Հոդված 30. Կլիմայական ֆինանսավորման, տեխնոլոգիաների փոխանցման, կարողությունների զարգացման մշտադիտարկումը

Հոդված 30. Կլիմայական ֆինանսավորման, տեխնոլոգիաների փոխանցման, կարողությունների զարգացման մշտադիտարկումը

1. Կլիմայական ֆինանսավորման, տեխնոլոգիաների փոխանցման, կարողությունների զարգացման վերաբերյալ տվյալների շտեմարանը երկամյա կտրվածքով ներառում է ստացված և անհրաժեշտ ֆինանսավորման, տեխնոլոգիաների փոխանցման, կարողությունների զարգացման վերաբերյալ տվյալներ:

2. Սույն հոդվածի 1-ին մասում նշված տվյալների շտեմարանում ներառելու նպատակով իրենց կողմից ստացված և անհրաժեշտ կլիմայական ֆինանսավորման, տեխնոլոգիաների փոխանցման և կարողությունների զարգացման վերաբերյալ լիազոր մարմնին տվյալներ են տրամադրում՝

1) պետական կառավարման համակարգի մարմինները.

2) տարածքային կառավարման մարմինները.

3) տեղական ինքնակառավարման մարմինները.

4) Հայաստանի Հանրապետության կենտրոնական բանկը.

5) ֆինանսական կազմակերպությունները:

3. Սույն հոդվածի 2-րդ մասում նշված սուբյեկտները կլիմայական ֆինանսավորման, տեխնոլոգիաների փոխանցման, կարողությունների զարգացման վերաբերյալ տվյալները ներկայացնում են լիազոր մարմին երկամյա պարբերականությամբ:

4. Հայաստանի Հանրապետության կողմից կոնվենցիայի իրականացման համար ստացված կլիմայական ֆինանսավորման, տեխնոլոգիաների փոխանցման, կարողությունների զարգացման մշտադիտարկման կարգը հաստատում է Կառավարությունը: