Հ Ա Մ Ա Ձ Ա Յ Ն Ա Գ Ի Ր
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ՀՈՒՆԳԱՐԻԱՅԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ ԱՌԵՎՏՐԱՏՆՏԵՍԱԿԱՆ ԿԱՊԵՐԻ ՎԵՐԱԲԵՐՅԱԼ
Հայաստանի Հանրապետության կառավարությունը և Հունգարիայի Հանրապետության կառավարությունը, այսուհետ` Պայմանավորվող կողմեր,
գիտակցելով Հայաստանի Հանրապետության և Հունգարիայի Հանրապետության միջև առևտրատնտեսական կապերի կարևորությունը,
ելնելով երկու երկրների միջև փոխշահավետ, բազմակողմ հարաբերությունների ստեղծմանը նպաստելու և նրանց համաշխարհային տնտեսավարության ընթացքին, ինչպես նաև միջազգային շուկայի պրակտիկային և նորմերին մոտեցնելու նկատառումից,
ձգտելով Հայաստանի Հանրապետության և Հունգարիայի Հանրապետության տնտեսությունների աստիճանական միասնականացմանը համաշխարհային տնտեսական հարաբերություններին և, ամենից առաջ, եվրոպական տնտեսական կառույցներին,
փոխադարձ տնտեսական կապերի իրականացման ժամանակ առաջնորդվելով հավասարության, փոխադարձ շահավետության սկզբունքներով և միջազգային իրավունքի նորմերով,
համաձայնեցին ներքոհիշյալի վերաբերյալ.
ՀՈԴՎԱԾ 1
Պայմանավորվող կողմերը պատրաստակամություն են հայտնում ուղիղ փոխադարձ առևտրատնտեսական կապերի ստեղծման և զարգացման համար:
Պայմանավորվող կողմերը կաջակցեն արտաքին տնտեսական կապերի մասնակիցների (այսուհետ` Սուբյեկտներ), միջև փոխադարձ տնտեսական և առևտրական հարաբերությունների զարգացմանը յուրաքանչյուր Կողմի օրենսդրությանը համապատասխան:
ՀՈԴՎԱԾ 2
Պայմանավորվող կողմերը երկու երկրների միջև առևտուրը հեշտացնելու նպատակով փոխադարձաբար առավել բարենպաստության կարգավիճակ կտրամադրեն, քան ցանկացած երրորդ երկրին տրամադրվածն է:
ՀՈԴՎԱԾ 3
Սույն Համաձայնագրի 2-րդ հոդվածի դրույթները չեն տարածվում այն առավելությունների վրա, որոնք`
ա) տրված են կամ կարող են տրվել Պայմանավորվող կողմերից մեկին` հարևան այլ երկրների կողմից սահմանամերձ առևտուրը հեշտացնելու նպատակով,
բ) տրված են կամ կարող են տրվել Պայմանավորվող կողմերից որևէ մեկին` առևտրի ազատ գոտիներում, մաքսային կամ այլ տարածաշրջանային պայմանագրերին մասնակցելու հետևանքով:
ՀՈԴՎԱԾ 4
Ապրանքների և ծառայությունների մատակարարումները կիրականացվեն մի կողմից` Հայաստանի Հանրապետության և, մյուս կողմից` Հունգարիայի Հանրապետության Սուբյեկտների միջև կնքվող պայմանագրերի հիման վրա:
ՀՈԴՎԱԾ 5
Սուբյեկտները հաշվարկները և վճարումները իրականացնում են ազատ փոխարկելի արժույթով` կիրառելով ընթացիկ համաշխարհային գները և միջազգային առևտրում ու ֆինանսական պրակտիկայում ընդունված պայմանները:
Սույն Համաձայնագրով հաշվարկները Պայմանավորվող կողմերի փոխադարձ համաձայնությամբ կարող են իրականացվել միջազգային բանկային պրակտիկայում ընդունված ցանկացած ձևով:
ՀՈԴՎԱԾ 6
Ձևավորված և երկու Պայմանավորվող կողմերի համար անհրաժեշտ առևտրատնտեսական կապերի պահպանման նպատակով կարող են կազմվել ինդիկատիվ ցուցակներ, որոնք կընդգրկեն առաջնակարգ նշանակություն ունեցող ապրանքների և ծառայությունների անվանացանկը և ծավալները:
ՀՈԴՎԱԾ 7
Պայմանավորվող կողմերի լիազորված բանկերը սույն Համաձայնագրի կնքումից հետո մեկ ամսվա ընթացքում համաձայնեցնում և հաստատում են սույն Համաձայնագրից բխող գործառնությունների բանկային ապահովման տեխնիկական կարգը: Այդ նպատակով վերը նշված բանկերը կնքում են միջբանկային համաձայնագիր:
ՀՈԴՎԱԾ 8
Պայմանավորվող կողմերը որոշում են, որ սույն Համաձայնագրի մեկնաբանման, իրագործման կամ կիրառման ժամանակ ծագած տարաձայնությունները, ինչպես նաև սույն Համաձայնագրից բխող բոլոր այլ հարցերը պետք է լուծվեն երկկողմ բանակցությունների ճանապարհով:
ՀՈԴՎԱԾ 9
Պայմանավորվող կողմերի լիազորված ներկայացուցիչները սույն Համաձայնագրի կատարման ընթացքին հետևելու նպատակով, անհրաժեշտությունից ելնելով, կհանդիպեն հաջորդաբար Երևանում և Բուդապեշտում:
ՀՈԴՎԱԾ 10
Սույն Համաձայնագրում կարող են փոփոխություններ կամ լրացումներ մտցվել միայն Պայմանավորվող կողմերի փոխադարձ համաձայնությամբ:
ՀՈԴՎԱԾ 11
Սույն Համաձայնագիրը կնքվում է անորոշ ժամկետով:
Պայմանավորվող կողմերից յուրաքանչյուրը կարող է դադարեցնել սույն Համաձայնագրի գործողությունը` այդ մասին գրավոր ծանուցումով տեղյակ պահելով մյուս Պայմանավորվող կողմին:
Համաձայնագրի գործողությունը ընդհատվում է այդ մասին գրավոր ծանուցումից 6 ամիսը լրանալուց հետո:
Սույն Համաձայնագրի գործողությունը դադարելու դեպքում նրա դրույթները կկիրառվեն բոլոր այն պայմանագրերի նկատմամբ, որոնք կնքվել են սույն Համաձայնագրի գործողության ընթացքում, մինչև դրանցում նշված պարտավորությունների լրիվ կատարումը:
ՀՈԴՎԱԾ 12
Սույն Համաձայնագիրը ուժի մեջ է մտնում դրա հաստատման մասին Պայմանավորվող կողմերի իրավասու մարմինների գրավոր ծանուցումից հետո:
Կողմերը պայմանավորվել են կիրառել սույն Համաձայնագրի դրույթները այն ստորագրելուց անմիջապես հետո:
Կատարված է Բուդապեշտ քաղաքում 1992 թվականի ապրիլի 13-ին, երկու բնօրինակով, յուրաքանչյուրը` հայերեն, հունգարերեն և ռուսերեն:
Սույն Համաձայնագրի մեկնաբանման, իրագործման կամ կիրառման ժամանակ տարաձայնություններ առաջանալու դեպքում Պայմանավորվող կողմերը կղեկավարվեն Համաձայնագրի ռուսերեն տեքստով:
Համաձայնագիրն ուժի մեջ է մտել 1994 թվականի մայիսի 31-ից: