Հոդված 9.2. ․ Ջերմոցային գազերի համար արտանետման թույլտվության տրամադրումը

Հոդված 9.2․ Ջերմոցային գազերի համար արտանետման թույլտվության տրամադրումը

1․ Ջերմոցային գազերի արտանետման թույլտվությունը տրամադրում է լիազոր մարմինը՝ դիմողի հայտի հիման վրա՝ հայտը ներկայացնելու պահից մեկամսյա ժամկետում։

2․ Ջերմոցային գազերի արտանետման թույլտվության հայտը ներառում է՝

1) դիմողի տվյալները՝ իրավաբանական անձի անվանումը և կազմակերպաիրավական ձևը, անհատ ձեռնարկատիրոջ անունը և ազգանունը, գտնվելու վայրը կամ ձեռնարկատիրական գործունեությամբ զբաղվելու հասցեն, պետական գրանցման (հաշվառման) համարը․

2) տեղեկություններ օգտագործվող հումքի և օժանդակ նյութերի ֆիզիկաքիմիական հատկությունների վերաբերյալ, որոնց մշակումը կամ այլ կերպ օգտագործումը կամ պահումը հանգեցնում է ջերմոցային գազերի արտանետումների․

3) տեղեկություններ ջերմոցային գազերի արտանետումների աղբյուրների տեսակի, քանակի և տեղակայման վայրի վերաբերյալ, ինչպես նաև դրանց նկարագրերը կամ տեխնիկական բնութագրերը․

4) տարեկան կտրվածքով ջերմոցային գազերի արտանետումների ակնկալվող ծավալը և դրա հաշվարկ-հիմնավորումը՝ ըստ ջերմոցային գազի տեսակի և համապատասխան արտանետման աղբյուրի․

5) ջերմոցային գազերի արտանետումների մոնիտորինգի պլանը և արտանետումների մոնիտորինգի մեթոդաբանությունը․

6) սույն հոդվածի 2-րդ մասի 2-5-րդ կետերում նշված տեղեկությունների ոչ տեխնիկական նկարագիրը։

3. Լիազոր մարմինը հայտի ոչ լրակազմ լինելու կամ ոչ ճիշտ տվյալներ պարունակելու մասին դիմողին գրավոր ծանուցում է հայտն ստանալու օրվանից 10 աշխատանքային օրվա ընթացքում։ Լիազոր մարմնի կողմից դիմողին թերությունների մասին գրավոր ծանուցելու պահից հայտի քննարկման ժամկետը համարվում է կասեցված։

4. Ջերմոցային գազերի արտանետման թույլտվությունը տրամադրվում է 10 տարի ժամկետով։

5. Ջերմոցային գազերի արտանետման թույլտվություն ունեցող իրավաբանական անձը կամ անհատ ձեռնարկատերը ջերմոցային գազերի արտանետման նոր թույլտվություն ստանալու համար, սույն հոդվածի 1-ին մասի համաձայն, հայտ է ներկայացնում ջերմոցային գազերի արտանետման թույլտվության ժամկետի ավարտից առնվազն մեկ ամիս առաջ:

(9.2-րդ հոդվածը լրաց. 20.01.26 ՀՕ-18-Ն)