ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԿԱՌԱՎԱՐՈՒԹՅԱՆՆ ԱՌԸՆԹԵՐ
ՀԱՐԿԱՅԻՆ ՊԵՏԱԿԱՆ ԾԱՌԱՅՈՒԹՅԱՆ ՊԵՏ
2 փետրվարի 2005 թ. N 1
ՊԱՇՏՈՆԱԿԱՆ ՊԱՐԶԱԲԱՆՈՒՄ
ՊԱՐԶԵՑՎԱԾ ՀԱՐԿ ՎՃԱՐՈՂ ՀԱՄԱՐՎԵԼՈՒ ՀԱՄԱՐ «ՓՈԽԿԱՊԱԿՑՎԱԾ ԱՆՁ» ՀԱՍԿԱՑՈՒԹՅԱՆ ԿԻՐԱՌՄԱՆ ՇՐՋԱՆԱԿՆԵՐԻ ՎԵՐԱԲԵՐՅԱԼ
«Պարզեցված հարկի մասին» Հայաստանի Հանրապետության օրենքի 4-րդ հոդվածի 3-րդ մասի «ժ» կետի համաձայն՝ պարզեցված հարկ վճարող չի կարող համարվել այն առևտրային կազմակերպությունը կամ անհատ ձեռնարկատերը, որը փոխկապակցված է այլ պարզեցված հարկ վճարողի հետ: Հաշվի առնելով, որ ՀՀ օրենսդրության մեջ «փոխկապակցված անձ» հասկացությունը ներառում է նաև ազգակցական կապը (ամուսիններ, ծնողներ, երեխաներ, եղբայրներ, քույրեր), ապա տարաբնույթ է ընկալվում նշված իրավական ակտի դրույթները` Հայաստանի Հանրապետությունում պարզեցված հարկ վճարող առևտրային կազմակերպության և անհատ ձեռնարկատիրոջ փոխկապակցված անձ լինելու առումով:
«Իրավական ակտերի մասին» Հայաստանի Հանրապետության օրենքի 87-րդ հոդվածի 2-րդ մասի համաձայն՝ իրավական ակտի պաշտոնական պարզաբանումը տրվում է իրավական ակտի պաշտոնական մեկնաբանման համար նախատեսված կանոններով, իսկ նշված օրենքի 86-րդ հոդվածի 1-ին մասի համաձայն իրավական ակտի մեկնաբանությամբ չպետք է փոփոխվի դրա իմաստը:
Հաշվի առնելով վերը նշվածը, պաշտոնապես պարզաբանում եմ.
1. «Պարզեցված հարկի մասին» Հայաստանի Հանրապետության օրենքի փոփոխություններով փոխկապակցված անձանց ինստիտուտի ներդրման հիմքում դրված է ձեռնարկատիրական գործունեության վրա վարչարարական և (կամ) փայատիրական ձևերով ազդեցություն ունենալու սկզբունքը:
2. Ձեռնարկատիրական գործունեության վրա վարչարարական և (կամ) փայատիրական ձևերով ազդեցություն ունենալու սկզբունքը նպատակ ունի բացառել ձեռներեցության տրոհումը մի քանի տնտեսավարող սուբյեկտների` պարզեցված հարկ վճարող համարվելու համար:
3. «Փոխկապակցված անձ» հասկացությունը պետք է կիրառվի «Հարկերի մասին» Հայաստանի Հանրապետության օրենքի 11.1 -րդ հոդվածով նախատեսված իմաստով` «Պարզեցված հարկի մասին» Հայաստանի Հանրապետության օրենքի 4-րդ հոդվածի 3-րդ մասի «թ» կետի համադրմամբ: Այսպես, «Պարզեցված հարկի մասին» Հայաստանի Հանրապետության օրենքի 4-րդ հոդվածի 3-րդ մասի «ժ» կետի համաձայն պարզեցված հարկ վճարող չեն կարող համարվել՝
- այն առևտրային կազմակերպությունները, որոնց կանոնադրական կապիտալի 50% և ավելի փայաբաժինը (բաժնետոմսը, բաժնեմասը) պատկանում է պարզեցված հարկ վճարողին, կամ՝
- այն առևտրային կազմակերպությունները, որոնց կանոնադրական կապիտալի 50% և ավելի փայաբաժինը (բաժնետոմսը, բաժնեմասը) պատկանում է այն աձին, որին միաժամանակ պատկանում է պարզեցված հարկ վճարող այլ առևտրային կազմակերպության կանոնադրական կապիտալի 50% և ավելի փայաբաժինը (բաժնետոմսը, բաժնեմասը):
Հաշվի առնելով վերը նշվածը, «Պարզեցված հարկի մասին» Հայաստանի Հանրապետության օրենքում կիրառվող «փոխկապակցված անձ» հասկացությունը չի ներառում ազգակցական կապը, այսինքն՝ չի կարող տարածվել ամուսինների, ծնողների, երեխաների, եղբայրների կամ քույրերի վրա:
ՀՀ կառավարությանն առընթեր
հարկային պետական
ծառայության պետի տեղակալ,
հարկային ծառայության
առաջին դասի խորհրդական` Ա. Ալավերդյան