Հոդված 32. Ֆինանսական հաշվետվություններին ներկայացվող պահանջները

Հոդված 32. Ֆինանսական հաշվետվություններին ներկայացվող պահանջները

1. Հանձնաժողովն իրավունք ունի իր որոշմամբ սահմանել հաշվետու թողարկողների ֆինանսական հաշվետվություններին ներկայացվող պահանջները, դրանք կազմելու և հրապարակելու կարգը: Հաշվետու թողարկողների և նրանց հետ փոխկապակցված անձանց ֆինանսական հաշվետվությունների կոնսոլիդացիայի կարգը սահմանվում է Հանձնաժողովի որոշմամբ:

2. Հանձնաժողովն իր խնդիրներն իրականացնելու նպատակով իրավունք ունի սահմանել հաշվետու թողարկողների ֆինանսական հաշվետվությունների աուդիտն իրականացնող անձանց ներկայացվող լրացուցիչ պահանջներ` աուդիտորական գործունեության իրականացման աշխատանքներում ներգրավված մասնագետների քանակի, աուդիտորական գործունեության իրականացման աշխատանքներում ներգրավված, Հայաստանի Հանրապետության օրենսդրությամբ սահմանված կարգով որակավորում ստացած աուդիտորների քանակի և աուդիտորական գործունեությունից ստացված տարեկան հասույթի վերաբերյալ:

3. Հանձնաժողովի կողմից սույն հոդվածի 1-ին կետին համապատասխան սահմանված պահանջները և կարգերը չպետք է հակասեն թողարկողների որևէ տեսակի կամ խմբի ֆինանսական հաշվետվություններին օրենքներով ներկայացվող պահանջներին:

Եթե օրենքներով որևէ մարմնին հաշվետու թողարկողների որևէ խմբի նկատմամբ սույն հոդվածով սահմանված իրավասություն է վերապահված (բացի հաշվապահական հաշվառման ընդհանուր կիրառության չափանիշների ու կանոնների), ապա այդ խմբի ֆինանսական հաշվետվություններին ներկայացվող պահանջները և դրանք կազմելու մեթոդներն ու հրապարակման կարգը սահմանվում են տվյալ մարմնի և Հանձնաժողովի համատեղ հաստատված որոշմամբ:

(32-րդ հոդվածը խմբ. 26.12.02 ՀՕ-514-Ն)