«Գրանցված է»
ՀՀ արդարադատության
նախարարության կողմից
28 նոյեմբերի 2014 թ.
Պետական գրանցման թիվ 60514543
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՔԱՂԱՔԱՑԻԱԿԱՆ ԾԱՌԱՅՈՒԹՅԱՆ ԽՈՐՀՈՒՐԴ
18 նոյեմբերի 2014 թ.
ք. Երևան N 1073-Ն
Ո Ր Ո Շ ՈՒ Մ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔԱՂԱՔԱՑԻԱԿԱՆ ԾԱՌԱՅՈՒԹՅԱՆ ԽՈՐՀՐԴԻ 2010 ԹՎԱԿԱՆԻ ՀՈԿՏԵՄԲԵՐԻ 12-Ի N 818-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ
Ղեկավարվելով «Քաղաքացիական ծառայության մասին» Հայաստանի Հանրապետության օրենքի 14-րդ հոդվածի 12-րդ մասով՝ Հայաստանի Հանրապետության քաղաքացիական ծառայության խորհուրդը որոշում է.
1. Հայաստանի Հանրապետության քաղաքացիական ծառայության խորհրդի 2010 թվականի հոկտեմբերի 12-ի «Քաղաքացիական ծառայության կրտսեր պաշտոն զբաղեցնելու հավաստագիր ստանալու համար թեստավորում անցկացնելու և քաղաքացիական ծառայության կրտսեր թափուր պաշտոն զբաղեցնելու կարգը սահմանելու մասին» N 818-Ն որոշմամբ սահմանված N 1 հավելվածում`
1) 20-րդ կետն ուժը կորցրած ճանաչել.
2) 21-րդ կետից հետո լրացնել հետևյալ բովանդակությամբ նոր` 21.1-ին կետով.
«21.1. Թեստավորման հանձնաժողովը, թեստավորման ավարտից հետո արխիվացնում է յուրաքանչյուր խմբի համար ձևավորված թեստային առաջադրանքների մեկ օրինակը, իսկ մյուս օրինակները ոչնչացնում է:».
3) 33-րդ կետից հետո լրացնել հետևյալ բովանդակությամբ նոր` 33.1-ին կետով.
«33.1. Եթե պարզվում է, որ թեստավորմանը մասնակցելու համար քաղաքացին Խորհրդի աշխատակազմ է ներկայացրել սույն կարգի 9-րդ կետի 2-րդ ենթակետով նախատեսված իր անձնական տվյալների վերաբերյալ կեղծ տեղեկատվություն, քաղաքացու Հավաստագրի գործողությունը Խորհրդի որոշմամբ դադարեցվում է և քաղաքացին հանվում է Հավաստագիր ունեցող քաղաքացիների ցուցակից:».
4) 34-րդ կետը «հայտարարություն» բառից հետո լրացնել «` քաղաքացիական ծառայության կրտսեր թափուր պաշտոնը զբաղեցնելու համար» բառերով.
5) 37-րդ կետից հետո լրացնել հետևյալ բովանդակությամբ նոր` 37.1-ին կետով.
«37.1. Սույն կարգի 37-րդ հոդվածով նախատեսված հիմքերով քաղաքացիական ծառայության կրտսեր թափուր պաշտոնը չհամալրվելու դեպքում` քաղաքացիական ծառայության կրտսեր թափուր պաշտոնը զբաղեցնելու համար հաջորդ հայտարարությունը համապատասխան մարմինը սույն կարգի 34-րդ կետով սահմանված կարգով հրապարակում է այդ ժամկետի ավարտին հաջորդող տասն աշխատանքային օրվա ընթացքում կամ տեղեկացնելով Խորհրդին` հաջորդ թեստավորման ավարտից հետո հինգերորդ աշխատանքային օրվան հաջորդող տասն աշխատանքային օրվա ընթացքում:» բառերով:
2. Սույն որոշումն ուժի մեջ է մտնում 2015 թվականի հունվարի 1-ից:
ՀՀ քաղաքացիական ծառայության
խորհրդի նախագահ Մ. Բադալյան