Հ Ա Մ Ա Ձ Ա Յ Ն Ա Գ Ի Ր
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԵՎ ՍԻՐԻԱՅԻ ԱՐԱԲԱԿԱՆ ՀԱՆՐԱՊԵՏՈՒԹՅԱՆ ՄԻՋԵՎ ՀՅՈՒՊԱՏՈՍԱԿԱՆ ՀԱՄԱԳՈՐԾԱԿՑՈՒԹՅԱՆ ՄԱՍԻՆ
Հայաստանի Հանրապետությունը և Սիրիայի Արաբական Հանրապետությունը,
ցանկանալով զարգացնել երկկողմ համագործակցությունը,
ձգտելով ընդլայնել հյուպատոսական կապերը` համապատասխան նրանց միջև գոյություն ունեցող բարեկամական հարաբերությունների,
պայմանավորվեցին ներքոհիշյալի մասին.
ՀՈԴՎԱԾ 1
Դիվանագիտական և ծառայողական անձնագրեր ունեցող անձանց մուտքի վիզաները տրվում են հետևյալ կերպ`
ա) բազմակի վիզա 1 տարի ժամկետով` դիվանագիտական և հյուպատոսական ներկայացուցչություններում աշխատողներին, ընտանիքի անդամներին և նրանց ուղեկցողներին,
բ) բազմակի վիզա 6 ամիս ժամկետով` պետական պայմանագրերով գործուղվող մասնագետներին,
գ) բազմակի վիզա 3 ամիս ժամկետով` կարճատև գործուղման մեկնողներին,
դ) այլ դեպքերում մուտքի կամ տարանցիկ վիզաներ ստացողներն իրավունք ունեն չներկայանալ գրանցման համար էմիգրացիայի մարմիններին, եթե նրանց կեցության ժամկետը երկրում չի անցնում 30 օրից:
30 օրվա ժամկետն անցնելու դեպքում նրանք գրանցվում են էմիգրացիոն մարմիններում` համաձայն երկրի գործող օրենքների:
ՀՈԴՎԱԾ 2
Առևտրատնտեսական, գիտատեխնիկական, մշակութային, առողջապահական, մարզական և զբոսաշրջության նպատակով փոխայցելությունների դեպքում երկու երկրների քաղաքացիների մուտքի վիզայի դիմումները քննարկվում են հնարավորինս սեղմ ժամկետներում:
ՀՈԴՎԱԾ 3
Տարանցիկ վիզաները երկու երկրների քաղաքացիներին տրվում են 48 ժամով:
ՀՈԴՎԱԾ 4
Մինչև հյուպատոսական ներկայացուցչությունների բացումը մուտքի վիզաները տրվում են սահմանային անցման կետերում: Հայաստանի Հանրապետության այն քաղաքացիները, որոնք նախկինում ունեցել են Սիրիայի Արաբական Հանրապետության քաղաքացիություն, մուտքի վիզա ստանալու համար նախապես դիմում են սիրիական համապատասխան մարմիններին:
ՀՈԴՎԱԾ 5
Երկու երկրների հյուպատոսական ներկայացուցչությունների կողմից տրված մուտքի վիզաներն ուժի մեջ են երեք ամսվա ընթացքում:
ՀՈԴՎԱԾ 6
Երկու երկրների քաղաքացիները փոխայցելությունների ժամանակ պարտավոր են հարգել ընդունող երկրի օրենքները, սովորույթներն ու ավանդույթները: Կողմերից յուրաքանչյուրն իրեն իրավունք է վերապահում մերժելու մյուս Կողմի քաղաքացու մուտքն իր երկիր կամ սահմանափակել նրա կեցության ժամկետը, որը համարվում է անցանկալի անձ տվյալ երկրի համար, առանց պատճառների բացատրության:
ՀՈԴՎԱԾ 7
Ընդունող երկրում մյուս կողմի քաղաքացու մահվան, դժբախտ պատահարի կամ նրա նախնական կալանավորման դեպքում այդ մասին անհապաղ տեղյակ են պահվում մյուս Կողմի համապատասխան մարմինները:
ՀՈԴՎԱԾ 8
Երկու երկրների հյուպատոսությունների ներկայացուցիչները իրավունք ունեն այցելել նախնական կալանքի տակ գտնվող իրենց երկրի քաղաքացուն, պաշտպանել նրա օրինական իրավունքներն ու շահերը:
ՀՈԴՎԱԾ 9
Ընդունող երկրում համապատասխան մարմինները տեղյակ են պահում մյուս երկրի հյուպատոսական ներկայացուցչությանը նրա քաղաքացու մահվան պարագաների մասին և կարգավորում են նրա ունեցվածքի հետ կապված հարցերը` համաձայն երկրի գործող օրենքների:
ՀՈԴՎԱԾ 10
Սույն Համաձայնագիրն ուժի մեջ է մտնում ստորագրման օրվանից 5 տարի ժամկետով և ենթակա է երկարաձգման, եթե կողմերից մեկը 6 ամիս առաջ գրավոր չի ծանուցել նրա գործողության դադարեցման իր որոշման մասին:
Սույն Համաձայնագիրը ենթակա է վավերացման յուրաքանչյուր երկրի գործող օրենքների համաձայն:
Սույն Համաձայնագիրն արձանագրված է Դամասկոսում 1992 թվականի հուլիսի 16-ին, երկու օրինակով, յուրաքանչյուրը` հայերեն և արաբերեն, ընդ որում երկու օրինակներն էլ համազոր են:
Ստորագրված է Երևան քաղաքում 1995 թվականի հոկտեմբերի 19-ին:
Համաձայնագիրն ուժի մեջ է մտել 1997 թվականի հունիսի 12-ից: