Հ Ա Մ Ա Ձ Ա Յ Ն Ա Գ Ի Ր
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ԹՈՒՐՔՄԵՆՍՏԱՆԻ ԿԱՌԱՎԱՐՈՒԹՅԱՆ ՄԻՋԵՎ ՖԻԶԻԿԱԿԱՆ ԿՈՒԼՏՈՒՐԱՅԻ ԵՎ ՍՊՈՐՏԻ ԲՆԱԳԱՎԱՌՈՒՄ ՀԱՄԱԳՈՐԾԱԿՑՈՒԹՅԱՆ ՎԵՐԱԲԵՐՅԱԼ
Հայաստանի Հանրապետության կառավարությունը և Թուրքմենստանի կառավարությունը, այսուհետ` Կողմեր,
ղեկավարվելով երկու երկրների ժողովուրդների միջև սպորտային կապերը զարգացնելու ձգտմամբ,
ցանկանալով առողջության կոփման և սպորտով զբաղվելու համար ստեղծել ֆիզիկական կուլտուրայի և սպորտի միջոցների փոխադարձաբար օգտագործման պայմաններ,
հաստատելով իրենց հավատարմությունը Օլիմպիական խարտիայի նպատակներին ու սկզբունքներին,
համաձայնեցին ներքոհիշյալի մասին.
ՀՈԴՎԱԾ 1
Կողմերը երկկողմ համագործակցության համար խորհրդակցություններ անցկացնելու նպատակով կնպաստեն մարզական կազմակերպությունների և միությունների ղեկավարների փոխադարձ հանդիպումների կազմակերպմանը:
Կողմերը կնպաստեն`
մարզական կազմակերպությունների և միությունների ղեկավարների պատվիրակությունների փոխանակմանը` մարզական կապերի զարգացման և միջազգային մարզական և օլիմպիական շարժման հիմնախնդիրների հետ կապված փոխադարձ խորհրդակցությունների անցկացման նպատակով,
երկուստեք մասնակցությանը այն միջազգային մարզական միջոցառումներին, որոնք կանցկացվեն այդ երկու երկրներում,
մարզական հավաքների, համատեղ մարզումների, ընկերական և մրցաշարային հանդիպումների կազմակերպման նպատակով համաձայնեցված մարզաձևերի գծով թիմերի և ակումբների, ինչպես նաև մարզիչների և մասնագետների փոխանակմանը:
Կողմերը մասնակցություն կցուցաբերեն երկու երկրներում անցկացվող մարզական հարցերով գիտական սեմինարներին:
ՀՈԴՎԱԾ 2
Կողմերն անհրաժեշտ միջոցներ կձեռնարկեն սպորտի, սպորտային գիտության և բժշկության բնագավառի տեղեկության, ինչպես նաև բարձրակարգ մարզիկների և փոխարինողների պատրաստման փորձի փոխանակման ուղղությամբ:
Կողմերը կնպաստեն մարզական ակումբների, մարզիկների և ֆիզիկական դաստիարակության համակարգի աշխատողների պատրաստման կենտրոնների պատվիրակությունների փոխանակմանը, ինչպես նաև կաջակցեն երկու երկրների մարզական և մանկավարժական կադրերի պատրաստմանը:
Կողմերը, մյուս Կողմի հարցումով, անհրաժեշտ միջոցներ կձեռնարկեն գիտական աշխատությունների, ծրագրերի, ուսումնամարզական գրքերի, ձեռնարկների, հրատարակչությունների և ֆիլմերի, ինչպես նաև տարբեր մարզաձևերի (տարբեր մակարդակներով և բոլոր տարիքային խմբերում) վերջին նվաճումների, մարզակառույցների շինարարության և շահագործման, մարզագույքի և սարքավորումների արտադրության բնագավառում տեղեկության փոխանակումն ապահովելու ուղղությամբ:
Կողմերը կապահովեն տարբեր մարզաձևերի մարզիչների, դասախոսների և գիտամանկավարժական այլ կադրերի պատրաստումն ու վերապատրաստումը իրենց բարձրագույն ուսումնական հաստատություններում:
ՀՈԴՎԱԾ 3
Կողմերն անհրաժեշտ միջոցներ կձեռնարկեն մարզահագուստ, սարքավորումներ և գույք ձեռք բերելու` Կողմերի պահանջարկի ուսումնասիրմանը և կարիքների բավարարմանը և կնպաստեն մարզական ապրանքների, մարզագույքի, սարքավորումների արտադրության համատեղ ձեռնարկությունների կառուցմանը և արտադրանքի իրացմանը:
ՀՈԴՎԱԾ 4
Կողմերը կարծիքներ և առաջարկություններ կփոխանակեն միջազգային օլիմպիական և մարզական շարժման հարցերով, ինչպես նաև կհամակարգեն իրենց գործունեությունը այդ բնագավառում:
ՀՈԴՎԱԾ 5
Կողմերը, հաշվի առնելով իրենց շինարարական և արտադրական հզորությունները, կհամագործակցեն մարզակառույցների շինարարության ու վերակառուցման գործում:
ՀՈԴՎԱԾ 6
Կողմերը որոշեցին, որ սույն Համաձայնագրով նախատեսված մարզական համագործակցության ձևերը կիրականացվեն երկու պետությունների համար փոխադարձաբար ընդունելի պայմաններով: Մարզական պատվիրակություններ, թիմեր, մարզիչներ, մասնագետներ, առանձին մարզիկներ և այլ անձինք գործուղող Կողմը վճարում է մինչև ընդունող երկրի մայրաքաղաք հասնելու և վերադառնալու ճանապարհածախսը:
Ընդունող Կողմն իր վրա է վերցնում ժամանման հետ կապված բոլոր ծախսերը (տեղավորում, պետության տարածքում ուղևորություն մինչև մրցումների վայր հասնելը, անհրաժեշտ բժշկական սպասարկման ապահովում, սնունդ և, անհրաժեշտության դեպքում, թարգմանչի տրամադրում):
Կողմերը պայմանավորվեցին, որ պետություն ժամանած մարզական թիմերի, մարզիչների, գիտնականների, մասնագետների, առանձին մարզիկների և այլ անձանց` ծրագրով նախատեսված ժամկետից ավելի մնալը յուրաքանչյուր կոնկրետ դեպքում պետք է համաձայնեցվի երկու երկրների համապատասխան միությունների և մարզական այլ կազմակերպությունների միջև:
ՀՈԴՎԱԾ 7
Սույն Համաձայնագիրը չի շոշափում Կողմերի` երրորդ երկրների հետ նրանց համաձայնագրերից բխող պարտավորությունները, չի բացառում սպորտի և ֆիզիկական կուլտուրայի ոլորտում մարզական համագործակցության` փոխադարձաբար ընդունելի այլ ձևերը, որոնք անհրաժեշտության դեպքում կարող են ձևակերպվել լրացուցիչ արձանագրություններով և համաձայնագրերով, որոնցով կճշտվեն համագործակցության ձևերը:
ՀՈԴՎԱԾ 8
Սույն Համաձայնագիրն ուժի մեջ է մտնում ստորագրման օրվանից և ուժի մեջ կմնա այնքան ժամանակ, մինչև Կողմերից մեկը վեց ամիս առաջ մյուս Կողմին գրավոր տեղեկացնի սույն Համաձայնագրի գործողությունը դադարեցնելու վերաբերյալ իր նկատառման մասին:
Կատարված է Աշգաբադ քաղաքում 1993 թվականի օգոստոսի 24-ին, երկու բնօրինակով, յուրաքանչյուրը` հայերեն, թուրքմեներեն և ռուսերեն, ընդ որում բոլոր տեքստերն էլ հավասարազոր են:
Համաձայնագիրն ուժի մեջ է մտել 1993 թվականի օգոստոսի 24-ին: