Հոդված 27. Մրցութային վարույթ հարուցելու հետևանքները
Հոդված 27. Մրցութային վարույթ հարուցելու հետևանքները
1. Պարտապանին սնանկ հայտարարելու և մրցութային վարույթ հարուցելու վերաբերյալ որոշման ընդունման պահից`
պարտապանը զրկվում է սեփականության իրավունքով իրեն պատկանող գույքի տնօրինման և կառավարման իրավունքից, եթե դատարանի որոշմամբ նա չի նշանակված մրցութային կառավարիչ.
արգելվում է սեփականության իրավունքով պարտապանին պատկանող գույքի օտարումը (բացառությամբ այն դեպքերի, երբ օտարման թույլտվությունը տրված է պարտատերերի ժողովի (կոմիտեի) կողմից) և նախկին պայմանագրով ստանձնած պարտավորությունների կատարումը.
դադարեցվում է պարտապանի բոլոր տեսակի պարտքերին տոկոսների հաշվեկցումը.
դադարեցվում է պարտապանից շահաբաժինների, տոկոսային, ռենտային, վարձակալական և այլ վճարների, գույքահարկի և եկամտահարկի գանձումը:
Սեփականության իրավունքով պարտապանին պատկանող գույքի նկատմամբ բռնագանձումներ կիրառվում են Հայաստանի Հանրապետության օրենսդրությամբ սահմանված կարգով:
Պարտապանի նկատմամբ պարտատիրոջ (պարտատերերի) գույքային բնույթի բոլոր պահանջները կարող են բավարարվել միայն մրցութային վարույթի շրջանակներում:
2. Մրցութային վարույթ հարուցելու պահից պարտապանի տնտեսական գործունեությունը շարունակվում է սույն օրենքով սահմանված սահմանափակումներով, այդ թվում`
աշխատանքային պայմանագրերի փոփոխությունների և պարտապանի կողմից մինչև մրցութային վարույթի հարուցումը գործունեության շարունակման մասին որոշումները կայացվում են մրցութային կառավարչի կողմից` ելնելով պարտատերերի և պարտապանի օրինական շահերից և հաստատվում են դատարանի կողմից` սույն օրենքով սահմանված կարգով.
մրցութային կառավարչի ներկայացմամբ դատարանը երկու ամսվա ընթացքում հաստատում է պարտապանի` մինչև մրցութային վարույթի հարուցումը կնքած բոլոր այն պայմանագրերը և համաձայնագրերը, որոնց կատարումը պարտապանի կողմից դատարանը համարում է անհրաժեշտ և անվավեր է ճանաչում մնացած բոլոր պայմանագրերը և համաձայնագրերը: