Հոդված 306. Պաշտոնական պարզաբանումների տրամադրումը
Հոդված 306. Պաշտոնական պարզաբանումների տրամադրումը
1. Հարկային մարմինը «Իրավական ակտերի մասին» Հայաստանի Հանրապետության օրենքով սահմանված դեպքերում, կարգով և ժամկետներում տրամադրում է պաշտոնական պարզաբանումներ, եթե սույն հոդվածով այլ բան սահմանված չէ` դրանք նախապես համաձայնեցնելով Կառավարության կողմից լիազորված` ֆինանսական բնագավառում պետական կարգավորում իրականացնող պետական մարմնի հետ:
2. Հարկային մարմինը պաշտոնական պարզաբանումը տրամադրում է դիմումն ստանալուն հաջորդող 15 օրվա ընթացքում: Եթե պաշտոնական պարզաբանման համար անհրաժեշտություն է առաջանում ստանալ այլ իրավասու մարմնի դիրքորոշումը, ապա պաշտոնական պարզաբանման տրամադրման ժամկետը հետաձգվում է մինչև իրավասու մարմնի դիրքորոշման ստացումը, ինչի մասին հարկային մարմինը գրավոր տեղեկացնում է դիմողին:
3. Պաշտոնական պարզաբանումները հրապարակվում են հարկային մարմնի պաշտոնական ինտերնետային կայքում: Եթե պաշտոնական պարզաբանում ստանալու համար ներկայացված դիմումը վերաբերում է իրավական ակտին կամ դրա դրույթին, որի համար հարկային մարմինը նախկինում տվել է պաշտոնական պարզաբանում, ապա նոր պաշտոնական պարզաբանում չի տրվում, և դիմումի հիման վրա հարկային մարմինն իրականացնում է հարկ վճարողի անհատական իրազեկման գործընթաց` հղում կատարելով այն տեղեկագրին կամ հարկային ծառայության պաշտոնական ինտերնետային կայքին, որտեղ հրապարակված է նախկինում տրված պաշտոնական պարզաբանումը:
(306-րդ հոդվածը լրաց. 21.12.17 ՀՕ-266-Ն, փոփ. 23.03.18 ՀՕ-261-Ն)