Հ Ա Մ Ա Ձ Ա Յ Ն Ա Գ Ի Ր
Անկախ Պետությունների Համագործակցության մասնակից պետությունների բնակչության շրջանում յոդի սղության վիճակների կանխարգելման մասին
Սույն Համաձայնագրի մասնակից պետությունների Կառավարությունները, այսուհետ՝ Կողմեր,
ընդունելով յոդի սղության վիճակների կանխարգելման հարցում համագործակցության կարևորությունը,
ելնելով յոդացված աղի և յոդացված սննդամթերքի որակի և անվտանգության, դրանց արտադրության, պահպանման, փոխադրման և իրացման նկատմամբ ազգային պետական հսկողության փոխկապակցված և փոխընդունելի համակարգի շրջանակներում աշխատանքների իրականացման անհրաժեշտությունից,
նշելով Անկախ Պետությունների Համագործակցության շրջանակներում բնակչության շրջանում զանգվածային լրատվության միջոցներով յոդի սղության վիճակների կանխարգելման հիմունքների վերաբերյալ ակտիվ քարոզչության իրականացման անհրաժեշտությունը,
համաձայնեցին ներքոհիշյալի մասին.
Հ ո դ վ ա ծ 1
Կողմերն իրականացնում են Անկախ Պետությունների Համագործակցության մասնակից պետությունների բնակչության շրջանում յոդի սղության վիճակների կանխարգելման համաձայնեցված քաղաքականություն:
Հ ո դ վ ա ծ 2
Կողմերը, յոդացված մթերքներում յոդի պարունակության հսկողության միասնական մեթոդներ մշակելիս, ինչպես նաև յոդի որոշման սարքավորումներ և սարքեր ստեղծելիս, ապահովում են պետական սանիտարահամաճարակային հսկողության մարմինների կողմից ներկայացվող պահանջների ներդաշնակությունն ու միասնությունը:
Հ ո դ վ ա ծ 3
Կողմերն իրականացնում են համաձայնեցված կազմակերպչական, կանխարգելիչ միջոցառումներ՝ ուղղված բնակչության շրջանում յոդի սղության վիճակների նվազեցմանը:
Հ ո դ վ ա ծ 4
Կողմերը մշակում և ընդունում են յոդացված աղի ու յոդացված մթերքի, յոդ պարունակող պատրաստուկների արտադրությունը, գնումները, իրացումը, դրանց որակի ու անվտանգության հսկողությունը և յոդի սղությամբ պայմանավորված հիվանդությունների նվազեցման այլ եղանակները կարգավորող փոխհամաձայնեցված որոշումներ:
Հ ո դ վ ա ծ 5
Կողմերը փոխանակում են յոդի սղության վիճակների կանխարգելման հարցերի վերաբերյալ նորմատիվ-իրավական փաստաթղթերը, յոդացված աղում և յոդացված մթերքում յոդի պարունակության վերաբերյալ գործող ազգային նորմատիվները, ինչպես նաև յոդացված մթերքի նոր տեսակների, դրանցում յոդի պարունակության նորմատիվների և հսկողության միասնական մեթոդների մշակման փորձը:
Հ ո դ վ ա ծ 6
Կողմերն իրականացնում են յոդի սղությամբ պայմանավորված հիվանդությունների մոնիթորինգի համակարգի մշակում և ներդրում:
Հ ո դ վ ա ծ 7
Կողմերը մշակում և համաձայնեցնում են յոդացված աղի օգտագործման հանձնարարականներ, ինչպես նաև յոդացված մթերք օգտագործելիս սնուցման հանձնարարականներ:
Հ ո դ վ ա ծ 8
Կողմերը յոդացված աղի և յոդացված սննդամթերքի ներկրման նկատմամբ պետական սանիտարահամաճարակային մարմինների կողմից հսկողություն իրականացնելիս ելնում են Կողմերի պետությունների տարածքներում գործող սանիտարական կանոնների ու նորմերի գերակայությունից:
Հ ո դ վ ա ծ 9
Կողմերը սահմանում են, որ ներկրվող յոդացված մթերքի մատակարարման և իրացման համար պարտադիր պայման է դրանց որակը և անվտանգությունը հավաստող արտահանող երկրի ուղեկցող փաստաթղթերի՝ արտադրողի (մատակարարողի) և մատակարարող երկրի պաշտոնապես լիազորված մարմինների սերտիֆիկատների և/կամ սպեցիֆիկացիաների առկայությունը:
Հ ո դ վ ա ծ 10
Ներկրող երկրի ազգային պահանջներին չհամապատասխանող ներկրվող (արտահանվող) յոդացված աղի և յոդացված սննդամթերքի հայտնաբերման դեպքերում, Կողմերը ձեռնարկում են անհրաժեշտ միջոցներ դրանց հետագա իրացումը կանխարգելելու համար: Կողմերի պետական սանիտարահամաճարակային հսկողության մարմինները պետք է օպերատիվ կարգով միմյանց տեղեկացնեն արտադրանքի խոտանման փաստերի մասին և կատարեն անորակ արտադրանքի թողարկման պատճառների հետաքննություն:
Հ ո դ վ ա ծ 11
Սույն Համաձայնագիրը բաց է միանալու համար իրենց մասնակցությունում շահագրգիռ և սույն Համաձայնագրից բխող պարտավորությունները ստանձնելու պատրաստ այլ պետությունների համար՝ ավանդապահին միանալու վերաբերյալ փաստաթղթի փոխանցման միջոցով:
Միացող պետության համար սույն Համաձայնագիրն ուժի մեջ է մտնում ավանդապահի կողմից տվյալ ծանուցագիրը ստանալու օրից:
Հ ո դ վ ա ծ 12
Կողմերի փոխադարձ պայմանավորվածությամբ սույն Համաձայնագրում կարող են կատարվել փոփոխություններ և լրացումներ՝ ձևակերպված առանձին արձանագրություններով, որոնք ուժի մեջ են մտնում սույն Համաձայնագրի 15-րդ Հոդվածով նախատեսված կարգով:
Հ ո դ վ ա ծ 13
Սույն Համաձայնագրի կիրառման կամ մեկնաբանման հետ կապված վիճելի հարցերը լուծվում են շահագրգիռ Կողմերի միջև բանակցությունների և խորհրդակցությունների միջոցով:
Հ ո դ վ ա ծ 14
Սույն Համաձայնագիրը գործում է ուժի մեջ մտնելու օրվանից 5 տարվա ընթացքում:
Այդ ժամկետը լրանալուց հետո Համաձայնագիրն ինքնաբերաբար երկարաձգվում է հաջորդ հնգամյա ժամանակաշրջանով, եթե Կողմերն այլ որոշում չեն ընդունում:
Յուրաքանչյուր Կողմ կարող է դուրս գալ սույն Համաձայնագրից` դուրս գալուց ոչ ուշ, քան 6 ամիս առաջ գրավոր ծանուցում ուղարկելով ավանդապահին:
Հ ո դ վ ա ծ 15
Սույն Համաձայնագիրն ուժի մեջ է մտնում ստորագրման օրվանից, իսկ այն Կողմերի համար, որոնց օրենսդրությունը պահանջում է Համաձայնագրի ուժի մեջ մտնելու համար անհրաժեշտ ներպետական ընթացակարգի կատարում՝ համապատասխան փաստաթղթերը ավանդապահին հանձնելու օրվանից:
Նման ընթացակարգերի կատարման անհրաժեշտության մասին Կողմերը տեղեկացնում են ավանդապահին սույն Համաձայնագրի ստորագրման օրվանից 3 ամսվա ընթացքում:
Կատարված է Մինսկ քաղաքում 2001 թվականի մայիսի 31-ին մեկ բնօրինակից` ռուսերեն: Բնօրինակը պահվում է Անկախ Պետությունների Համագործակցության Գործադիր կոմիտեում, որը սույն Համաձայնագիրը ստորագրած յուրաքանչյուր պետությանը կուղարկի դրա հաստատված պատճենը:
*Համաձայնագիրը Հայաստանի Հանրապետության համար ուժի մեջ է մտել 2002 թվականի մարտի 21-ից: