Հոդված 6. Բնության հատուկ պահպանվող տարածքների կառավարումը
Հոդված 6. Բնության հատուկ պահպանվող տարածքների կառավարումը
1. Հայաստանի Հանրապետությունում հանրապետական նշանակության բնության հատուկ պահպանվող տարածքների կառավարումն իրականացվում է լիազորված մարմնի ենթակայության տակ գործող պետական ոչ առևտրային կազմակերպությունների կողմից՝ համաձայն սույն օրենքի, տվյալ բնության հատուկ պահպանվող տարածքի կանոնադրության և զարգացման (կառավարման) պլանի, բացառությամբ բնության հուշարձանների:
2. Բնության հուշարձանի կառավարումը Կառավարության որոշմամբ սահմանված կարգով իրականացվում է պետական ոչ առևտրային կազմակերպությունների, տեղական ինքնակառավարման մարմինների կամ իրավաբանական անձանց (ոչ պետական կազմակերպությունների) միջոցով, որի համար լիազորված մարմինը Հայաստանի Հանրապետության անունից կնքում է կառավարման պայմանագիր:
3. Կառավարման պայմանագրով սահմանվում են կառավարող սուբյեկտի իրավունքներն ու պարտականությունները, ֆինանսավորման աղբյուրները, հսկողության և հաշվետվողականության մեխանիզմները, ինչպես նաև լիազորված մարմնի մշտադիտարկումային պարտականությունները: Կառավարումն իրականացվում է համաձայն բնության հուշարձանի անձնագրի և կառավարման պայմանագրում ամրագրված դրույթների:
4. Հանրապետական նշանակության բնության հատուկ պահպանվող տարածքների հողամասերը, բացառությամբ արգելոցների, արգելավայրերի կամ ազգային պարկերի արգելոցային կամ արգելավայրային գոտիների, լիազորված մարմնի կողմից տրամադրվում են վարձակալության կամ կառուցապատման իրավունքով՝ Կառավարության որոշմամբ սահմանված կարգով: Բնության հուշարձանները կառուցապատման իրավունքով չեն տրամադրվում:
Սույն մասի առաջին պարբերությամբ նախատեսված կարգով հողամասերը կառուցապատման իրավունքով տրվում են բացառապես Հայաստանի Հանրապետության օրենսդրությամբ սահմանված ներդրումային ծրագրեր իրականացնելու նպատակով:
5. Տեղական նշանակության բնության հատուկ պահպանվող տարածքը կառավարվում է տեղական ինքնակառավարման այն մարմինների կողմից, որոնց վարչական սահմաններում ամբողջությամբ կամ մասնակիորեն գտնվում է տվյալ տարածքը: Մեկից ավելի համայնքների վարչական սահմաններում գտնվելու դեպքում կառավարումն իրականացվում է համայնքների միջև կնքված համաձայնագրի հիման վրա:
6. Բնության հատուկ պահպանվող տարածքների սահմաններում գտնվող պատմության և մշակույթի անշարժ հուշարձանների պահպանական գոտիների և դրանցում սահմանված ռեժիմներին առնչվող բոլոր աշխատանքները համաձայնեցվում են հուշարձանների պահպանության բնագավառում Կառավարության լիազորած պետական կառավարման մարմնի հետ՝ «Պատմության և մշակույթի անշարժ հուշարձանների և պատմական միջավայրի պահպանության և օգտագործման մասին» օրենքին համապատասխան: