Հոդված 8. Ազգային մակարդակով սահմանված հանձնառությունները

Հոդված 8. Ազգային մակարդակով սահմանված հանձնառությունները

1. Ազգային մակարդակով սահմանված հանձնառություններով ամրագրվում են երկրի՝ ջերմոցային գազերի արտանետումների կրճատման թիրախները՝ համաձայնագրով սահմանված պահանջներով և պարբերականությամբ, ինչպես նաև թիրախներին հասնելու գործողությունները և դրանց իրականացման համար անհրաժեշտ ֆինանսավորման մեխանիզմները: Ջերմոցային գազերի արտանետումների կրճատման թիրախներ կարող են սահմանվել նաև մեղմման առանձին ոլորտների համար:

2. Յուրաքանչյուր հաջորդ շրջափուլում Ազգային մակարդակով սահմանված հանձնառություններում ամրագրված թիրախները պետք է արտահայտեն ավելի բարձր հավակնություններ:

3. Ազգային մակարդակով սահմանված հանձնառություններում խորհրդի առաջարկությամբ կարող են կատարվել փոփոխություններ՝ հիմք ընդունելով՝

1) ժողովրդագրական կամ սոցիալ-տնտեսական էական փոփոխությունները.

2) կլիմայի փոփոխության վրա ազդեցություն ունեցող նոր գործոնի ի հայտ գալը կամ մեղմմանն ուղղված գիտատեխնիկական նորարարական լուծումների հասանելիությունը.

3) աղետի, համաճարակի, համավարակի, պատերազմի կամ այլ անհաղթահարելի ուժի հետևանքով Ազգային մակարդակով սահմանված հանձնառությունների անիրագործելիությունը:

4. Ազգային մակարդակով սահմանված հանձնառությունները և դրա իրականացման ծրագիրը հաստատում է Կառավարությունը: