Հոդված 11

Հոդված 11

«Ազատ մաքսային գոտի» մաքսային ընթացակարգով ապրանքների ձևակերպման պայմանները

1. «Ազատ մաքսային գոտի» մաքսային ընթացակարգով ձևակերպվում են ԱՏԳ-ի այն տարածքում ռեզիդենտների կողմից տեղաբաշխման և (կամ) օգտագործման համար նախատեսված ապրանքները, որտեղ կիրառվում է «ազատ մաքսային գոտի» մաքսային ընթացակարգը «ԱՏԳ-ի տարածքում գործունեության իրականացման մասին» համաձայնագրի համաձայն ռեզիդենտների կողմից ձեռնարկատիրական և այլ գործունեության իրականացման նպատակներով, ինչպես նաև սույն կետի երկրորդ և երրորդ մասերում նշված ապրանքները:

«Ազատ մաքսային գոտի» մաքսային ընթացակարգով ձևակերպվում են նավահանգստային կամ լոգիստիկ ԱՏԳ-ի տարածքում տեղաբաշխման համար նախատեսված ապրանքները այն անձանց կողմից, որոնք չեն համարվում նավահանգստային կամ լոգիստիկ ԱՏԳ-ի ռեզիդենտներ և, որոնք նավահանգստային կամ լոգիստիկ ԱՏԳ-ի ռեզիդենտի հետ պայմանագիր են կնքել ապրանքների պահեստավորման (պահման), ապրանքների բեռնման (բեռնաթափման) և ապրանքների պահման, պահպանվածության ապահովման, ինչպես նաև ապրանքները տրանսպորտային փոխադրմանը նախապատրաստելու՝ ներառյալ խմբաքանակի մասնատման, առաքումների կազմավորման, տեսակավորման, փաթեթավորման, վերափաթեթավորման, մակնշման հետ կապված գործողությունների առնչությամբ ծառայությունների մատուցման մասին՝ պայմանով, որ նշված ծառայությունները մատուցելիս ապրանքների հետ կատարվող գործողությունները չփոփոխեն ապրանքների հատկանիշները, որոնք կապված են Մաքսային միության արտաքին տնտեսական գործունեության Միասնական ապրանքային անվանացանկով դասակարգման ծածկագրի փոփոխության հետ:

«Ազատ մաքսային գոտի» մաքսային ընթացակարգով ձևակերպվում են այն օտարերկրյա ապրանքները, որոնք Ռուսաստանի Դաշնության թիվ 16-ՖԶ դաշնային օրենքով սահմանված նպատակներին համապատասխան տեղաբաշխման և օգտագործման համար ներմուծվում են «Կալինինգրադի շրջանում առանձնահատուկ տնտեսական գոտու և Ռուսաստանի Դաշնության որոշ օրենսդրական ակտերում փոփոխություններ կատարելու մասին» Ռուսաստանի Դաշնության 2006 թվականի հունվարի 10-ի թիվ 16-ՖԶ դաշնային օրենքով (այսուհետ՝ Ռուսաստանի Դաշնության թիվ 16-ՖԶ դաշնային օրենք) Ռուսաստանի Դաշնության Կալինինգրադի շրջանում ստեղծված առանձնահատուկ տնտեսական գոտու տարածք (այսուհետ՝ Կալինինգրադի շրջանում ԱՀՏԳ) այն իրավաբանական անձանց կողմից, որոնց պետական գրանցումն իրականացվել է Կալինինգրադի շրջանում:

2. «Ազատ մաքսային գոտի» մաքսային ընթացակարգով չեն կարող ձևակերպվել Մաքսային միության մաքսային տարածք ներմուծման համար արգելված ապրանքներ և Մաքսային միության մաքսային տարածքից արտահանման համար արգելված ապրանքներ:

Մաքսային միության հանձնաժողովի կողմից կարող է սահմանվել «ազատ մաքսային գոտի» մաքսային ընթացակարգով ձևակերպման ոչ ենթակա այլ ապրանքների ցանկը: Ընդ որում, «ազատ մաքսային գոտի» մաքսային ընթացակարգով ձևակերպման ոչ ենթակա այլ ապրանքների ցանկի սահմանման մասին որոշումն ընդունվում է Մաքսային միության հանձնաժողովի կողմից ընդհանուր համաձայնությամբ (կոնսենսուսով):

Մաքսային միության անդամ պետությունների օրենսդրությամբ կարող է սահմանվել այդ պետությունների տարածքներում ստեղծված (ստեղծվող) ԱՏԳ-ներում «ազատ մաքսային գոտի» մաքսային ընթացակարգով ձևակերպման ոչ ենթակա ապրանքների ցանկը:

3. «Ազատ մաքսային գոտի» մաքսային ընթացակարգով կարող են ձևակերպվել նախկինում այլ մաքսային ընթացակարգերով ձևակերպված ապրանքներ՝ բացառությամբ սույն Համաձայնագրի 9-րդ հոդվածի 5-րդ կետի 4-րդ ենթակետով սահմանված դեպքի:

4. «Ազատ մաքսային գոտի» մաքսային ընթացակարգով ձևակերպված ապրանքները ենթակա են մաքսային հայտարարագրման Մաքսային միության մաքսային օրենսդրությամբ սահմանված կարգով՝ բացառությամբ սույն հոդվածի 5-րդ կետով սահմանված դեպքի:

5. Ապրանքները «ազատ մաքսային գոտի» մաքսային ընթացակարգով ձևակերպելիս մաքսային հայտարարագրումը չի պահանջվում Մաքսային միության անդամ չհամարվող պետության տարածքից նավահանգստային կամ լոգիստիկ ԱՏԳ-ի տարածք օտարերկրյա ապրանքներ ներմուծելիս՝ բացառությամբ ռեզիդենտների կողմից նավահանգստային կամ լոգիստիկ ԱՏԳ-ի տարածք ներմուծվող օտարերկրյա ապրանքների՝ նավահանգստային ԱՏԳ-ի տարածքում տեղակայված ծովային նավահանգստի, գետային նավահանգստի, օդանավակայանի ենթակառուցվածքների օբյեկտների կամ լոգիստիկ ԱՏԳ-ի ենթակառուցվածքի օբյեկտների կառուցման, վերակառուցման նպատակներով:

Մաքսային միության անդամ պետության օրենսդրությամբ կարող է սահմանվել, որ նավահանգստային կամ լոգիստիկ ԱՏԳ-ի տարածք ներմուծվող և «ազատ մաքսային գոտի» մաքսային ընթացակարգով ձևակերպվող օտարերկրյա ապրանքները ենթակա են մաքսային հայտարարագրման:

6. Նավահանգստային կամ լոգիստիկ ԱՏԳ-ի տարածք մաքսային հայտարարագրման ոչ ենթակա ապրանքները ներմուծելիս իրականացվում են բացառապես Մաքսային միության մաքսային տարածք ապրանքների ժամանման հետ կապված մաքսային գործառնություններ: Ընդ որում, նման ապրանքները՝ բացառությամբ սույն Համաձայնագրի 9-րդ հոդվածի 5-րդ կետի 1-4-րդ ենթակետերում նշված ապրանքների, համարվում են «ազատ մաքսային գոտի» մաքսային ընթացակարգով ձևակերպված ապրանքներ նավահանգստային կամ լոգիստիկ ԱՏԳ-ի տարածք դրանց ներմուծման պահից:

7. Նավահանգստային կամ լոգիստիկ ԱՏԳ-ի տարածք ներմուծված և մաքսային հայտարարագրման ենթակա ապրանքների մաքսային հայտարարագիրը ներկայացվում է դրանց՝ նավահանգստային կամ լոգիստիկ ԱՏԳ ներմուծման օրվանից հետո ոչ ուշ, քան տասնչորս աշխատանքային օրվա ընթացքում:

8. Որպես «ազատ մաքսային գոտի» մաքսային ընթացակարգով ձևակերպված ապրանքների հայտարարագրող կարող է հանդես գալ ռեզիդենտը, ինչպես նաև սույն հոդվածի 10-րդ և 11-րդ կետերում նշված անձինք:

Ռեզիդենտը կարող է հանդես գալ որպես այն ԱՏԳ-ի տարածքում տեղաբաշխվող ապրանքների հայտարարագրող, որի ռեզիդենտ է, ինչպես նաև այն ապրանքների հայտարարագրող, որոնք տեղաբաշխվում են նավահանգստային և լոգիստիկ ԱՏԳ-ների տարածքներում՝ սույն հոդվածի 1-ին կետի երկրորդ մասում նշված պայմանագրի հիման վրա:

9. «Ազատ մաքսային գոտի» մաքսային ընթացակարգը եզրափակելիս որպես ապրանքներ հայտարարագրող կարող է հանդես գալ բացառապես «ազատ մաքսային գոտի» մաքսային ընթացակարգով ապրանքները ձևակերպված ռեզիդենտը՝ բացառությամբ սույն հոդվածի 10-12-րդ կետերով և Համաձայնագրի 15-րդ հոդվածի 3-րդ, 4-րդ ու 6-րդ կետերով սահմանված դեպքերի:

10. Մաքսային միության մաքսային տարածքի մնացած մաս կամ դրա սահմաններից դուրս նավահանգստային կամ լոգիստիկ ԱՏԳ-ի տարածք ներմուծվող կամ նավահանգստային կամ լոգիստիկ ԱՏԳ-ի տարածքից արտահանվող՝ սույն հոդվածի 1-ին կետի երկրորդ մասում նշված ապրանքների հայտարարագրող կարող են լինել ռեզիդենտը կամ Մաքսային միության մաքսային օրենսգրքի 186-րդ հոդվածի 2-րդ ենթակետի 5-րդ պարբերության և 1-ին ենթակետում նշված այլ անձինք:

11. Կալինինգրադի շրջանում ԱՀՏԳ-ի տարածք ներմուծվող՝ սույն հոդվածի 1-ին կետի երրորդ մասում նշված ապրանքների հայտարարագրող կարող է հանդես գալ իրավաբանական անձը, որի գրանցումն իրականացվել է Ռուսաստանի Դաշնության Կալինինգրադի շրջանում:

«Ազատ մաքսային գոտի» մաքսային ընթացակարգը եզրափակելիս Կալինինգրադի շրջանում ԱՀՏԳ-ում ապրանքների հայտարարագրող կարող են լինել «ազատ մաքսային գոտի» մաքսային ընթացակարգի համապատասխան ապրանքների մաքսային հայտարարագրման ժամանակ որպես հայտարարագրող հանդես եկող իրավաբանական անձը և Մաքսային միության մաքսային օրենսգրքի 186-րդ հոդվածի 2-րդ ենթակետի 5-րդ պարբերությունում և 1-ին ենթակետում նշված այլ անձինք:

12. «Մագադանի շրջանում առանձնահատուկ տնտեսական գոտու մասին» Ռուսաստանի Դաշնության 1999 թվականի մայիսի 31-ի թիվ 104-ՖԶ դաշնային օրենքին համապատասխան Մագադանի շրջանում ստեղծված առանձնահատուկ տնտեսական գոտում (այսուհետ՝ Մագադանի շրջանում ԱՀՏԳ) «ազատ մաքսային գոտի» մաքսային ընթացակարգը եզրափակելիս ապրանքների հայտարարագրող կարող են լինել «ազատ մաքսային գոտի» մաքսային ընթացակարգին համապատասխան ապրանքների մաքսային հայտարարագրման ժամանակ որպես հայտարարագրող հանդես եկող իրավաբանական անձը և Մաքսային միության մաքսային օրենսգրքի 186-րդ հոդվածի 2-րդ ենթակետի 5-րդ պարբերությունում և 1-ին ենթակետում նշված այլ անձինք:

13. «Ազատ մաքսային գոտի» մաքսային ընթացակարգով ապրանքները ձևակերպելիս մաքսատուրքերի, հարկերի վճարման ապահովում չի պահանջվում: