Հ Ա Մ Ա Ձ Ա Յ Ն Ա Գ Ի Ր
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ՌՈՒՄԻՆԻԱՅԻ ԿԱՌԱՎԱՐՈՒԹՅԱՆ ՄԻՋԵՎ ԶԲՈՍԱՇՐՋՈՒԹՅԱՆ ԲՆԱԳԱՎԱՌՈՒՄ ՀԱՄԱԳՈՐԾԱԿՑՈՒԹՅԱՆ ՄԱՍԻՆ
Հայաստանի Հանրապետության կառավարությունը և Ռումինիայի կառավարությունը, այսուհետ` Կողմեր,
ձգտելով ընդհանուր ջանքերով զարգացնել զբոսաշրջության հարաբերությունները և համագործակցությունը երկու երկրների միջև,
հաշվի առնելով զբոսաշրջության կարևորությունը որպես բարեկամական հարաբերություններն ամրապնդող գործոն երկու երկրների ժողովուրդների միջև,
արտահայտելով ընդհանուր հետաքրքրություն զբոսաշրջության բնագավառում իրենց համագործակցության համար համապատասխան և երկարատև իրավական դաշտ ստեղծելու ուղղությամբ` Կողմերի օրենսդրությանը համապատասխան,
ղեկավարվելով Միավորված ազգերի կազմակերպության զբոսաշրջության և միջազգային ճամփորդությունների սկզբունքներով և հանձնարարականներով, ըստ Եվրոպայի անվտանգության և համագործակցության կոնֆերանսի եզրափակիչ փաստաթղթերի և համաձայն Համաշխարհային զբոսաշրջության կազմակերպության հանձնարարականի, համաձայնեցին ներքոհիշյալի մասին.
ՀՈԴՎԱԾ 1
Կողմերը, սույն Համաձայնագրին և իրենց երկրների գործող օրենսդրությանն և կանոնակարգերին համապատասխան, կաջակցեն զբոսաշրջության բնագավառում զարգացմանը փոխշահավետության և իրավահավասարության հիմունքներով:
ՀՈԴՎԱԾ 2
Կողմերը համաձայն են կատարել բոլոր անհրաժեշտ քայլերը` աջակցելու և զարգացնելու զբոսաշրջիկների փոխանակում երկու երկրների միջև և խրախուսելու երրորդ երկրներից զբոսաշրջիկների ճամփորդությանը:
Կողմերը ակտիվորեն կաջակցեն զբոսաշրջության ոլորտը կառավարող պետական մարմինների, զբոսաշրջային ընկերությունների, զբոսաշրջային ասոցիացիաների, հյուրանոցային ցանցերի միջև հարաբերությունների հաստատմանը և կիրականացնեն այլ գործողություններ` դյուրացնելու երկու երկրների միջև զբոսաշրջիկների փոխանակումը:
ՀՈԴՎԱԾ 3
Կողմերը կձգտեն դյուրացնել մաքսային և այլ ընթացակարգերը երկու երկրների միջև զբոսաշրջության փոխանակման ասպարեզում` հաշվի առնելով իրենց երկրների օրենսդրությունը և կանոնակարգերը:
ՀՈԴՎԱԾ 4
Կողմերը կնպաստեն զբոսաշրջության բնագավառում տեղեկության և տվյալների փոխանակմանը` կապված զբոսաշրջության վերաբերյալ օրենսդրական, ենթաօրենսդրական, վիճակագրական փաստաթղթերի, ուսումնական ծրագրերի, մարդկային ռեսուրսների մասնագիտական ուսուցման, զբոսաշրջության զարգացման ուսումնասիրման և հետազոտման համար: Փոխադարձ հիմունքներով` Կողմերը կփոխանակեն զբոսաշրջության ոլորտի մասնագետներ` Կողմերի զբոսաշրջության ինֆրակառուցվածքին և զբոսաշրջության բնագավառի գործունեությանը ծանոթացնելու նպատակով:
ՀՈԴՎԱԾ 5
Կողմերը կդյուրացնեն զբոսաշրջությանը աջակցող նյութերի փոխանակումը և կխրախուսեն զբոսաշրջային ընկերություններին և գործակալություններին` մասնակցելու զբոսաշրջությանը վերաբերող միջոցառումներին: Գովազդային և վավերագրական նյութերը, ինչպես նաև զբոսաշրջության ցուցահանդեսների համար առանց առևտրական արժեքի նախատեսված նյութերը կազատվեն մաքսավճարներից:
Սակայն եթե նման նյութերը վաճառվեն, ներմուծվող (ընդունող) երկրում, ապա կկիրառվեն համապատասխան երկրի մաքսային կանոնակարգերը և հարկերը:
ՀՈԴՎԱԾ 6
Երկու Կողմերը կձգտեն միջոցներ ձեռնարկել` իրենց հնարավորությունների սահմաններում ապահովելու զբոսաշրջության ոլորտի աշխատողների մասնագիտական ուսուցումը, կխրախուսեն փորձագետների և լրագրողների փոխանակումը, կնպաստեն երկու երկրների միջև հետազոտական կազմակերպությունների բազմակողմանի կապերին և համատեղ գործունեությանը:
ՀՈԴՎԱԾ 7
Կողմերը հատուկ ուշադրություն կդարձնեն զբոսաշրջության բնագավառում համագործակցությանը և ընդհանուր հետաքրքրություն ներկայացնող նախագծերի ներդրման վերաբերյալ տեղեկության փոխանակմանը, ինչպես նաև համատեղ ձեռնարկությունների ստեղծմանը: Կողմերը կաջակցեն զբոսաշրջության ոլորտում տեխնիկական օգնության ապահովմանը հյուրանոցային, հասարակական սննդի և հյուրընկալման կազմակերպման հարցերում:
Կողմերը կդյուրացնեն զբոսաշրջային ընկերությունների և միությունների, մասնագետների և գործարար անձանց հանդիպումների կազմակերպումը, յուրաքանչյուր Կողմ հնարավորություն կունենա ներկայացնել տեղեկություն, վիճակագրություն, փաստաթղթեր և ներդրումային ծրագրեր:
ՀՈԴՎԱԾ 8
Կողմերի ազգային զբոսաշրջության ղեկավար մարմինները կհամակարգեն իրենց գործունեությունը Զբոսաշրջության համաշխարհային կազմակերպության (ԶՀԿ) և այլ միջազգային զբոսաշրջության կազմակերպությունների շրջանակներում:
ՀՈԴՎԱԾ 9
Կողմերը կարող են միմյանց տարածքներում բացել իրենց զբոսաշրջության պաշտոնական գրասենյակները: Գրասենյակի հիմնումը և նրա գործունեությունը կհամաձայնեցվեն Կողմերի պետական իշխանությունների հետ և կենթարկվեն Կողմերի ազգային օրենսդրությանը:
ՀՈԴՎԱԾ 10
Սույն Համաձայնագրի դրույթների կատարումը Կողմերը հանձնարարում են իրենց երկրների զբոսաշրջության ոլորտը կառավարող պետական մարմիններին:
ՀՈԴՎԱԾ 11
Համաձայնագրի դրույթների կատարումն ապահովելու նպատակով կստեղծվի Համատեղ հանձնաժողով, որը բաղկացած կլինի երկու երկրների ներկայացուցիչներից: Համատեղ հանձնաժողովը կգումարվի երկու տարին մեկ անգամ, հաջորդաբար երկու երկրներում` զբոսաշրջության բնագավառում երկկողմանի հարաբերությունների և համագործակցության զարգացման ու հետագա շրջանի հիմնական ուղղությունների հաստատման նպատակով:
ՀՈԴՎԱԾ 12
Սույն Համաձայնագիրը ենթակա է Կողմերի օրենսդիր մարմինների հաստատմանը և ուժի մեջ կմտնի համապատասխան իրավական ընթացակարգերի կատարման մասին միմյանց վերջին ծանուցման պահից:
Սույն Համաձայնագիրը ուժի մեջ կմնա հինգ տարվա ընթացքում և կարող է ինքնաբերաբար երկարաձգվել ևս հինգ տարի ժամկետով, եթե Կողմերից մեկը Համաձայնագրի ժամկետը լրանալուց վեց ամիս առաջ գրավոր չծանուցի դրա դադարեցման իր մտադրության մասին:
Համաձայնագրի չեղյալ հայտարարումը, այնուամենայնիվ, չի անդրադառնա սույն Համաձայնագրի գործելու ժամանակաշրջանում ընդունված ծրագրերի և նախագծերի իրագործման վրա, եթե Կողմերը չեն համաձայնել այլ կերպ:
Կատարված է Երևանում 1996 թվականի մարտի 25-ին, երկու բնօրինակով, հայերեն, ռումիներեն և անգլերեն, բոլոր տեքստերն էլ հավասարազոր են:
Մեկնաբանության ժամանակ տարաձայնություններ առաջանալու դեպքում նախապատվությունը տրվում է անգլերեն տեքստին:
Համաձայնագիրն ուժի մեջ է մտել 1999 թվականի նոյեմբերի 16-ից: