Հ Ա Մ Ա Ձ Ա Յ Ն Ա Գ Ի Ր
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ԹՈՒՐՔՄԵՆՍՏԱՆԻ ԿԱՌԱՎԱՐՈՒԹՅԱՆ ՄԻՋԵՎ ԱՌՈՂՋԱՊԱՀՈՒԹՅԱՆ ԲՆԱԳԱՎԱՌՈՒՄ ՀԱՄԱԳՈՐԾԱԿՑՈՒԹՅԱՆ ՄԱՍԻՆ
Հայաստանի Հանրապետության կառավարությունը և Թուրքմենստանի կառավարությունը, այսուհետ` Կողմեր
հաշվի առնելով երկու պետությունների ժողովուրդների միջև բարեկամության ավանդական կապերը,
նկատի ունենալով առողջապահության բնագավառում իրավահավասար և փոխշահավետ համագործակցություն ծավալելու Կողմերի շահագրգռվածությունը,
համաձայնեցին ներքոհիշյալի մասին.
ՀՈԴՎԱԾ 1
Կողմերը կնպաստեն առողջապահության բնագավառում համագործակցության զարգացմանն ու ընդլայնմանը:
ՀՈԴՎԱԾ 2
Կողմերը կզարգացնեն փոխշահավետ համագործակցություն հետևյալ բնագավառներում.
- առաջնային ու մասնագիտացված բուժօգնության ցուցաբերում,
- մոր և մանկան առողջության պահպանում,
- կանխարգելիչ բժշկություն և շրջակա միջավայրի պահպանություն,
- դեղաբանություն և բժշկական տեխնիկա,
- սանատորաառողջարանային բուժում,
- վերականգնում, այդ թվում` պրոտեզային-օրթոպեդիկ պարագաներով և հաշմանդամների կյանքի պայմանները թեթևացնող միջոցներով ապահովման հարցերում,
- արտակարգ իրավիճակների բժշկասանիտարական հետևանքների կանխում և վերացում,
- օպերատիվ տեղեկության փոխանակում:
ՀՈԴՎԱԾ 3
Կողմերը իրենց պետությունների քաղաքացիներին կցուցաբերեն անհատույց անհետաձգելի (շտապ) բժշկական օգնություն: Մասնագիտացված պլանային բժշկական օգնությունն իրականացվում է առողջապահական մարմինների և հաստատությունների ուղեգրով կամ անմիջականորեն դիմելու ձևով` պայմանագրային հիմունքով:
Մի պետության տարածքում մշտապես բնակվող` մյուս պետության քաղաքացիները բժշկական ծառայությունից օգտվում են այն պետության քաղաքացիների համար նախատեսված պայմաններով, որում նրանք բնակվում են:
ՀՈԴՎԱԾ 4
Կողմերից յուրաքանչյուրը փոխադարձ օգնություն կցուցաբերի առողջապահության համակարգի կատարելագործման, բժշկական մարմինների և հաստատությունների միջև ուղղակի կապերի կազմակերպման, ինչպես նաև մասնագետների փոխանակման, կոնֆերանսների, գիտաժողովների և սեմինարների անցկացման հարցերում:
ՀՈԴՎԱԾ 5
Արտակարգ իրավիճակներում Կողմերը կապահովեն անհատույց անհետաձգելի բժշկական-խորհրդատվական օգնություն:
ՀՈԴՎԱԾ 6
Առողջապահության բնագավառում համագործակցության կոնկրետ ձևերն ու պայմանները կկարգավորվեն Կողմերի համապատասխան պետական կառավարման մարմինների միջև կնքված առանձին համաձայնագրերով:
ՀՈԴՎԱԾ 7
Անհրաժեշտության դեպքում Կողմերը սույն Համաձայնագրի իրագործման և փոխգործակցության շուրջ հանձնարարականների պատրաստման համար կարող են ստեղծել համատեղ հանձնաժողով:
ՀՈԴՎԱԾ 8
Սույն Համաձայնագիրը կնքվում է հինգ տարի ժամկետով և ուժի մեջ է մտնում դրա ուժի մեջ մտնելու համար անհրաժեշտ ներպետական ընթացակարգերի կատարման մասին Կողմերի փոխադարձ ծանուցման օրվանից: Դրա գործողությունն ինքնաբերաբար կերկարաձգվի հաջորդ հնգամյա ժամանակահատվածներով, եթե Կողմերից ոչ մեկը համապատասխան ժամկետը լրանալուց առնվազն վեց ամիս առաջ մյուս Կողմին գրավոր չտեղեկացնի Համաձայնագրի գործողությունը դադարեցնելու իր մտադրության մասին:
Կատարված է Երևան քաղաքում 1996 թվականի մարտի 19-ին, երկու բնօրինակով, յուրաքանչյուրը` հայերեն, թուրքմեներեն և ռուսերեն, ընդ որում բոլոր տեքստերը հավասարազոր են: Սույն Համաձայնագրի դրույթների մեկնաբանման հարցում տարաձայնություններ առաջանալու դեպքում հիմք կընդունվի ռուսերեն տեքստը:
Համաձայնագիրն ուժի մեջ է 1996 թվականի օգոստոսի 30-ից: