Հ Ա Մ Ա Ձ Ա Յ Ն Ա Գ Ի Ր
Պատմական և մշակութային արժեքները ծագման պետություններ վերադարձնելու մասին
Համագործակցության մասնակից պետությունները,
գիտակցելով այն նշանակությունը, որ ծագման երկրները տալիս են իրենց հոգևոր, մշակութային և պատմական ժառանգության անբաժանելի մաս հանդիսացող մշակութային արժեքների վերադարձմանը,
նկատի ունենալով մշակութային արժեքների վերադարձման կամ վերադարձման իրավունքի վերականգնման մասին դրանց ծագման երկրներին ՄԱԿ-ի Գլխավոր խորհրդաժողովի բանաձևի, ինչպես նաև 1970 թվականի նոյեմբերի 14-ի «Մշակութային արժեքների ներկրումը, արտահանումը և սեփականության իրավունքի փոխանցումն արգելող և կանխող միջոցների մասին» Կոնվենցիայի դրույթները,
հաստատելով, որ ժողովուրդներին իրենց արվեստի գործերի, հուշարձանների, թանգարանային նմուշների, արխիվների, ձեռագրերի, փաստաթղթերի և մշակութային ու պատմական հազվագյուտ իրերի վերադարձը կծառայի մշակութային արժեքների պահպանման և հետագա զարգացման, ազգային մշակույթի վերածննդի ազնվաբարո խնդրին և կնպաստի անկախ պետությունների միջև համագործակցության ամրապնդմանը,
համաձայնեցին ներքոհիշյալի մասին.
Հ ո դ վ ա ծ 1
Մասնակից պետությունները կնպաստեն պատմական և մշակութային արժեքները ծագման երկրներ վերադարձնելուն:
Հ ո դ վ ա ծ 2
Մասնակից պետությունները, հավասարության հիմունքներով, հիմնում են միջկառավարական հանձնաժողով, Համագործակցության մասնակից պետությունների պատմական և մշակութային արժեքների վերադարձման գործնական աշխատանքի և մեխանիզմի ստեղծման, վերադարձման ենթակա պատմական և մշակութային արժեքների կատեգորիաների որոշման համար:
Հ ո դ վ ա ծ 3
Մասնակից պետությունները հիմնում են ազգային հանձնաժողովներ ինչպես համապատասխան պետության տարածքում, այնպես էլ Համագործակցության մյուս մասնակից պետություններում գտնվող պատմական և մշակութային արժեքների կանոնավոր ցուցակներ կազմելու համար:
Հ ո դ վ ա ծ 4
Մասնակից պետությունները ազգային հանձնաժողովների փորձագետներին հնարավորություն կընձեռեն` ծանոթանալու միմյանց պետական թանգարանների, գրադարանների և արխիվների հիմնադրամների հետ:
Հ ո դ վ ա ծ 5
Մասնակից պետությունները կապահովեն ազգային փոքրամասնությունների և Համագործակցության մյուս մասնակից պետությունների ժողովուրդների մշակութային ժառանգության պատշաճ պահպանությունը, ներառյալ պատմական, կրոնական և մշակութային հուշարձաններինը այն վիճակում, որում դրանք գտնվում են ներկայումս:
Հ ո դ վ ա ծ 6
Մասնակից պետությունները կնպաստեն իրենց համապատասխան մշակույթների վերաբերյալ փոխադարձ գիտելիքների ընդլայնմանը: Նրանք նաև կխրախուսեն համագործակցությունն ու փոխանակումները մշակույթի և ստեղծագործական գործունեության բոլոր բնագավառներում:
Հ ո դ վ ա ծ 7
Համաձայնագիրն ուժի մեջ է մտնում ստորագրման պահից:
Համաձայնագրի բնօրինակը ի պահ է տրվում Բելառուսի Հանրապետության կառավարությանը, որը կլինի դրա ավանդապահը:
Կատարված է Մինսկ քաղաքում 1992 թվականի փետրվարի 14-ին, մեկ բնօրինակով, մասնակից պետությունների պետական լեզուներով, ընդ որում բոլոր տեքստերը հավասարազոր են:
* Համաձայնագիրը Հայաստանի Հանրապետության համար ուժի մեջ է մտել 1992 թվականի փետրվարի 14-ից: