Հ Ա Մ Ա Ձ Ա Յ Ն Ա Գ Ի Ր
Անկախ Պետությունների Համագործակցության մասնակից պետությունների պետական սահմանների և ծովային տնտեսական գոտիների պահպանության մասին
Սույն Համաձայնագրի մասնակից պետությունները, այսուհետ` Համագործակցության մասնակից պետություններ,
համաձայն 1991 թվականի դեկտեմբերի 30-ի՝ Զինված ուժերի և սահմանապահ զորքերի մասին Անկախ Պետությունների Համագործակցության մասնակից պետությունների ղեկավարների խորհրդի Համաձայնագրի,
ելնելով Համագործակցության մասնակից պետությունների պետական սահմանների և ծովային տնտեսական գոտիների պահպանության շահերի համար փոխընդունելի որոշումների իրականացման անհրաժեշտությունից` հաշվի առնելով այդ սահմանների անձեռնմխելիության ապահովման ձևավորված համակարգը և սկզբունքները,
համաձայնեցին ներքոհիշյալի մասին.
Հ ո դ վ ա ծ 1
Սույն Համաձայնագրում ներքոհիշյալ հասկացությունները նշանակում են.
1. «Անկախ Պետությունների Համագործակցության մասնակից պետությունների պետական սահմաններ»` Համագործակցության մասնակից անկախ պետությունների պետական սահմանների հատվածները Համագործակցության կազմի մեջ չմտնող պետությունների հետ,
2. «Սահմանապահ զորքեր»` Համագործակցության և պետությունների սեփական Սահմանապահ զորքերի կազմավորումներ,
3. «Սեփական սահմանապահ զորքեր»` Համագործակցության մասնակից պետությանը պատկանող սահմանապահ զորքերի կազմավորումներ,
4. «Համագործակցության սահմանապահ զորքեր»` սեփական սահմանապահ զորքերին չվերաբերող սահմանապահ զորքերի կազմավորումներ:
Հ ո դ վ ա ծ 2
Համագործակցության մասնակից պետությունների պետական սահմանների և ծովային տնտեսական գոտիների պահպանությունը իրականացնում են Համագործակցության կամ պետությունների սեփական սահմանապահ զորքերը:
Հ ո դ վ ա ծ 3
Համագործակցության մասնակից պետությունները, իրենց անվտանգության նկատառումներից ելնելով, պարտավորվում են պետական սահմանի վրա և ծովային տնտեսական գոտիներում գործողություններ չձեռնարկել, որոնք վնաս են հասցնում Համագործակցության մյուս մասնակից պետությունների քաղաքական, տնտեսական և այլ շահերին: Պետական սահմանների ռեժիմի սահմանումը և փոփոխումը իրականացվում է փոխադարձ պայմանավորվածությամբ, սահմանակից պետությունների հետ` հաշվի առնելով Համագործակցության մասնակից պետությունների շահերը:
Հ ո դ վ ա ծ 4
Համագործակցության մասնակից պետությունների պետական սահմանների և ծովային տնտեսական գոտիների պահպանության ոլորտում Անկախ Պետությունների Համագործակցության բարձրագույն համակարգող մարմին է հանդիսանում Պետությունների ղեկավարների խորհուրդը: Պետական սահմանների և ծովային տնտեսական գոտիների պահպանության ապահովման համար միջոցառումների համակարգումը իրականացնում է Կառավարությունների ղեկավարների խորհուրդը:
Համագործակցության մասնակից պետությունների պետական սահմանների, ծովային տնտեսական գոտիների պահպանության հարցերով պետությունների ղեկավարների խորհրդի և Կառավարությունների ղեկավարների խորհրդի որոշումների իրականացումը և Սահմանապահ զորքերի գործունեության համակարգումը իրականացնում է Սահմանապահ զորքերի միացյալ հրամանատարությունը:
Միացյալ հրամանատարության Կանոնադրությունը հաստատում է պետությունների ղեկավարների Խորհուրդը:
Համագործակցության Սահմանապահ զորքերի ղեկավարությունը իրականացնում է պետությունների ղեկավարների Խորհրդի կողմից նշանակված Սահմանապահ զորքերի գլխավոր հրամանատարը:
Հ ո դ վ ա ծ 5
Մինչև Համագործակցության մասնակից պետությունների կողմից սահմանների, ծովային տնտեսական գոտիների և դրանց ռեժիմի մասին միջպետական համաձայնագրերի կնքումը, Սահմանապահ զորքերի կազմակերպումը և գործունեությունը կարգավորվում է Համագործակցության ակտերով, պետությունների ազգային օրենսդրությամբ և դրանց չհակասող նախկին ԽՍՀՄ նորմատիվ ակտերով:
Համագործակցության Սահմանապահ զորքերի համալրման, ֆինանսավորման, նյութատեխնիկական ապահովման հարցերը և դրանց զինծառայողների սոցիալ-իրավական կարգավիճակը կանոնակարգվում է Համագործակցության մասնակից պետությունների հատուկ համաձայնագրերով:
Հ ո դ վ ա ծ 6
Սույն Համաձայնագիրը իր բոլոր մասնակիցների համաձայնությամբ բաց է Անկախ Պետությունների Համագործակցության մասնակից պետություններ չհանդիսացող պետությունների միանալու համար:
Կատարված է Կիև քաղաքում 1992 թվականի մարտի 20-ին, մեկ բնօրինակով, ռուսերեն: Բնօրինակը պահվում է Բելառուսի Հանրապետության կառավարության արխիվներում, որը սույն Համաձայնագիրը ստորագրած պետություններին կուղարկի Համաձայնագրի հաստատված պատճենները:
*Համաձայնագիրը Հայաստանի Հանրապետության համար ուժի մեջ է մտել 1992 թվականի մարտի 20-ից: