Հոդված 47. Արտոնագրի (լիցենզիայի) տեսակները: Արտոնագրատերը
Հոդված 47. Արտոնագրի (լիցենզիայի) տեսակները: Արտոնագրատերը
Արտոնագիրը (լիցենզիան) միակ օրինական հիմքն է, որը թույլ է տալիս իրականացնել հեռուստառադիոհաղորդումների արտադրություն, օգտվել որոշակի հաճախությունից, կաբելային (լարային) ցանցից` Հայաստանի Հանրապետության տարածքում հեռուստառադիոհաղորդումների իրականացման նպատակով, բացառությամբ Հայաստանի Հանրապետության օրենսդրությամբ սահմանված դեպքերի:
Արտոնագրերը (լիցենզիաները) լինում են`
ա) հեռուստառադիոհաղորդումների արտադրության.
բ) հեռուստառադիոհաղորդումների հեռարձակման.
գ) հեռուստառադիոհաղորդումների արտադրության և հեռարձակման:
Հեռուստառադիոհաղորդումների արտադրության արտոնագիրը (լիցենզիան) հավակնորդներին հատկացվում է առանց մրցույթի` Ազգային հանձնաժողովի սահմանած կարգին համապատասխան:
Հեռարձակման կամ հեռարձակման և արտադրության արտոնագիրը (լիցենզիան) տրվում է մրցութային և (կամ) աճուրդային կարգով` հաճախությունների ցանկին համապատասխան:
Արտոնագիրը (լիցենզիան) իրավունք է տալիս արտոնագրատիրոջը հեռուստառադիոհաղորդումներ իրականացնելու նպատակով վարձակալման պայմանագրեր կնքել հեռահաղորդակցության միջոցներ ունեցող կազմակերպությունների և ձեռնարկությունների հետ:
Արտոնագրատերը չի կարող արտոնագիրը (լիցենզիան) փոխանցել կամ վաճառել (օտարել) այլ անձի: