Հ Ա Մ Ա Ձ Ա Յ Ն Ա Գ Ի Ր
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԲԱՐՁՐԱԳՈՒՅՆ ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐՈՒԹՅԱՆ ԵՎ ՌՈՒՄԻՆԻԱՅԻ ՀԵՏԱԶՈՏՈՒԹՅԱՆ ԵՎ ՏԵԽՆՈԼՈԳԻԱՅԻ ՆԱԽԱՐԱՐՈՒԹՅԱՆ ՄԻՋԵՎ ԳԻՏԱԿԱՆ ԵՎ ՏԵԽՆՈԼՈԳԻԱԿԱՆ ՀԱՄԱԳՈՐԾԱԿՑՈՒԹՅԱՆ ՄԱՍԻՆ
Հայաստանի Հանրապետության բարձրագույն կրթության և գիտության նախարարությունը և Ռումինիայի հետազոտության և տեխնոլոգիայի նախարարությունը, այսուհետ` Կողմեր,
համաձայնեցին ներքոհիշյալի մասին.
ՀՈԴՎԱԾ 1
Սույն Համաձայնագրի պայմանների և յուրաքանչյուր երկրում գործող օրենսդրության ու կանոնակարգերի համաձայն` Կողմերը կաջակցեն և կզարգացնեն համագործակցություն երկու երկրների հետազոտական կազմակերպությունների, հաստատությունների և տեխնոլոգիական մարմինների միջև` գիտության և տեխնոլոգիայի բնագավառում:
ՀՈԴՎԱԾ 2
Համագործակցությունը մասնավորապես ընդգրկում է հետևյալ բնագավառները.
ա) համատեղ հետազոտություններ, ծրագրերի մշակում և նախագծում, ներառյալ դրանց արդյունքների փոխանակումը, ինչպես նաև այդ աշխատանքների հետ կապված գիտնականների ու հետազոտողների փոխանակում,
բ) մասնակցություն գիտական կոնֆերանսների, գիտաժողովների, դասընթացների, սեմինարների, ցուցահանդեսների և այլնի և դրանց կազմակերպում,
գ) գիտական և տեխնոլոգիական տեղեկության, փաստաթղթերի, սարքավորման և օգտագործվող նյութերի փոխանակում,
դ) յուրաքանչյուր երկրում հետազոտման և զարգացման (R&D) միջոցների ու գիտական սարքավորումների համատեղ օգտագործում,
ե) գիտական և տեխնիկական համագործակցության այլ ձևեր, որոնք կարող են փոխադարձ կերպով համաձայնեցվել:
ՀՈԴՎԱԾ 3
1. Սույն Համաձայնագիրն իրականացնելու նպատակով Կողմերը կստեղծեն համատեղ կոմիտե գիտական և տեխնոլոգիական համագործակցության ուղղությամբ:
2. Համատեղ կոմիտեի խնդիրներն հետևյալներն են.
ա) համաձայնության գալ համագործակցության բնագավառների շուրջ,
բ) սույն Համաձայնագրի կատարման համար ստեղծել նպաստավոր պայմաններ,
գ) հեշտացնել և աջակցել համատեղ ծրագրերի ու նախագծերի կատարմանը,
դ) կարծիքներ փոխանակել երկկողմ գիտական և տեխնոլոգիական համագործակցության ընդհանուր հեռանկարների շուրջ և քննարկել նոր առաջարկներ համագործակցության զարգացման ուղղությամբ:
3. Համատեղ կոմիտեն սովորաբար պետք է գումարվի երկու տարին մեկ անգամ` հաջորդաբար Հայաստանի Հանրապետությունում և Ռումինիայում, և կկնքի արձանագրություններ, որոնք կբովանդակեն համատեղ նստաշրջանների եզրակացություններն ու առաջարկությունները: Անհրաժեշտության դեպքում Համատեղ կոմիտեն կգումարվի նաև արտահերթ:
ՀՈԴՎԱԾ 4
Կողմերը կխրախուսեն ֆինանսական և այլ պայմանների հաստատումը, որը նպատակ ունի հասնելու երկարաժամկետ համագործակցության գիտական հաստատությունների, ընկերակցությունների, ընկերությունների և այլ հետազոտական ու զարգացման կենտրոնների միջև (այսուհետ` Համագործակցող գործընկերներ):
Համաձայնեցված նպատակների իրականացման նպատակով Համագործակցող գործընկերները ըստ թեմաների կկնքեն համատեղ գործունեության ծրագրեր:
ՀՈԴՎԱԾ 5
Սույն Համաձայնագրով նախատեսվող փորձագետների, գիտնականների և այլ մասնագետների փոխանակման ծախսերը կկատարվեն հետևյալ կարգով.
ՈՒղարկող կողմը վճարում է երկու երկրների միջև միջազգային փոխադրումների ծախսերը, իսկ Ընդունող կողմը հոգում է կեցության, հյուրընկալող երկրի ներսում ուղևորության և օրապահիկի ծախսերը` համաձայն յուրաքանչյուր երկրի կանոնակարգերի:
ՀՈԴՎԱԾ 6
Սույն Համաձայնագրով նախատեսված համագործակցությունից ստացված գիտական և տեխնոլոգիական տեղեկությունն առանց գործընկերների համաձայնության չպետք է միակողմանիորեն բացահայտվի առևտրական կամ արդյունաբերական նպատակով:
ՀՈԴՎԱԾ 7
Սույն Համաձայնագրի կատարման մեկնաբանման հետ կապված ցանկացած վեճ լուծվում է Համատեղ կոմիտեի շրջանակներում` Կողմերի միջև անցկացվող խորհրդակցությունների միջոցով:
ՀՈԴՎԱԾ 8
Սույն Համաձայնագրով նախատեսված համագործակցության կապակցությամբ յուրաքանչյուր Կողմ, համաձայն իր օրենսդրության և կանոնակարգերի, պետք է ձեռնարկի բոլոր անհրաժեշտ միջոցառումները հնարավոր լավագույն պայմաններ ապահովելու համար:
ՀՈԴՎԱԾ 9
1. Սույն Համաձայնագիրն ուժի մեջ կմտնի այն օրվանից, երբ Կողմերը կծանուցեն միմյանց, որ Համաձայնագիրն հաստատվել է յուրաքանչյուր երկրի ներպետական ընթացակարգերի համաձայն: Վերջին ծանուցման օրը կհամարվի Համաձայնագրի ուժի մեջ մտնելու ժամկետը:
2. Սույն Համաձայնագիրն ուժի մեջ է հինգ տարի ժամկետով և կերկարաձգվի հետագա երեք տարի ժամանակահատվածներով, եթե Կողմերից որևէ մեկը համապատասխան ժամկետը լրանալուց առնվազն վեց ամիս առաջ գրավոր ծանուցմամբ չդադարեցնի այն:
3. Համաձայնագրի դադարեցումը չպետք է վնասի սույն Համաձայնագրով նախաձեռնված և սույն Համաձայնագրի դադարեցման պահին անավարտ նախագծերի կամ ծրագրերի իրականացմանը:
Կատարված է Բուխարեստ քաղաքում 1994 թվականի սեպտեմբերի 20-ին, յուրաքանչյուրը` հայերեն, ռումիներեն և անգլերեն, ընդ որում բոլոր տեքստերն էլ հավասարազոր են: Տարբեր մեկնաբանությունների դեպքում առաջնայնությունը կտրվի անգլերեն տեքստին:
Համաձայնագիրն ուժի մեջ է մտել 1998 թվականի օգոստոսի 20-ից: