Հոդված 54

Հոդված 54.

«Ա» կետով են փորձաքննվում միզասեռական համակարգի հիվանդությունները կամ արատները, որոնք ուղեկցվում են երիկամների էքսկրետոր (արտազատիչ) գործառույթի զգալի խանգարումով: Այս կետին են վերաբերում նաև՝

1) քրոնիկական միզային խուղակներ, խրոնիկական գործող նեֆրոստոմա, խրոնիկական էպիցիստոստոմա, խրոնիկական ուրեթերոստոման՝ անկախ գործառույթից.

2) միակ երիկամը՝ անկախ գործառույթից, հինգերորդ սյունակի համար կիրառվում է «բ» կետը` կախված գործառույթի խանգարման աստիճանից.

3) երիկամներից մեկի գործառույթի բացակայությունը կամ զգալի իջեցումը, անկախ մյուս երիկամի գործառույթից.

4) երիկամների պոլիկիստոզը՝ անկախ գործառույթից, հինգերորդ սյունակի համար կիրառվում է «բ» կետը՝ կախված գործառույթի խանգարման աստիճանից.

5) երիկամների հիպոպլազիան 6սմ և պակաս` անկախ գործառույթից.

6) երիկամների սերտաճման բոլոր արատները՝ պայտաձև, նաև L-ձև, S-ձև երիկամները՝ անկախ գործառույթից, հինգերորդ սյունակի համար կիրառվում է «բ» կետը.

7) 3-րդ աստիճանի հիդրոնեֆրոզը՝ անկախ գործառույթից.

8) 3-րդ աստիճանի երկկողմանի նեֆրոպտոզը՝ անկախ գործառույթից, կատարվում է ռենտգեն հետազոտություն կոնտրաստավորումով, հինգերորդ սյունակի համար կիրառվում է «բ» կետը.

9) երիկամի կոնքային դիստոպիան կամ էկտոպիան՝ անկախ գործառույթից, հինգերորդ սյունակի համար կիրառվում է «բ» կետը.

10) միզաքարային հիվանդությունը երկու երիկամների ախտահարումով՝(քարերի չափերը 2սմ և ավել) անարդյունավետ բուժմամբ (հիդրոնեֆրոզ, պիոնեֆրոզ).

11) զույգ երիկամների լրիվ երկատումը՝ անկախ գործառույթից, հինգերորդ սյունակի համար կիրառվում է «բ» կետը.

12) միզապարկի վզիկի սկլերոզի կամ այլ պատճառներով միզապարկ-միզածորանային ռեֆլյուքսը՝ բարդացած հիդրոուրետերոնեֆրոզով, միզապարկի պատերի տռաբեկուլյացիայով, միզապարկի դիվերտիկուլներով.

13) երիկամային անոթների անոմալիան՝ հաստատված ՀՇ անգիոգրաֆիայով՝ ուղեկցվող վազոռենալ հիպերտենզիայով և (կամ) երիկամային արյունահոսությամբ.

14) երկկողմանի ախտահարման դեպքում՝ յուրաքանչյուր երիկամում պարզ կիստան կամ կիստաները (Բոսնիակ դասակարգման I և II ստադիաներ), որոնց գումարային չափսը յուրաքանչյուր երիկամում կազմում է 4,0 սմ և ավելի, անկախ գործառույթից՝ ախտորոշվում է համակարգչային շերտագրումով, ցուցման առկայության դեպքում կատարվում ՀՇ կոնտրաստավորում (հինգերորդ սյունակի համար կիրառվում է «բ» կետը).

15) մեգալոուրեթերը՝ հաստատված կոնտրաստային համակարգչային շերտագրումով, հինգերորդ սյունակի համար կիրառվում է «բ» կետը.

16) վիճակ միզածորանների ռեկոնստրուկտիվ վիրահատություններից հետո:

«Բ» կետով են փորձաքննվում միզասեռական համակարգի հետևյալ հիվանդությունները կամ արատները․

1) հիդրոնեֆրոզը՝ ավազանի լայնակի չափսը 3,0 սմ և ավելի, անկախ գործառույթի խանգարումից.

2) միզաքարային հիվանդությունը՝ հաճախակի (տարեկան 3 կամ ավելի անգամ) երիկամային խիթի նոպաներով, միզային քարերի արտազատմամբ՝ հաստատված պարտադիր ստացիոնարում բուժման էպիկրիզներով և սոնոգրաֆիկ կամ ՀՇ հետազոտություններով.

3) երիկամների հիպոպլազիան մինչև 9սմ՝ անկախ գործառույթից, հինգերորդ սյունակի համար` կախված գործառույթի խանգարման աստիճանից.

4) մեկ երիկամի լրիվ երկատումը.

5) երիկամի պարզ կիստան կամ կիստաները (Բոսնիակ դասակարգման I և II ստադիաներ), որոնց գումարային չափսը կազմում է 4,0 սմ և ավելի, անկախ գործառույթից՝ ախտորոշման համար սահմանային դեպքերում հիմք է հանդիսանում ՀՇ-հետազոտության տվյալները.

6) երիկամների կամ միզածորանի եզակի 0,7 սմ և ավելի միզային քարերի առկայությունը, նույն երիկամում՝ երկու 0,5սմ և ավելի բազմակի քարեր անկախ գործառույթից.

7) 3-րդ աստիճանի միակողմանի նեֆրոպտոզ՝ անկախ ֆունկցիայի խանգարման աստիճանից, կատարվում է ռենտգեն հետազոտություն կոնտրաստավորումով.

8) երկկողմանի 2-րդ աստիճանի նեֆրոպտոզը.

9) երիկամի զստային և զստակոնքային դիստոպիան կամ էկտոպիան՝ անկախ գործառույթից:

«Գ» կետով են փորձաքննվում միզասեռական համակարգի հիվանդությունները կամ արատները, որոնք ուղեկցվում են երիկամների էքսկրետոր գործառույթի աննշան խանգարումով: «Գ» կետին են վերաբերում՝

1) երիկամների գոտկային, գոտկազստային դիստոպիա կամ էկտոպիա.

2) երիկամների (մինչև 0,7 սմ) միզային քարերի առկայությունը.

3) երկկողմանի I աստիճանի նեֆրոպտոզը, կատարվում է ռենտգեն հետազոտություն կոնտրաստավորումով.

4) 2-րդ աստիճանի միակողմանի նեֆրոպտոզը.

5) 1-ին աստիճանի հիդրոնեֆրոզը, երբ ավազանի լայնակի չափսը փոքր է 3,0 սմ-ից.

6) երիկամի պարզ կիստան կամ կիստաները, որոնց գումարային չափսը 4,0սմ-ից պակաս է:

«Դ» կետով են փորձաքննվում միզասեռական համակարգի հիվանդությունները կամ արատները, որոնք չեն ուղեկցվում երիկամների էքսկրետոր գործառույթի խանգարումով: «Դ» կետին են վերաբերում՝

1) վիճակ միզային ուղիներից (երիկամի ավազանից, միզածորանից, միզապարկից) միզային քարերի գործիքների միջոցով հեռացումը կամ ինքնուրույն արտազատումից հետո՝ առանց կրկնակի քարերի ձևավորման.

2) 1-ին աստիճանի միակողմանի նեֆրոպտոզը.

3) երիկամի կամ երիկամների մասնակի երկատումը, պիտանի է զինվորական ծառայության համար՝ առանց գործառույթի որոշման.

4) փոքր (մինչև 0,5 սմ) երիկամների եզակի քարերը, որոնց առկայությունը հաստատվել է միայն ուլտրաձայնային հետազոտությամբ:

Երիկամների արտազատիչ գործառույթը որոշելու համար կատարվում է կոնտրաստ համակարգչային շերտագրում:

Երիկամների իջեցման աստիճանը որոշվում է ռենտգենոլոգի կողմից, հետազոտվողի պառկած և ուղղահայաց դիրքով կատարված ռենտգեն նկարներով` առաջին աստիճան՝ երիկամի ներքևի բևեռի իջեցում 2 ող ցած, 2-րդ աստիճան՝ 3 ող ցած և 3-րդ աստիճան՝ ավելի քան 3 ող:

Երիկամի դիստոպիաները հաստատվում են համակարգչային շերտագրումով:

Միակ երիկամի, երիկամի հիպոպլազիայի, երիկամների պոլիկիստոզի, երիկամների սերտաճման արատների, հիդրոնեֆրոզի, երիկամների լրիվ երկատման ախտորոշման և բոլոր դեպքերում, երբ անհրաժեշտ է որոշել երիկամների արտազատիչ (էքսկրետոր) ֆունկցիան կատարվում է կոնտրաստ համակարգչային շերտագրում:

Քրոնիկ երիկամային հիվանդությամբ բարդությունների դեպքում կիրառվում է 31-րդ հոդվածը:

Բոլոր վիճելի կամ սահմանային դեպքերում հիմք է հանդիսանում ՀՇ հետազոտության տվյալները։