Հ Ա Մ Ա Ձ Ա Յ Ն Ա Գ Ի Ր
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԵՐՔԻՆ ԳՈՐԾԵՐԻ ՆԱԽԱՐԱՐՈՒԹՅԱՆ ԵՎ ՀՈՒՆԱՍՏԱՆԻ ՀԱՆՐԱՊԵՏՈՒԹՅԱՆ ՀԱՍԱՐԱԿԱԿԱՆ ԿԱՐԳԻ ՊԱՀՊԱՆՈՒԹՅԱՆ ՆԱԽԱՐԱՐՈՒԹՅԱՆ ՄԻՋԵՎ ՀԱՄԱԳՈՐԾԱԿՑՈՒԹՅԱՆ ՄԱՍԻՆ
Ներածություն
Հայաստանի Հանրապետության ներքին գործերի նախարարությունը և Հունաստանի Հանրապետության հասարակական կարգի պահպանության նախարարությունը, այսուհետ` Պայմանավորվող կողմեր, երկու պետությունների միջև առկա ավանդական բարեկամության ոգով իրենց ցանկությունն են արտահայտում համագործակցել իրենց իրավասության ոլորտներում, ինչպես նախատեսում է սույն Համաձայնագիրը:
Հարգելով երկու պետություններում գործող միջազգային Համաձայնագրերն ու օրենսդրությունները և ուժի մեջ թողնելով երրորդ պետությունների հետ երկկողմ և բազմակողմ Համաձայնագրերի հիման վրա իրենց վրա վերցրած պարտավորությունները, Պայմանավորվող կողմերը համաձայնեցին ներքոհիշյալի մասին.
ՀՈԴՎԱԾ 1
Պայմանավորվող կողմերը կհամագործակցեն և կապահովեն փոխօգնությունը հետևյալ բնագավառներում.
ա) պայքար միջազգային ահաբեկչության դեմ,
բ) պայքար թմրամիջոցների և հոգեներգործող նյութերի անօրինական արտադրության, օգտագործման և շրջանառության դեմ,
գ) պայքար կազմակերպված հանցավորության դեմ,
դ) պայքար փաստաթղթերի, դրամի կեղծման և այլ արժեքների նենգափոխման դեմ,
ե) պայքար զենքի, զինամթերքի, պայթուցիկ, քիմիական և ռադիոակտիվ նյութերի անօրինական օգտագործման դեմ,
զ) պայքար միջազգային անօրինական տնտեսական գործողությունների դեմ,
է) պայքար պատմական և մշակութային արժեք ներկայացնող առարկաների, թանկարժեք քարերի և մետաղների մաքսանենգության դեմ,
ը) հասարակական կարգի պահպանման և վերականգնման մեթոդների և եղանակների բարելավման,
թ) մեծ վտանգ ներկայացնող դեպքերում և մարդկանց կուտակման վայրերում հրդեհները կանխարգելելու և մարելու միջոցառումների բարելավման,
ժ) պայքար անօրինական ներգաղթի դեմ,
ժա) անձնակազմի ուսուցում և մասնագիտական պատրաստություն:
ՀՈԴՎԱԾ 2
Երկու Կողմերը կհամագործակցեն հետևյալ ուղղություններով.
ա) տեղեկության և փորձի փոխանակում 1-ին հոդվածում հիշատակված բնագավառներում,
բ) այնպիսի տվյալների հաղորդում, որոնք կօգնեն կանխելու կազմակերպված հանցավորությունը ընդհանուր առմամբ,
գ) փոխադարձ շահեր ներկայացնող միջոցառումների կազմակերպում և ձեռնարկում,
դ) փոխադարձ շահեր ներկայացնող բնագավառներում փորձագետների փոխանակում,
ե) փոխադարձ շահեր ներկայացնող բնագավառներում փաստաթղթերի, հրապարակումների և գիտական հետազոտությունների արդյունքների փոխանակում:
ՀՈԴՎԱԾ 3
Համագործակցության համակարգումը փոխադարձաբար իրականացնում են Հայաստանի Հանրապետության ներքին գործերի նախարարության Շտաբը և Հունաստանի Հանրապետության հասարակական կարգի պահպանության նախարարության Ոստիկանական համագործակցության միջազգային վարչությունը:
ՀՈԴՎԱԾ 4
Պայմանավորվող կողմերը կհամագործակցեն` փոխադարձ շահեր ներկայացնող գիտական ուսումնասիրություններ անցկացնելով: Այդ նպատակով նրանք կքննարկեն տվյալների մշակման, սարքավորումների, ապարատների և տեխնիկական հատուկ միջոցների տրամադրման գործում աջակցություն ցույց տալու հնարավորությունը:
ՀՈԴՎԱԾ 5
Տեղեկությունը փոխանակվում է ազգային օրենսդրությունների շրջանակներում: Պայմանավորվող կողմերից յուրաքանչյուրը կարող է հրաժարվել որևէ տեղեկություն տրամադրելուց, եթե համարում է, որ այն կարող է վնաս հասցնել իր ինքնիշխանությանը կամ ազգային անվտանգությանը կամ հակասում է երկրում գործող օրենսդրությանը: Մերժման մասին մյուս Պայմանավորվող կողմին տեղեկացվում է գրավոր: Սույն Համաձայնագրի շրջանակներում Պայմանավորվող կողմերից մեկի տված տեղեկատվությունը չի կարող հաղորդվել երրորդ կողմի առանց տեղեկություն տրամադրող Կողմի հետ նախնական համաձայնության:
ՀՈԴՎԱԾ 6
Փոխգործունեության արդյունավետությունը բարձրացնելու նպատակով Պայմանավորվող կողմերը կազմակերպում են փորձագետների հանդիպումներ նրանց իրավասությունների շրջանակներում, երբ նրանք երկուստեք համաձայն են, որ անհրաժեշտ է անհապաղ հաշվի նստել այնպիսի հատուկ երևույթների հետ, ինչպիսիք են ներգաղթողների զանգվածային հոսքը, թմրամիջոցների, զենքի և կազմակերպված հանցավորության այլ ձևերի պարբերական ապօրինի շրջանառությունը:
ՀՈԴՎԱԾ 7
Պայմանավորվող կողմերը պարտավորվում են համագործակցել անօրինական ներգաղթի դեմ պայքարում: Այդ շրջանակներում նրանք կարտաքսեն այն անձանց, ովքեր անօրինական ուղիներով անցել են Պայմանավորվող կողմերից մեկի սահմանը` ժամանելով Պայմանավորվող կողմերից մյուսի տարածք:
Մինչև արտաքսման մասին համաձայնագրի կնքումը Պայմանավորվող կողմերը կարտաքսեն այն քաղաքացիներին, որոնք ապօրինի բնակվում են մյուս Պայմանավորվող կողմի տարածքում: Նշված անձանց արտաքսելու դեպքում առնվազն 3 օր առաջ երկու Պայմանավորվող կողմերի համապատասխան դիվանագիտական ներկայացուցչությունները պետք է տեղեկացվեն այդ մասին:
ՀՈԴՎԱԾ 8
Պայմանավորվող կողմերը դիվանագիտական ուղիներով փոխադարձաբար հանձնում են նոր ճամփորդական փաստաթղթերի, կնիքների և ելքի հրավերների տեսակների նմուշները` անօրինական ճանապարհով սահմաններն անցնելը կանխելու և դրա դեմ պայքարելու համար:
ՀՈԴՎԱԾ 9
Պայմանավորվող կողմերից յուրաքանչյուրը, ելնելով ազգային անվտանգության, հասարակական կարգի կամ առողջապահության շահերից, ամբողջությամբ կամ մասնակիորեն դադարեցնում է սույն Համաձայնագրի կատարումը: Այդպիսի կասեցման կամ դրա դադարեցման մասին պետք է դիվանագիտական ուղիներով հաղորդվի մյուս Պայմանավորվող կողմին ցանկացած ժամանակ:
ՀՈԴՎԱԾ 10
Սույն Համաձայնագրի դրույթների կատարման կոնկրետ միջոցառումները, ժամկետները, ֆինանսները և պայմանները կորոշվեն երկու Կողմերի միջև փոխադարձ խորհրդակցություններից հետո:
Պատվիրակությունների փոխանակման ժամանակ հյուրընկալման ծախսերը իր վրա է վերցնում հյուրընկալ երկիրը: Ճանապարհածախսերը ներառված չեն:
ՀՈԴՎԱԾ 11
Սույն Համաձայնագրի կիրառումը կարող է դադարեցնել Պայմանավորվող յուրաքանչյուր կողմը` այդ մասին 30 օր առաջ դիվանագիտական ուղիներով մյուս Պայմանավորվող կողմին գրավոր ծանուցագիր ներկայացնելուց հետո:
ՀՈԴՎԱԾ 12
Սույն Համաձայնագիրն ուժի մեջ է մտնում Պայմանավորվող կողմերի ազգային օրենսդրությամբ սահմանված կարգով համապատասխան ընթացակարգերն անցնելու մասին դիվանագիտական ուղիներով վերջին ծանուցումից 30 օր անց:
Կատարված է Աթենք քաղաքում 1996 թվականի հունիսի 18-ին, երկու բնօրինակով` հայերեն, հունարեն և անգլերեն, երկու տեքստերն էլ հավասարազոր են: Սույն Համաձայնագրի տեքստի մեկնաբանման անհամաձայնության դեպքում նախապատվությունը կտրվի անգլերեն տեքստին:
Համաձայնագիրն ուժի մեջ է մտել 1997 թվականի հոկտեմբերի 25-ից: