձայնությամբ, կարող են փոփոխություններ և լրացումներ կատարել սույն Համաձայնագրում:
ՀՈԴՎԱԾ 12
Սույն Համաձայնագիրն ուժի մեջ է մտնում այն ստորագրելու օրվանից և կգործի հինգ տարվա ընթացքում: Եթե Պայմանավորվող կողմերից մեկը սույն Համաձայնագրի գործողության ժամկետը լրանալուց 6 ամիս առաջ մյուս Կողմին գրավոր չծանուցի սույն Համաձայնագրի գործողությունը դադարեցնելու իր ցանկության մասին, այն ինքնաբերաբար կերկարաձգվի ամեն անգամ` մեկ տարով:
Սույն Համաձայնագրի գործողության ժամանակաընթացքում կնքված և դրա ժամկետը լրանալու պահին չավարտված պայմանագրերը պետք է կատարվեն սույն Համաձայնագրի դրույթներին համապատասխան:
Կատարված է Երևան քաղաքում 1992 թվականի հունվարի 9-ին, երկու օրինակով, յուրաքանչյուրը` հայերեն, չինարեն և ռուսերեն, ընդ որում բոլոր տեքստերը հավասարազոր են:
Համաձայնագիրն ուժի մեջ է մտել 1992 թվականի հունվարի 9-ից: