Հոդված 35. ԵՐԿՐՈՐԴ և ՀԵՏԱԳԱ ՀԱՐԿԱԴԻՐ ԱՃՈՒՐԴՆԵՐԸ
Հոդված 35. ԵՐԿՐՈՐԴ և ՀԵՏԱԳԱ ՀԱՐԿԱԴԻՐ ԱՃՈՒՐԴՆԵՐԸ
1. Յուրաքանչյուր չկայացած հարկադիր աճուրդից ոչ ուշ, քան երեսուն օրվա ընթացքում, անցկացվում է կրկնակի հարկադիր աճուրդ:
2. Աճուրդը սույն օրենքի 34-րդ հոդվածի 1-ին մասի 1-ին կետով նախատեսված հիմքերով չկայացած հայտարարվելու դեպքում երկրորդ կամ յուրաքանչյուր հերթական հարկադիր աճուրդ կազմակերպելու դեպքում վաճառվող լոտի մեկնարկային գինն իջեցվում է նախորդ աճուրդի մեկնարկային գնի տասը տոկոսի չափով:
3. Աճուրդը սույն օրենքի 34-րդ հոդվածի 1-ին մասի 2-րդ կետով նախատեսված հիմքերով չկայացած հայտարարվելու դեպքում մեկնարկային գնի իջեցում տեղի չի ունենում, իսկ աճուրդի մասնակցության նախավճարը սահմանվում է լոտի մեկնարկային գնի քսան տոկոսի չափով:
4. Հինգերորդ աճուրդից հետո անշարժ գույքի գնի իջեցում չի կատարվում վեց ամսվա ընթացքում, որից հետո աճուրդային գործընթացը շարունակվում է սույն օրենքով սահմանված կարգով:
5. Երկրորդ և յուրաքանչյուր հերթական հարկադիր աճուրդի մասին առնվազն յոթ օր առաջ կատարվում է աճուրդի մասին հրապարակային ծանուցում:
6. Երկրորդ և յուրաքանչյուր հերթական աճուրդից հետո լոտը չվաճառվելու դեպքում դա առաջարկվում է պարտատիրոջը` տվյալ աճուրդի մեկնարկային գնով, բացառությամբ այն դեպքերի, երբ պարտատեր են Հայաստանի Հանրապետության անունից հանդես եկող պետական մարմինները` հարկերի, տուրքերի և պարտադիր այլ վճարների գծով:
7. Պահանջատերը լոտն իրեն հանձնելու վերաբերյալ իր գրավոր համաձայնությունը կարող է հայտնել ծառայությանը մինչև աճուրդի անցկացման նախորդ երրորդ օրվա ժամը 16.00-ն:
Եթե պահանջատերը հրաժարվում է լոտն ստանալուց, ապա աճուրդային գործընթացը շարունակվում է:
8. Եթե միևնույն պարտապանի գույքի նկատմամբ կան բռնագանձման մասին երկու կամ ավելի կատարողական թերթեր, ապա լոտը պահանջատերերին առաջարկվում է «Դատական ակտերի հարկադիր կատարման մասին» Հայաստանի Հանրապետության օրենքի 70-71-րդ հոդվածներով սահմանված կարգով:
9. Եթե պահանջատերը համաձայնվում է ստանալ գույքը (լոտ), ապա նրա և հարկադիր կատարողի միջև կնքվում է գույքը հանձնելու մասին համապատասխան պայմանագիր: Գույքը (լոտ) պահանջատիրոջը հանձնվում է վերջինիս կողմից աճուրդի ծախսերը ծառայությանը վճարելուց հետո:
10. Եթե լոտի մեկնարկային գինը գերազանցում է դատական ակտով որոշված պարտքի չափը, ապա պահանջատերը, մինչև պայմանագիրը կնքելը և լոտը հանձնելը, պարտավոր է պարտապանին վճարել հանձնվող լոտի մեկնարկային գնի ու դատական ակտով որոշված պարտքի միջև եղած տարբերությունը:
(35-րդ հոդվածը լրաց. 04.05.05 ՀՕ-90-Ն)