Հ Ա Մ Ա Ձ Ա Յ Ն Ա Գ Ի Ր
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ՎՐԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ ՎԻԶԱՆԵՐԻ ՓՈԽԱԴԱՐՁԱԲԱՐ ՃԱՆԱՉՄԱՆ ՄԱՍԻՆ
Հայաստանի Հանրապետության կառավարությունը և Վրաստանի Հանրապետության կառավարությունը, այսուհետ` Կողմեր,
ղեկավարվելով բարեկամական, բարիդրացիական հարաբերությունները զարգացնելու և փոխադարձ անվտանգության ապահովմանը նպաստելու ցանկությամբ,
անհրաժեշտ համարելով բարենպաստ պայմաններ ստեղծել իրենց տարածքներ երրորդ պետությունների քաղաքացիություն չունեցող անձանց, այսուհետ` օտարերկրյա քաղաքացիներ, մուտքի, տեղաշարժման և ելքի համար,
ընդունելով, որ այդ նպատակներին հասնելու արդյունավետ միջոցներից մեկը Հայաստանի Հանրապետության և Վրաստանի Հանրապետության հյուպատոսական ծառայությունների համագործակցությունն ու օպերատիվ փոխգործունեությունն է,
համաձայնեցին ներքոհիշյալի մասին.
ՀՈԴՎԱԾ 1
Յուրաքանչյուր Կողմ ճանաչում է օտարերկրյա քաղաքացիների` Կողմերի իրավասու մարմինների կողմից տրված մուտքի, ելքի և տարանցիկ վիզաները: Կողմերից մեկի տարածք մուտք գործելու, մնալու և ելքի համար տրված հիշյալ վիզաները ունեցողներին իրավունք են տալիս անարգել կերպով տարանցիկ անցնել մյուս Կողմի տարածք` նշանակման վայր, կամ երրորդ երկիր` ելքի վայր:
ՀՈԴՎԱԾ 2
Կողմերի տարածքներում ժամանակավորապես գտնվող օտարերկրյա քաղաքացիների մնալու և տեղաշարժման կարգը որոշվում է այդ Կողմերի ազգային օրենսդրությամբ:
Կողմերից յուրաքանչյուրն իրավունք ունի ժամանակավորապես սահմանափակել կամ կասեցնել իր տարածքով օտարերկրյա քաղաքացիների տարանցումը` մյուս Կողմին նախօրոք տեղեկացնելով ընդունված որոշումների մասին:
ՀՈԴՎԱԾ 3
Կողմերը պարտավորվում են վիզաներ չտալ այն քաղաքացիներին, որոնց համար Կողմերի տարածք մուտքը փակ է Կողմերից յուրաքանչյուրի սահմանած կարգով: Կողմերը միջոցներ կձեռնարկեն նման անձանց հաշվառման կենտրոնացման և համապատասխան տեղեկության փոխանակման ուղղությամբ:
Այդ անձանց վիզա տրվելու դեպքում վիզա տված Կողմը երաշխավորում է, որ այդ անձանց իրավունք չի տրվի մուտք գործել մյուս Կողմի տարածք: Նման վիզաներում կարվի համապատասխան նշում` «մուտքը Հայաստանի Հանրապետություն փակ է» կամ «մուտքը Վրաստանի Հանրապետություն փակ է»:
ՀՈԴՎԱԾ 4
Կողմերը կփոխանակեն տեղեկություն իրենց տարածքներում օտարերկրյա քաղաքացիների գտնվելու հետ կապված բոլոր հարցերով, այդ թվում` վիզաների ձևակերպման գործող կարգի, հյուպատոսական գանձումների սակագնի մասին, ինչպես նաև կփոխանակեն անձնագրային-վիզային փաստաթղթերի նմուշները:
ՀՈԴՎԱԾ 5
Կողմերը միմյանց կտեղեկացնեն երրորդ պետությունների հետ մուտքի-ելքի հարցերով բոլոր համաձայնագրերի մասին:
ՀՈԴՎԱԾ 6
Կողմերի համաձայնությամբ` սույն Համաձայնագրում կարող են արվել լրացումներ և փոփոխություններ:
ՀՈԴՎԱԾ 7
Սույն Համաձայնագրի Կողմերից յուրաքանչյուրը կարող է դադարեցնել սույն Համաձայնագրի գործողությունը, ինչի մասին նա պետք է ծանուցի մյուս Կողմին ոչ ուշ, քան դուրս գալու օրից 90 օր առաջ:
ՀՈԴՎԱԾ 8
Սույն Համաձայնագիրն ուժի մեջ է մտնում ստորագրման օրվանից 30 օր հետո:
Կատարված է Երևան քաղաքում 1993 թվականի մայիսի 19-ին, երկու օրինակով, յուրաքանչյուրը` հայերեն և վրացերեն, ընդ որում երկու տեքստերն էլ հավասարազոր են:
Համաձայնագիրն ուժի մեջ է մտել 1993 թվականի մայիսի 19-ից: