Հ Ա Մ Ա Ձ Ա Յ Ն Ա Գ Ի Ր
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ՎՐԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ ԱՌՈՂՋԱՊԱՀՈՒԹՅԱՆ ԲՆԱԳԱՎԱՌՈՒՄ ՀԱՄԱԳՈՐԾԱԿՑՈՒԹՅԱՆ ՄԱՍԻՆ
Հայաստանի Հանրապետության կառավարությունը և Վրաստանի Հանրապետության կառավարությունը, այսուհետ` Կողմեր,
ելնելով ազգային շահերից և առողջապահության բնագավառում նրանց միջև ձևավորված ավանդական կապերից,
հաշվի առնելով երկու Կողմերի շահագրգռվածությունը երկարաժամկետ հիմքերով փոխշահավետ համագործակցության հետագա զարգացման հարցում,
պայմանավորվեցին ներքոհիշյալի մասին.
ՀՈԴՎԱԾ 1
Կողմերը պարտավորվում են զարգացնել համագործակցություն ի շահ առողջապահության ազգային համակարգերի հետագա կատարելագործման:
ՀՈԴՎԱԾ 2
Կողմերը պայմանավորվեցին զարգացնել փոխշահավետ համագործակցություն գործնական առողջապահության և բժշկագիտության հետևյալ բնագավառներում.
- առողջապահության կազմակերպում և տնտեսություն,
- հիվանդությունների կանխարգելում,
- արտակարգ իրավիճակների և համաճարակային դրության գծով փոխադարձ հետաքրքրություն ներկայացնող օպերատիվ տեղեկության փոխանակում,
- մեծահասակ և փոքրահասակ բնակչությանը մասնագիտացված օգնության ցուցաբերում,
- գիտական և բժշկական կադրերի պատրաստում,
- դեղագործական և բժշկական տեխնիկա:
ՀՈԴՎԱԾ 3
Կողմերը պայմանավորվեցին, որ համատեղ գործունեության առաջնային ուղղություններն են.
- վերականգնողական-պլաստիկ վիրաբուժություն,
- օրգանների փոխպատվաստում,
- նյարդաբանություն և նյարդավիրաբուժություն,
- ՁԻԱՀ-ի հիմնախնդիր,
- նարկոլոգիա և տոքսիկոլոգիա,
- առողջարանաբուժություն,
- ալերգիա և իմունոլոգիա,
- ուռուցքաբանություն,
- մանկաբարձություն, գինեկոլոգիա, վերարտադրություն - պրոկտոլոգիա,
- սպելեոբուժություն,
- ակնաբուժություն,
- մանկական ուռոնեֆրոլոգիա,
- մանկական պրոտեզավորմամբ վերականգնում:
Այս ցանկը սահմանափակման ենթակա չէ և կարող է ընդլայնվել:
ՀՈԴՎԱԾ 4
Սույն Համաձայնագրի 2-3-րդ հոդվածներով համագործակցությունը կիրականացվի համատեղ գիտական հետազոտությունների, խորհրդակցությունների անցկացման ճանապարհով, մասնագետների և բժշկատեխնիկական տեղեկության փոխանակման, մեթոդական հանձնարարականների մշակման, գիտաժողովների կազմակերպման, մենագրությունների և հոդվածների հրապարակման, համագործակցության այլ ձևերով, որոնց թեման և ժամկետները որոշված են:
ՀՈԴՎԱԾ 5
Կողմերը համաձայնեցին ապահովել արտակարգ իրավիճակներում արտակարգ բուժական-խորհրդատվական և հատուկ նյութատեխնիկական փոխադարձ օգնություն:
ՀՈԴՎԱԾ 6
Կողմերը, ղեկավարվելով հումանիզմի սկզբունքներով, պարտավորվում են ցուցաբերել արտակարգ և անհետաձգելի բուժօգնություն իրենց պետությունների քաղաքացիներին` առանց ծախսերի փոխադարձ հատուցման:
Կողմերը պարտավորվում են նաև մասնագիտացված բուժօգնություն ցուցաբերելու համար առողջապահության նախարարությունների ուղեգրով անարգել ընդունել իրենց պետությունների քաղաքացիներին` նրանց բուժման համար հաշիվների հետագա ներկայացմամբ: Առանց առողջապահության նախարարությունների ուղեգրի բուժհիմնարկներ ընդունվող քաղաքացիների բուժօգնությունն իրականացվում է առևտրային հիմքով:
Պայմանավորվող կողմերի քաղաքացիներին բուժօգնություն ցուցաբերելու դիմաց փոխհաշվարկների պայմաններն ու կարգը կարգավորվում են Համաձայնագրին կից առանձին Հավելվածով:
ՀՈԴՎԱԾ 7
Կողմերն իրականացնում են համատեղ աշխատանք բարձրագույն և միջին մասնագիտական հաստատությունների ուսումնական պլանների և ծրագրերի բարելավման ուղղությամբ, հաստատում են ուղղակի կապեր, ինչպես նաև փոխընդունելի պայմաններով կամ առևտրային հիմունքներով կատարում են ուսանողների և սովորողների փոխանակում:
ՀՈԴՎԱԾ 8
Կողմերը պարտավորվում են ապահովել գերատեսչական ենթակայության հիմնարկներում բժշկական, մանկավարժական և գիտական կադրերի որակավորման բարձրացումը պահանջներին համապատասխան և համապատասխան վարձատրությամբ:
ՀՈԴՎԱԾ 9
Կողմերը ուղղակի կապեր են հաստատում սանիտարահամաճարակային ծառայությունների միջև, ապահովում են անհրաժեշտ սանիտարահամաճարակային աշխատանքների, ինչպես նաև շրջակա միջավայրի պահպանման միջոցառումների կատարումը:
ՀՈԴՎԱԾ 10
Կողմերը չեն թույլատրի բժշկական օգնության կազմակերպման, սանիտարահամաճարակային նորմատիվների կիրառման և կատարման հսկողության հետ կապված այնպիսի գործողություններ, որոնք կարող են անբարենպաստ ազդեցություն թողնել այլ պետությունների քաղաքացիների առողջության վրա:
ՀՈԴՎԱԾ 11
Կողմերը համաձայնեցին համագործակցել դեղագործության բնագավառում, ստեղծել դեղերի և բժշկական տեխնիկայի համատեղ ձեռնարկություններ, անցկացնել դեղաբանական հետազոտություններ, գրանցել և իրացնել իրենց և համատեղ արտադրվող դեղամիջոցները և բժշկական հրատարակումները:
ՀՈԴՎԱԾ 12
Կողմերը համաձայնեցին նպաստել բժշկական և գիտական հետազոտությունների, բուժիչ զբոսաշրջության և բժշկական արդյունաբերության բնագավառում հայկական և վրացական գործարար շրջանների մասնակցությանը և համատեղ աշխատանքին:
ՀՈԴՎԱԾ 13
Համաձայնագրի իրականացման նպատակով Կողմերը Համաձայնագրի ստորագրման օրվանից մեկ ամսվա ընթացքում ստեղծում են համակարգող հանձնաժողով` ընդգրկելով յուրաքանչյուր Կողմից երկու մարդ:
ՀՈԴՎԱԾ 14
Սույն Համաձայնագիրը կարող է փոփոխվել կամ լրացվել Կողմերի համաձայնությամբ, որոնք կձևակերպվեն Համաձայնագրի հավելվածի ձևով:
ՀՈԴՎԱԾ 15
Սույն Համաձայնագիրը կնքվում է հինգ տարի ժամկետով: Սույն Համաձայնագրի գործողության ժամկետը երկարաձգվում է յուրաքանչյուր հաջորդ տարով, եթե Կողմերից ոչ մեկը Համաձայնագրի գործողության հերթական ժամկետից առաջ մեկ ամսվա ընթացքում մյուս Կողմին գրավոր չի ծանուցում Համաձայնագրի դադարեցման մասին:
ՀՈԴՎԱԾ 16
Սույն Համաձայնագիրն ուժի մեջ է մտնում ստորագրման պահից:
Կատարված է Երևան քաղաքում 1993 թվականի մայիսի 19-ին, երկու օրինակով, յուրաքանչյուրը` հայերեն, վրացերեն և ռուսերեն, ընդ որում բոլոր տեքստերը հավասարազոր են:
Համաձայնագիրն ուժի մեջ է մտել 1993 թվականի մայիսի 19-ից: